粵譯柏拉圖 － 會飲篇 Symposium （二）
(背景：Apollodorus覆述返Aristodemus喺宴會當中嘅所見所聞。)
==Aristodemus憶述當晚==
[Aristodemus]
我撞到Socrates，見佢衣冠楚楚，仲著埋鞋㖭（平時佢唔會咁做），於是就問佢打算去邊，為乜要著到咁隆重。
「我要去同Agathon食晚飯啊。噚晚我冇參加到第一場慶功宴，因為唔慣面對咁大棚人。但我話咗今晚會去。我著得咁靚都係因為Agathon成日都穿紅著綠，打扮到花枝招展咁。你呢？介唔介意冇收邀請但照去參加宴會？」
「你點話點好啦。」
「咁就嚟啦。唔好理嗰啲乜鬼諺語話：『尊者前往卑者嘅宴會總係不請自來。』不如索性改做『尊者前往Agathon宴會總係不請自來。』仲好啦，還掂詩人荷瑪佢仲衰過無視呢句，直頭反其道而行㖭。佢筆下嘅Agamemnon係位出色嘅戰士，而Menelaus只係一名草芥之輩。但係當Agamemnon獻祭於神、大排筵席嗰陣，荷瑪竟然安排Menelaus不請自來， 擺到明係講𡁵卑者走去參加尊者嘅宴會啦。」
「不過就住我呢個情況而言呢，我就覺得荷馬似乎講得啱過你嘞，Socrates。我呢啲係無名之輩走去同智者寫飯啊。如果你帶我去赴會，咁你最好諗定到時講乜好。我唔肯『不請自來』㗎，要去就當係你邀請我啦。」
「兩個總比一個好嘅。再諗吓到時講乜啦。好，行啦我哋。」
於是我哋就起行。但Socrates太沉醉喺自己思想裡面，於是行行吓就墮後咗。我本身都打算等埋佢一齊行，但佢叫我行住先。於是最後我就一個人去到Agathon屋企，見到道大門打開咗。老老實實，當時係有啲尷尬，因為一位家僕見我企喺門口，就帶咗我入去。入到去我見到大家啱啱坐低準備開席。Agathon見我入嚟，就即刻話：
「Aristodemus，你嚟得啱啱好，我哋差唔多準備開飯。希望你嚟本身都係打算參加場宴會啦。如果唔係就要等下一次嘞。我噚日諗住搵你問你㗎，但見你唔到。咦，做乜唔係同Socrates一齊嚟嘅？」
我擰轉身，Socrates影都唔見。於是我同大家解釋，話自己本來係同Socrates一齊嚟。或者咁講，唔係Socrates邀請嘅話，我根本都唔會出席呢場宴會。
「佢有邀請你實在係太好喇，但佢人喺邊呢？」
「頭先佢都仲喺我後面㗎。我同你一樣毫冇頭緒佢究竟去咗邊。」
Agathon吩咐身邊嘅一位奴僕：
「你可唔可以幫我去搵搵Socrates，然後叫佢過嚟？Aristodemus，不如你過去同Eryximachus坐吖。」
當其中一位奴僕正幫𡁵我洗身，等我可以坐低食飯，另一位奴僕就返到，話：「你吩咐我去搵嗰位Socrates盪吓盪吓去錯咗另一間屋，企咗喺人哋大門前。我有叫佢過嚟，但佢理都唔理。」
「咁奇怪。唔好停，繼續叫佢過嚟啦。」
但我出聲話：
「唔好喇，由佢啦。佢無時無刻、隨時隨地都係咁㗎。佢成日都會盪盪吓然後一碌木咁企喺處。我估佢大概唔會諗太耐嘅。唔好煩佢啦，由佢啦。
「好，既然你咁講，都係由得佢比較好。」佢轉身同奴僕講：「我哋準備開始飯㗎喇，你用你嘅方法上菜招待大家啦。冇人會吩咐你點上菜㗎喇，就好似平時我都唔會點樣吩咐你一樣。你當我哋個個都係你嘅賓客就得㗎喇。你盡量整餐好嘅畀我哋嘆啦。」
於是我哋開始食飯，但Socrates依然未見人。Agathon成日想派人出去搵佢，但都畀我阻止咗。到Socrates最後出現 － 其實對比起佢平時嚟講已經唔算耐，嗰陣餐飯已經食咗一大半。本身因為Agathon係最後一個坐低，所以得佢一個人坐喺自己張檯度。於是佢就話：「Socrates過嚟陪我坐啦。或者我可以吸收吓你頭先喺街外面所諗嘅嘢。你肯定搵到答案啦，如果唔係都唔會過嚟啦。」
Socrates坐低咗，然後就講：
「Agathon，如果思想可以靠觸碰吓就傳遞到，你話幾咁奇妙呢？我呢啲不學無術嘅人可以喺啲學富五車嘅人身上吸，就好似一個裝滿水嘅容器同一個空嘅容器中間只要放條繩就吸到水過去一樣。如果思想嘅本質係咁，咁我坐到喺你身邊就夠晒運喇，喺你身上過啲料過嚟都好啊。我嗰啲思想，講真就真係冇乜用嘞。虛無漂渺，好似夢一樣。你嗰啲就唔同呢。出類拔萃，仲可以有唔少精進嘅空間。你雖然後生，但你喺前日所表露嘅思想簡直係大放異彩啊。有三千多個希臘公民能夠作證㗎。」
