交換生月記（二）
當新鮮感轉化成日常
無驚無險又過咗一個月，初嚟到嘅新鮮感已經冇咗，取而代之嘅係日常生活嘅循環。我好多謝以前嘅自己，有勇氣、有毅力寫低當時所有嘅新鮮感，到而家我已經懶得將每個細節記低，當我睇返轉頭就會錯過好多當時嘅情感。
二月尾到三月頭去咗倫敦一轉，去busking、走水貨將blender運返屋企之餘，亦都重新認清自己身處嘅環境（我講哥德堡唔係香港呀）。以前去旅行嘅時候發現有文化差異時，第一下諗起嘅係「香港唔係咁架，香港會點點點⋯」，我今次去倫敦呢幾日就突然發現，我所比較嘅唔再係香港同外地嘅分別，而係瑞典同外地嘅分別。
廢物分類、廚餘處理等等我以為係歐洲生活好正常嘅習慣，原來只係瑞典、甚至哥德堡入面先會咁做（註：我知道德國都係咁~）。同樣地，見得朋友多先發現，自己以為好平常嘅生活習慣，喺身邊嘅人眼中係啲只有我先會做嘅奇怪事。
人地話去旅行係為咗發現世界嘅美好，但我去旅行就令自己珍惜本來有嘅嘢。
（當年申請交流要面試，其他人講緊自己可以點樣認識新朋友、獨立生活嗰陣，我真係咁樣答。）
相比之下，倫敦嘅食物多元化好多。啲蠔大隻啲，連芝士都新鮮啲特別啲。去左八日，淨係得兩餐係自己煮，見朋友嘅時候又會覺得豪一次半次無咩所謂，結果啲錢就倒水咁倒。
但同時佢嘅治安都幾差，幾乎身邊每一個留學及港人都有被搶劫嘅經歷。朋友由第一日已經叫我要打醒十二分精神，小心隨身財物，連tote bag孭喺外套出面都好易成為目標。結果，獨行嘅時候一直都提心弔膽，啲人行近少少都下意識避開，其實都幾大壓力。我覺得自己喺度長住嘅話會心理唔平衡…都係留喺哥德堡生活舒服啲。
另一個旅程
本來月初會去Lapland雪地玩雪橇狗，最後因為自己擔心走曬堂會學唔到野（大家係咪覺得呢個原因好荒謬😂），結果決定放棄旅程，蝕讓咗個位俾人（總好過血本無歸！）。可能自己本來認真底，明明去exchange合格就夠，都係會唔放心走堂。加上我成功報名參加Innovation Weekend，一個只限瑞典西部學生參加嘅社會創新活動，有得去其他城市唔通唔見識下咩～
雪地睇極光幾時再去都可以（有錢有假嘅話），但以後未必有機會拎住學生名銜周圍試。而且我無帶單反，去到都係咩都影唔到㗎啦（史兄話架）。
喺阿拉伯市集幫襯food truck，結果肚痾咗幾日（但佢係幾好食㗎）。喺電車食到一半已經覺得唔對路唔敢再食，點知最後痛咗四日，每食一餐就痾一次，飯後半個鐘就嚟料。上網睇病徵似係急性腸胃炎，托賴嘅係我只有痾，無嘔無發燒無頭痛。
由於瑞典睇醫生有啲煩而且又無藥食，就算一個唔好彩要訓醫院都只會等痾無咩做到，倒不如留係屋企休息，飲多啲水、排多啲毒、同我嘅喇叭牌相依為命（兩個月食左半樽係咪有啲離譜…）。
獨自在外，最考驗嘅係求生智慧同照顧自己嘅能力。無人會幫你落街買藥，暖水袋都要自己煲定水、無得唔肯自己做飯。話俾家人聽都幫唔到手，只會令佢地擔心，所以就無專登同佢地講啦。呢個時候，我終於同張敬軒有相同感受，有病痛都話自己無事、一切安好。
唔計屋租機票，總共用左兩萬蚊啦。奧斯陸2300、倫敦3800、布拉格2000（未去），去親都係高消費地方，如果唔去旅行應該可以使少八千嘅。用嘅錢可能唔少，但如果我想喺香港有一樣嘅生活質素，應該會貴好多。我買文具、我食三文魚、我食火腿、我煮意粉會落好多cream，所以，承認自己唔係窮遊嘅材料啦。
不過呢個月以嚟，我慢慢掌握到買餸究竟要買幾多。呢句聽落好廢話，但自己一個住、喺香港唔使自己煮、呢邊仲要只係住五個月，要買到啱啱好嘅份量真係唔係易事，我連一磚牛油可以食幾耐都唔知呀。尤其瑞典嘅廢物分類分得好細緻，有幾多嘢最後食唔曬要放落compost就更加明顯。了解自己消耗食物嘅速度、浪費少啲食物，都係對環保同荷包出一分力。
不多不少剛剛好，正正係lagom嘅重心。
話說我整咗個budgeting excel俾自己，每日track住自己用幾多錢，數字控嘅我睇住個表好有滿足感。大家有興趣知多啲嗎？
交完take home exam，又搞掂一個course，two more to go.
其實呢堂係值得上嘅。今個課程講發展中國家嘅唔同發展狀況，提出咗好多我無諗過嘅見解，睇paper竟然覺得好有趣，覺得自己學到嘢而唔係純粹為考試地速讀。相比之下，平時我對貧窮國家嘅認識可能只係從鼓勵捐款嘅宣傳片度睇到，頂多只係做義工嘅時候講過兩句，好少由學術研究方向去認識。幾鐘意今個月上嘅堂，希望上個月上堂悶親嘅經歷只係唔好彩啦。
其實兩地好難公正地比較，我喺香港讀嘅多數都有標準答案，呢邊就讀development economy同entrepreneurship嘅課程，好多時係open end，注重你嘅個人見解。平時習慣練past paper睇正確答案，過去兩個take home exam都唔係好習慣。考試寫開短答案快狠準（通常唔識嘅時候先會長篇大論搏同情分），呢邊郁啲就要寫幾千字，我覺得佢考我作文功架多啲。加上上堂節數唔多，其實學生本身嘅見識同寫作能力比起有無專心上堂更加重要。同樣地，上堂學唔學到嘢同考試寫成點都唔一定有關係。
可能被瑞典人嘅獨立感染，無認識到好親密嘅朋友、依然無自己玩開嘅圈子。除咗無群體活動好似差咁啲嘢之外，仲有啲實際考量嘅：去廁所要拎曬啲貴重物品去、旅行無得同人share apartment、食飯無得叫多⼀碟黎試。雖然自己去旅行係自由好多，但有時都會想偷下懶，等人地帶自己周圍行下。
而且只根據自己喜好遊覽，難免因為個人偏好而錯過其他有趣嘅經驗。去景點又會太遊客mode；完全跟自己生活模式又可能太局限於某啲體驗，失卻當地嘅本真(authenticity)。其實作為旅客，本真(authenticity)又可能從旅行中實現到嗎？定係我地嘅出現就已經塑造緊新嘅本真？
就等我聽日去布拉格繼續唸呢個問題。
