交換生月記（一）
已經過咗四分之一，然後呢？
常言道exchange第一個月嘅衝擊係最大，之後就開始對外地生活習以為常，所以想喺度留個月記，觀察下自己嘅變化。當然一千字係記唔曬成個月同自己嘅對話（aka自言自語）嘅，唯有之後再睇下有無時間（同動力）再慢慢解釋唔同嘅經歷啦。有題目想睇嘅話，記得highlight多啲！
又，寫月記嘅靈感係來自 H Fung嘅隨筆，只不過我實在太懶所以改成月記，希望唔好介意，哈哈～
關於消費。
今日係第36日，唔計租金、機票同中大學費（再講就咩都唔使計啦），呢個月總共用咗港幣一萬蚊，當中有二千六係去挪威奧斯陸四日三夜嘅使費。呢個價錢唔係最多、亦唔係最窮遊，若然你對茶葉/咖啡豆/粉紅岩鹽/蜜糖/風乾火腿/芝士/煙三文魚/牛扒/魚湯/OATLY/朱古力/sourdough無特別癖好嘅話，你又可以比我用少兩千蚊。
其實我覺得自己使錢唔算多（但食物質素高咗），而瑞典物價又未到買唔落手嘅地步，只不過喺香港有家人同住，啲買餸錢廁紙洗衣粉化妝棉膠布電話費都唔經自己手，於是就有exchange要使好多錢嘅假象。
關於理想。
呢個月以嚟一直諗自己可以做啲咩。面向自己，有時會諗「啊不如試下喺度搵internship/grad job」，但望住香港情況越黎越離譜嗰時，又會覺得自己離開係不負責任嘅行為。
我喺instagram（follow咗未呀～@hadesophic） bio話自己 “In search of Social Innovation in Gothenburg”，話要儘量善用呢度有既資源、network去了解社會創新，但其實香港無咩？點解喺香港嘅時候，我又唔擺咁多精力落去？
究竟係「隔離飯香」定瑞典喺社會創新上面有過人之處？
關於語言。
瑞典有九成人識講英文、容易接受外地文化係我揀佢嘅其中一個原因。我唔係為咗學少樣語言，而係想更加容易認識呢個國家。結果路牌、電車、MENY、告示全部都係瑞典文，喺超市要長開google translate。睇黎香港嘅雙語設計寵壞曬啲外國遊客了。
關於學習。
啱啱考完第一個試，老實講我學到嘅野唔多，睇literature比喺lecture聽佢讀ppt更加有用；最諷刺嘅係我繼續上堂係為咗聽其他同學對歐盟嘅睇法，而唔係為個老師嘅見解。
大家講到北歐教育如何高質素，我暫時就未感受到，希望下個課程會有驚喜。
最近有新聞話芬蘭中小學放棄傳統教育模式好似好好咁，但芬蘭經濟比瑞典差，學生由細就必修瑞典文、唔少學生為左搵到好工連exchange都過黎瑞典等自己可以講得好啲，香港人知道嗎？
關於旅行。
有個週末去咗挪威奧斯陸，真係好貴（除左咖啡）。如果唔係為咗打卡去曬北歐大城市既話，窮遊奧斯陸未必係個好嘅選擇，尤其係自己一個去、無得share airbnb嘅話。對於旅行嘅意義同目的嘅疑問，容我期後另闢一角詳談。
關於埋堆。
可能係我住得遠，無得一齊煮飯，同其他香港同學都唔算熟。有段時間因為呢樣嘢而唔開心，見人地一起旅行好開心而我就埋唔到堆，但關係嘅野都唔係我一個人改變到。而家算係唸通咗，就算有得一起玩，以我性格我最後都會自己走去做其他野，咁我唔開心啲咩呢～
其實本來只打算point form每樣打幾句，結果太長氣，但又唔夠長獨立成章，兩頭唔到岸咁:(
一路以黎嘅經歷令自己懷疑理想嘅（外地）生活模式究竟係啲咩。入鄉隨俗同保留原居地文化嘅界線其實喺邊？嘗試新衝擊係文化交流嘅重點，但一直跟隨大眾步伐又會唔會太勉強自己？Am I just executing my ideal life(that I have always imagined), without facing challenges in the reality because I’m an exchange student?不過再問落去又一匹布咁長，不如聽吓大家點睇先。
