膠事錄非總裁投稿: 德鐵係最唔德國嘅野
Sep 4, 2018 · 3 min read

我成日話,德國國鐵(DB)係最唔德國嘅德國嘢。你以爲德國人好準時?咪玩啦,DB delay少兩分鐘都阿彌陀佛、善哉善哉。
話說,我嗰日喺慕尼黑經斯圖加特去巴黎,因爲夾唔啱時間,只好揀咗得10分鐘轉車時間嘅列車,諗住幾日之前個朋友咁樣玩法都無事,可以搏一搏。點知真係delay啦,最終delay咗35分鐘,都鐵定趕唔到去巴黎班車㗎喇,打定輸數搵下個connection。點知同日其他去巴黎嘅車都係法國TGV,一定要訂位先有得上車,但係既無網上留位(只可以成張車飛買過),轉車嘅Mannheim亦無TGV櫃台,結果又響度諗使唔使中途停Strasbourg,去櫃台留咗位先再上下班車去巴黎,真係諗吓都覺得費時失事。同車有一個講英文嘅家庭,個阿媽都係不斷碌電話,話搵唔到點樣留位,隔籬位嗰位中年女士亦都話自己係去巴黎,而家失咗班車都唔知點先去到,睇嚟都有唔少人同我情況一樣。


