玩槍情意結

唔知大家喺JC以外,會唔會其他喜好?我嘅話其中一樣係玩玩具氣槍。

講起玩槍呢件事,都係由細個開始玩起。嗰陣喺大陸玩,印象已經好含糊,只係用真鐵槍射靶,到後來有次去美國Las Vegas做嘢,之後留底玩幾日,其中一個節目就係去當地靶場玩槍,無論喺電影常見嘅M9系列,抑或特種部隊常用的SCAR L,都一一俱全。

到返香港後,由喺舊同事上收到本地公司CA嘅HK53電槍,到之後買第一把手槍Tokyo Marui (下稱馬記) P226,甚至之後嘅長短槍,多數都用返馬記。

點解自己主力用馬記槍多?好打得嚟又耐用,最啱我呢類怕整嘢執餐懵嘅人囉。當然你問我玩咗Wargame差唔多四年,係咪真係唔識執,又唔係喎,但係馬記嘢嚟講係好耐用,至少我手上擁有嘅四枝馬記手槍同長槍嚟講,除咗P226同埋MP7都係有壞先至去相熟氣槍師傅維修外,基本上都係非常健康。

暫時到而家為止最滿意都係M4 CQBR GBB,本身用氣動而放棄馬記喺長槍最擅長嘅電動,原裝買返嚟射程唔錯而且到而家無乜奇難雜症,基本上都好滿意。

自己第一枝真係用嘅長槍係P90 High Cycle。因日本法規所限,只容許1J或以下玩具槍,而馬記透過特製齒輪達成,結果令枝槍只有0.6J,喺室外遠遠唔夠2J以下嘅槍嚟。偏偏本身發射嗰陣較一般電槍寧靜,加上玩具用Silencer後,用喺空間有限嘅室內場合靜靜地打倒幾個對手都唔錯。

唔知大家仲有無其他喜好分享?不妨一齊分享下!