運動價值何在？

今次英國之行，十分之高興可以去到利物浦嘅球場朝聖，雖然我並唔係利物浦嘅fans，但係一場黎到世界級足球隊嘅主場，一定要抽時間到現場親身感受一下世界上最受歡迎嘅運動 – 足球嘅魔力。

記得喺行程入邊我哋深夜嘅時候坐火車到咗利物浦，一落車第一個感受就係呢個城市充滿着利物浦足球隊嘅周邊產物同埋靈魂，無論係周圍嘅建築抑或係街上行過嘅人，佢地身上都唔難搵到利物浦足球隊嘅影子。感覺到利物浦足球隊對於呢一個城市來講唔單只係一個運動，更加嘅係係一個精神寄托同身份認同。

住喺利物浦嘅呢一兩日，無論我哋行到邊度都會見到一啲關於利物浦足球隊嘅事物，然後我哋就不斷嘩嘩嘩咁樣感嘆點解利物浦嘅人可以咁開心有一支世界級嘅球隊坐落於喺呢一座城市。

反觀香港，細細個就聽人哋講香港係亞洲足球王國，我哋曾經出過唔少嘅猛將，但點解而家係香港無論係傑志、南華或者東方，唔好講話大家要認識每隊有咩球員，我相信可能你走去街上面問一啲路人佢哋可能呢幾對球隊嘅名都未聽過。嚟到利物浦呢一個足球城市，我不禁會諗到點解我哋香港唔可以有值得我哋自豪嘅足球球隊又或者運動嘅項目，究竟係香港嘅人才真係唔比其他地方嘅好？抑或係我哋對本地運動人才嘅培訓真係少之又少？

再去行呢個城市，你會發現當地除咗對運動發展有一條龍嘅配套之外，當地人對運動員嘅尊重同埋支持，正正係造就佢哋今時今日有呢個輝煌成績嘅原因。然後，你好容易會理解到點解香港今時今日嘅運動文化越嚟越差，對於一個講求速食商業價值嘅社會來講，運動文化唔值得發展，運動嘅速食產業先至係王道，運動對於社會發展來講只係商業價值嘅一環，喺香港運動主要係用嚟搵錢、維持健康同埋消磨時間，缺乏左運動去到最極致嘅時候，其實係反映咗人文嘅精神。

我諗香港如果要真係好似利物浦一樣，相信除咗係配套同埋資源嘅配合下，更加要改變嘅係社會大眾同埋政府對運動嘅價值有更深入嘅反思。