3尾兔仔：8／3（晏）
1.我欲去一个這世人料想袂著會去的國家。佇木星雙子ê這年，連我這種散kah鬼mā boăi的人，竟然有人有國科會補助我去新加坡發表論文。自高中家己辦護照留學，到今拄好十年，護照欲過期，順紲換台語名。強烈推薦台語人攏愛去換台語名來表達家己。有國家語言法咱有權力用母語用族語叫家己ê名字。溫又柔ê小說定有多語ê拼音，名字用無仝ê寫法親像就無仝人，伊ê小說有真迷人ê氛圍kap角色。〈好來好去歌〉開頭寫廟會ê聲音佮氣氛媠甲無地講。彼純愛故事是伊全部故事中我上佮意 — ê。
萬宗綸ê《安娣，給我一份摻摻！ 透視進擊的小國 新加坡》佮吳易叡ê《赤道上的極地: 新加坡微民族誌》是兩位台灣人寫ê冊，兩个身份拄好相反，萬去讀碩士，吳易叡去做教授，相仝的是新加坡tùi自由ê台灣人來講傷翕，天氣佮言論氛圍攏是。大政府凡勢用罰用賞，反倒頭人民永遠毋是新加坡ê主人。新加坡人認知幸福懸，但是情感幸福盡低是一个蓋趣味ê現象。
閣有讀張優遠ê《不平等的樣貌：新加坡繁榮神話背後，社會底層的悲歌》，我真熟似散食，我較意外的是伊寫散食人ê爸母真注重囡仔敢有快樂，真濟媽媽無去上班詞顧慮囡仔無人陪。原來囡仔ê心情爸母有leh關心喔。台語講：「做牛著拖，做人著磨。」我叫是凡事攏愛吞忍才是，哇原來囡仔ê人權有進步。
亞非言ê《馬來素描》koh是另外一款罕得看tio̍h ê新加坡。台灣掠準新加坡是華人ê進步國家，讀新加坡歷史我才知，hia本底是馬來人ê地，英國殖民大量ê華人移民才變做hia ê多數。新加坡ê國歌是馬來語，國語是馬來語，尊存馬來人是本地人，但是實際上走精去。
若毋是為研討會去新加坡，我大概袂主動讀佮新加坡有關係ê冊。新加坡人教授考過阮一个足難ê問題，請講出一个你知影ê新加坡作家？
2. 8／3去看歌仔戲弄藝坊ê《烽花情緣》，規工佇外口袂赴發文。弄藝坊是大墩文化中心ê台語研習班。《烽花情緣》是大戲真濟武場。頂一擺看𪜶的《龍鳳呈祥》較娛樂。主要是為著演員李學君去看。伊足有魅力，看過伊搬戲無迷mā難。佮歌仔戲迷大姊阿媽leh愛陳亞蘭的心情真成，我知，有夠緣投。學君leh出招轉se̍hê時，衫仔隨風飛，有氣勢。有一寡學員是長衫勾著跤手看現現，無比較無傷心，學君一下出場就無仝。伊送秋波ê時，我mā戀愛a！！！
