3尾兔仔：我欲去，提你ê錢來分逐家

愛開足大ê氣力按耐性地，才有通平靜心情去寫論文。我確實m̄是研究ê料，寫評論有使性地ê空間，寫論文愛理性愛證據（張小虹彼款氣魄寫是奇才），寫kah人焦燥。

下晡心情無啥平靜，敢若一隻猴，為tio̍h莫寫論文，叫我做寫lóng願意。（kan-na修一个研討會論文討一个畢業資格就無甘願kah，好佳哉有通揀創作畢業，無研究所讀bē soah）收tio̍h中興湖小說入圍，親像亂跳ê心情就是等這。

看《讓子彈飛》片頭用馬搝ê火車頭，走tī鐵枝路，白hun m̄-sī蒸汽是火鍋phuh-hun非常魔幻，到片尾猶是仝款奢颺ê馬搝ê火車頭，官猶是官，韭菜猶是韭菜，無啥改變。做半套ê現代化。回想日本時代宣傳影片，烏頭火車誠實leh走。白合花〈早知莫投胎〉leh唱：「我欲去提你的錢來分逐家」，見擺聽mā想無按怎提你ê錢，原來這是左派重新分配資源ê概念，提黃四郎ê錢來分逐家。