口考
我非常驚惶明仔載早時10點的口考袂記去。
對昨暝就睏無熟，驚睏過頭。我毋知六月按怎完成《查某膣》的其中一篇〈石磯仔就該佇熱人時叫〉三萬四千字，華文寫好閣翻做台文。後來我學著對一般人來講台文全漢上好讀，羅馬字對一般人來講親像啥物妖魔鬼怪讀無啦，蓋阻礙閱讀理解，親像行路雄雄挵著壁，讀甲誠艱難。莫怪現今主流台文出版品攏全漢。台文圈上愛的漢羅對一般人來講太難。所以我這篇用全漢來寫。進前直接用台文來寫，要求正確台語用法定拍斷劇情想像，這改才用日本時代台灣跨語作家的翻譯寫法。講來悲哀，好不容易，台灣人我口寫我手，到我這緣是母話斷絕。
《查某膣》是女性慾望主體的情色小說。所有的關係攏是無平等的，百面有一方掌握某一種的優勢，也久敢一方經濟面有優勢，一方佇感情上有優勢，一方性方面有優勢。優勢嘛毋是絕對袂變化做長期霸權。雙方佇關係中的進退有張力。關係比喻做跳舞真合軀。
論性暴力的時，時常忽視女性佇經濟面制度面的弱勢，受害女性是縛牢袂離身，但是大眾時常怪做是女方無自救，做賤受害。性暴力是一種單方面的迫害。溫純服從是社會期待的女性特質，造成女性不如規氣予拍死。
另外一方面父權用嚴格標準共女性的性束縛，造成性受害者定煩惱家己無符合縛「完美受害者」。身為一个女性就有有誘惑查埔人人強姦的嫌疑，不如莫講。唯一完美的受害者，就是受著性傷害了後去自殺，才有通成做「聖女」，也就是完美、絕對純潔的受害者。這背後的思想非常厭女，會當講是無合父權標準的女性攏應當去死死好。
我欲寫的是活落來的查某人，對創傷重生的經歷。我有注意著世間寫性傷害的作品定避免寫著性愉，若親像有性快樂就是嬈體。性做為本能，本底就有鼓勵生慾的功效，性會受著傷害，嘛有爽甲欲反去的暢樂。向望予世間有多元的角度看待女性的的性。
其中咧寫性的自願下真濟工夫。自願承接佮強迫忍受之間的精差，彼界線不離仔不明，親像是虐待煞是獎勵，抑是若侮辱煞有甜蜜，到誠實過界線著傷。佇寫的時陣我非常斟酌咧思考，關係，這項溢來溢去，講袂定的物件。
性的頂點進入無我，主體消失的狀態。女性予人被動的印象，就完全否認女性佇性佮自我方面的主體佮存在，看袂著身內的下軀，嘛會勼會跳會咬。
佇趕稿的時，誠實是目睭擘金就寫，寫忝食飯，忝甲欲死去睏。無啥物交合。七月一下閒，人真慾骨。我真佩服阮伴行八年，猶直直有新的齣頭。連紲幾若工做甲無暝無日，拄交往的時嘛無遐爾暢樂。檢采這就是禁慾的快活。
