Гэрэг: Humans of Ulaanbaatar булангийн тухай
Ц.Шувуу
Америкийн чөлөөт гэрэл зурагчин Брэндон Стэнтоны эхлүүлсэн “Humans of New York” төсөл дэлхий нийтийг хамарч, хотын гудамжаар алхах эгэл хүмүүсийн, эгэл биш түүхийг хөрөг зургийг хамт хуваалцдаг нь “Humans of Paris”, “Humans of Beijing” гэхчлэн хөвөрсөөр одоогоор дэлхийн 70 гаруй хотод халдварлаад байна. Цогтын Шувуу миний бие ч Брэндоны адил эгэл шалтгаанаар “Humans of Ulaanbaatar” цувралыг эхлүүлээд хагас жил өнгөрчээ.
Долоо хоног тутмын “Гэрэг” сэтгүүлд хөтлөн явуулдаг “Humans of Ulaanbaatar” булангаараа фото хуудас нээхээр шийдэв. Улаанбаатарын хүмүүс маань бие биеэсээ айж, төвөгшөөдөг гэдгийг би Герман улсаас ирснээсээ хойш ажигласан юм. Учир нь бид нэг нэгэндээ итгэдэггүй. Аргагүй ч биз, танихгүй хүн ер нь л аюултай санагддаг.
Гэхдээ миний бодлоор хэрвээ хүнтэй чин сэтгэлээсээ харилцвал энэ хорвоо дээр муу хүн гэж үгүй. Хүн болгоны зүрхэнд ямар нэгэн гайхамшигтай чанар үргэлж оршиж байдаг. Үүнийг л нээх гэж би гэрэл зургийн аппаратаа үүрээд өдөр бүр Улаанбаатарын гудамжаар алхаж, гайхамшигтай ертөнцүүдийг нээсээр яваа билээ. Надтай таарсан, миний олж нээсэн эгэл хүмүүсийн эгэл биш түүхтэй хамт байгаарай, та.
