口考了後
Published in
Jul 17, 2024
我是自我安慰的天才。交創作畢業的台語小說予呂美親先生佮何信翰先生了後。預著大概in會講台語傷爛，美親先生委婉講：「台語基底無chāi。」（這就是台語好的人講話）。伊講我講甲真好，但是寫就怪怪，予人讀甲蓋無順，無夠文言嘛無夠口語，我文學創作的優點全破壞去了了。揀的詞真無合軀，語感有問題。
In講我需要人共我改稿，這黜著我的疼。寫台語創作上慘的就是揣無人看，人若看著台文就袂癮讀，愛揣著一个有文學佮台文底的人無簡單。美親先生共我牽成揣人改稿，拄好伊有一个學生是阮同學。
進前聽著一个無好的意見，某一个評審先生要求我愛有台文稿嘛愛有華文稿。伊講干焦台文稿無人看有。進前想講直接寫台文真慢，無這改就在先寫華文了後才寫台文，但是按呢台文會予華文牽去。口考的先生講直接用台文寫，袂曉寫的詞就用解釋的方式踅過去，無就是換一个較簡單的詞表達，了後才去請教。這改口考予我學著台語文學終其尾是欲服務台語人，按怎攏愛用台語做主才是。
先生in話確實是講甲真沉重。阮指導先生共我講真濟好話，哇我蓋佩服，爛台文嘛會當講是有未來相照對的歷史價值。真感心詹閔旭先生一路共我指導，予我口考順利通過。
開錢揣人潤稿，看人按怎共我改kah加讀，我的語感就有救啊！以早我檢采是傷看輕台文寫作，叫是用華文的底就夠用，猶是讀甲無夠濟無夠透。先生in的建議解決我這幾若年台語寫作的大困難。這改口考予我真大的幫贊。我想開錢請人潤稿，練台語基底算是一層「簡單」的代誌，比並跨性別檢采一世人攏袂當認同家己的肉體佮心理的性別，比並戀童癖永遠揣袂著一个合法閣永遠袂大漢的對象。按呢想我就會當安慰家己繼續做落去。
