街童本色

連日嚟睇到黃禍嘅成員不斷分享新歌《街童本色》嘅宣傳，終於都等到聽日就有新歌聽。話說上次喺「LMF XX Year Fest」大懶堂二十祭音樂會上，遇到擔任嘉賓嘅黃禍，知道佢哋正籌備緊新作品，已經好期待。近日黃禍放出宣傳，睇到歌名《街童本色》，引起唔少聯想 — — 先講明，我未聽過首歌 ，所以以下所講嘅，純粹我自己聯想，大家睇完，不妨又講吓你對「街童」有諗嘅法，一齊喺未聽新歌前，都講吓有咩想像！

《街童本色》MV 首播

「街童」呢個詞語既親切又陌生。八九十年代嘅時候，我喺新市鎮屋邨長大，自細就喺街上見到唔少街童。點解我會見到街童？因為我都喺條街度囉！以前啲細路，無嘢做就落街打波、踢波，一班人玩到攰咪喺街度坐，坐坐下無聊咪撩吓行過嘅人，可能識到啲friend，可能打場交，可能被差人查……不過嗰份自由自在，無拘無束，點諗到今日會咁缺乏！

而且，而家邊有街童呀！莫講話喺街撩人玩嘢，球場都少咗好多人。啲細路而家唔落街，全部都上晒網，打緊機。機童就可能有一大班。

但近呢年，我覺得「街童」返返嚟。有班細路，落咗去條街度，唔係打波，唔係踢波，唔係無聊，唔係喺度坐；一大班一齊行，嗌口號，唱歌，做佢哋認為啱嘅事，做我哋呢啲中佬唔敢做嘅事。最終，佢哋可能識到啲friend，可能打場交，可能被差人查，甚至被人捉，被人告……我諗我哋都見到呢班「街童」，點解我哋會見到？因為我哋都喺條街度囉！還願，我哋可以本色地，有尊嚴地生活落去！

我唔知黃禍班人以前係唔係街童，不過見佢地喺大街上拍MV，肯定係「街佬」！《街童本色》究竟講啲乜，大家聽日拭目以待，洗耳恭聽啦！