粵譯柏拉圖 － 會飲篇 Symposium （一）
粵譯柏拉圖 － 會飲篇 Symposium （一 ）
背景：Apollodorus同一位朋友傾計，討論𡁵一段由Aristodemus度聽返嚟嘅對話。
[Apollodorus]
你問我就真係問啱人嘞。我住喺Phalerum嗰頭，前日我行𡁵去市鎮嗰陣，有位相識嘅朋友喺遠處望到我，見我愈行愈遠，就大叫一聲（有啲作狀咁）嗌住我：「喂！住Phalerum嗰個！喂，Apollodorus！等等啊！」
於是我停低稍等。
「Apollodorus，」佢同我講：「我搵咗你好耐喇。我想問你有關Agathon、Socrates、Alcibiades同其餘幾位約埋食晚飯嗰次。我想聽吓佢哋對「愛」發表咗咩高見。其實我都係從另一位人兄得知嘅，之前佢同Philippus個仔Phoenix傾過吓計，佢話你都知嗰餐飯入面發生過嘅事喎。但嗰位朋友自己就幫唔到咩手嘞，因為啲細節佢都唔太記得。你可唔可以講我聽你知嗰個版本？況且唔問你仲可以問邊個呢？你好似有份出席嗰餐飯㗎嘛，係咪？」
「你收埋啲風都幾錯㗎喎。你竟然會覺得餐飯係咁近期先發生，連我都出席到？」
「吓，我仲以為你都喺度㖭。」
「唔係卦，Glaucon，我點會喺度啊？Agathon仲喺雅典住嗰陣都係好耐之前嘅事啦。我同Socrates由相識到做朋友、直至而家到我習慣咗去留意佢嘅一言一行，都係講𡁵近三年嘅事咋嘛。之前我過𡁵雜亂無章嘅生活，做呢樣做嗰樣，以為自己好忙好多嘢做，但根本就係極其可悲 － 就好似你而家咁，總係想搵啲嘢做去迴避哲學思辯一樣。」
「哈哈哈，好好笑啊你。咁即係幾時發生唧 － 嗰餐晚飯？」
「嗰陣我哋仲係細路仔咋。當時Agathon贏咗悲劇創作大賽冠軍，第二日佢就同班合唱團搞咗場慶功宴。」
「哦，都真係好耐之前喇喎。咁邊個話你聽㗎？Socrates本人?」
「梗係唔係啦。我都係由另一位人兄聽返嚟咋，就係講畀Phoenix聽嗰位。佢叫Aristodemus，係Cydathenaeum人。佢身形細細粒咁，永遠都唔著鞋嘅。佢的確有份出席嗰場聚會。或者咁講，我諗佢舊時應該係Socrates嘅忠實擁躉之一。我都有問返Socrates關於Aristodemus所憶述嘅記錄，Socrates都同意佢所講嘅。」
「咁你一定要講我聽喇。趁住行去城鎮仲有段路程，我聽你講啦。」
就係咁，我哋一路行一路傾有關喺嗰餐飯入面所發生嘅事。上面我都解釋咗點解搵我傾呢件事係個幾好嘅選擇。不過點都好，每當我自己講起哲學，或者聽人講嗰陣都總係會眉飛色舞、無比愉快，但唔係因為我覺得佢對我有咩好處。其餘嗰啲對話，譬如同你傾嗰種 － 有關錢啊、公事啊嗰種，就總係悶到我抽筋。我哋雖然係朋友，但我都覺得你好可憐，因為你自以為邁向𡁵某啲目標，但其實根本就唔係咁。又或者你反而會覺得判斷錯誤嗰個係我，自己先至啱。不過我唔單單係「覺得」咁簡單㗎，我係好肯定你一定唔啱。
[Friend]
Apollodorus，識你咁耐，你真係一啲都冇變，出口每句都硬係要錐吓人哋錐吓自己嘅。我就覺得呢，你係睇所有人，甚至連自己，都係冇得救嘅。得一個人係例外唧，就係Socrates。我都唔明你邊度嚟「腍善」呢個花名，同你傾計一啲都唔覺腍善，成日都滿腔怒火咁，對人哋對自己都係咁，除咗對Socrates之外。
[Apollodorus]
如果呢個係我對自己同大家嘅諗法，咁或者我應該係癲咗嘞。或至少係錯咗啦我諗。
[Friend]
Apollodorus啊，唔好拗呢樣先啦。話我知喺Agathon個聚會入面究竟傾咗啲乜啦。
[Apollodorus]
嗱，段對話大概係咁…或者我由頭開始講會好啲，就好似Aristodemus講畀我知咁。
… 待續
我係嘗試意譯多於字與字對等咁譯。
原文：
https://ebooks.adelaide.edu.au/p/plato/p71sy/symposium.html
（我係以另一英譯本為基礎咁譯。）
