3尾兔仔:7/23
伴講歌詞真正面光明,副歌leh唱:「我相信明天會更好/祝你愉快 這裡留白」,伊問:「Siáng唱的?」我講:「盧凱彤,伊自殺矣。」八月初五是伊的忌日。有三个人對我來講非常重要,邱妙津、Anthony Bourdain、盧凱彤,我定定想in,in單獨tī熱人時過身。
///
佇梓冊房看著李佳穎的新小說《進烤箱的好日子》,迷惑一下敢是彼咧李佳穎,連鞭想著〈全世界的李佳穎,起來!〉。經過16年,伊的小說出現台文正字,哇時代咧進步。〈上台〉予我笑甲欲反過去,到這馬婚禮嘛是「早生貴子」親像咱人這生的目的若豬公佮豬母。
我想著家己寫作的起頭,學邱妙津寫日記,描述上佮意的人佮我發生的代誌,重複做過的動作,寫作親像用描圖紙共生活仿出來。彼是上原型的寫作,回憶了後記持開始出現重點。
冊面寫甲真「驚彩」我叫是會若〈熱可可與礦泉水〉遐驚人,Plath共頭囥入烘爐自殺,頭拄仔讀我叫是會爆炸火燒頭。實際上親像電影版本《挪威森林》Kizuki平靜的死法,以改編文學電影《挪威森林》來講翕甲蓋無好,只是共劇情照翻無共意義消化好。Kizuki自殺彼段我認為是上好的所在,一般影視真少會共按怎「自殺」的過程詳細翕出來。結果《進烤箱的好日子》關係的是「寫作」本身。李佳穎的母題描述,台語講敘情。
///
揣Plath的資料的時,有人刁工佇文尾囥「入巷路」的示意圖(敢若蘋果動畫新聞咧)害我煞著強欲吐出來,又閣吐袂出物件,感覺真thái-ko,飫飫。過幾若工我讀著「飼料兔」,害我又閣欲吐。今仔日讀著「放粉鳥」,連鞭閣欲吐。動保團體連署禁止放粉鳥,這是足殘忍的行為,向望有通阻擋。粉鳥慣勢轉來厝,利用這个特性跋筊,輸去的粉鳥轉來厝無效,浪費飼料錢,所以飼粉鳥的人會共𪜶翼仔拗斷亂擲。粉鳥就算斷翼仔嘛欲轉去這是𪜶的天性。苦毒佮惡意害我反胃。〈車廂裡的色情狂〉主角讀三民主義就吐,大概是對假仙過敏,李佳穎的小說真神奇,讀過就記牢牢。