「講呢啲，Socrates。有關思想嘅問題我哋遲啲再傾吖，到時再畀酒神Dionysus投個票啦，但而家最好食埋餐飯先。」
於是Socrates就坐低用膳，同大家一齊食。我哋奠酒祭神，放聲高歌，做平時會做嘅事。然後我哋就諗住飲吓酒。不過Pausanias講咗個提議：「大家，我哋點樣令自己冇咁辛苦好呢？經過咗噚晚，我都不得不承認自己攰嘞，實在要唞一唞、回一回氣。我估大家都係差唔多啦，因為噚晚大家都係喺度啫。點樣先可以飲得冇咁辛苦好呢？」
[Arisotphanes]
Pausanias，你講得啱。做咩都得，但我唔想再豪飲喇今晚。噚晚我已經飲到不省人事喇。
[Eryximachus]
你哋兩個都咁諗，真係好嘞。不過都要睇吓Agathon有幾想飲嘅。
[Agathon]
我又冇話好想嘅。
[Eryximachus]
對Aristodemus、Phaedrus同我嚟講真係行大運嘞今次，你哋班酒鬼竟然話唔飲酒，要唞返晚。我哋幾位真係飲唔得咁多啊。Socrates我就唔太擔心嘅，飲定唔飲佢都冇所謂㗎啦，所以佢都唔會點介意。不過點都好，既然大家唔想飲咁多酒，咁我都唔怕冒犯少少，講一講有關飲醉酒嘅事實啦。以我作為醫生嘅經驗，我好肯定飲醉酒一定係對你唔好。我自己就唔會飲到酩酊大醉嘅，亦唔提議大家咁做。如果大家而家仲有少少宿醉，咁我就更加提議大家飲少杯嘞。
[Phaedrus]
好，我平時都係聽開你建議嘅，特別係有關醫學嗰啲。我諗佢哋有常識都會聽嘅。
於是大家決定咗會飲酒，但要量力而為，而且唔係借呢個機會放肆狂飲。
[Eryximachus]
好，咁件事就咁決定啦，總知大家想飲幾多就飲幾多，但唔好迫酒勸酒嘞。既然搞掂呢件事，我又有另一個提議。我諗我哋唔需要呢位樂女喺度吹笛奏樂嘞。佢可以吹畀自己聽，又或者佢想嘅話，可以上去上面班女人嗰邊。不過我提議今晚大家一於主力暢談己見。題目我都諗埋㗎喇，大家有冇興趣聽聽？
大家都話想聽吓，所以叫佢講出嚟聽聽。
[Eryximachus]
好，呢個諗頭係由Euripides嘅Melanippe而嚟嘅。而且其實唔完全係我諗出嚟，係Phaedrus提出嘅。佢自己都幾著緊個題目㗎。佢話：
「Eryximachus，你唔覺得好奇怪㗎咩？點解其他神祇都有咁多詩歌去讚頌佢哋，但偏偏有關愛神(Eros)嘅就一首都冇？佢明明係最古老同最偉大嘅神啊。而且我哋都唔係缺詩人吖。另外，你諗吓嗰啲賢師，佢哋寫散文去記錄Heracles同其他英雄嘅事蹟。譬如Prodicus就寫得一手好散文。仲有，雖然大家未必覺得好出奇，但有日我見到本書，本書係出自一位名作家，入面竟然係一段讚美鹽嘅用處嘅頌詞。好多事物我哋都可以搵到有人去讚佢。但最神奇嘅係，雖然咁多人鍾意讚頌事物，但到咗今時今日，依然未有一個人走去頌讚嗰位最應該受到讚頌嘅愛神。愛神係位了不起嘅神啊，但就係完全被人忽視咗。」
我同Phaedrus所見略同，所以都會出一分力去幫佢。再者，今日呢個聚會正正就係一個好機會去讚頌神。所以如果大家同意嘅話，我哋可以用以下嘅時間高談闊論一下。我提議我哋逆時針咁輪流發聲，每人發表一篇言論，盡其所能去讚頌愛神。Phaedrus可以打頭陣先，因為佢坐喺尊席上，而且本身呢個都係佢嘅建議。
[Socrates]
Eryximachus，我諗冇人會反對你嘅。我自己就一定唔反對嘞，因為「愛」呢樣嘢係唯一一樣我尚且會話自己識少少嘅嘢。Agathon同Pauusania都唔會反對啦，Aristophanes就更加唔會㖭，因為佢成世人都淨係對酒神Dionysus同愛神Aphrodite有興趣嘛。老實講，我真心睇唔到邊個會反對。呢個安排對我哋呢啲坐末席嘅人有少少唔公平，不過如果你哋講先嗰班講得好，我哋就冇嘢需要擔心啦。Phaedrus，祝你好運。你開個頭先，發表一篇對愛神嘅讚頌啦。
大家都附和Socrates，一齊叫Phaedrus開始發言。Aristodemus唔完全記得晒每個人所講嘅一字一句，我都唔完全記得晒Aristodemus講畀我聽嘅嘢。不過我可以覆述返每位講者所講嘅重點，就係嗰啲最值得記低嘅內容。
於是，Phaedrus開始發言，佢所講嘅內容係咁－
… 待續
原文：
https://ebooks.adelaide.edu.au/p/plato/p71sy/symposium.html
（我係以另一英譯本為基礎咁譯。）
