Pong ê

讀tio̍h siăn-pái ê動物伴過身ê文，ná讀ná哭。
我飼兔仔是照冊飼。照《兔兔的老年生活規劃》愛提早準備兔仔ê後事，莫等到兔仔緊欲曲去才用，到彼時傷心koh無閒。我開始揣台中ê動物火化，想tio̍h Pong有一工會走就哭kah看bē清。

阮阿叔仔講飼動物無效早死，論真講厝內人死去我lóng無啥想法，生做家人soah無緣，但是動物伴是家己揀ê家人。

進前抽Tarot知影Pong put-lí-á滿意我tùi伊ê照顧（伊ê籠仔是兔仔界名牌SANKO，飼料補品mā用好牌仔，koh有定期予醫生做身體檢查，再koh加上我逐工骨力照顧摒掃，我認為伊上少算是兔仔界ê中產階級。我本人tī社會ê階級較輸伊）

Pong ê全名是楊資崩，愈叫愈貧惰chhun Pong。感覺tio̍h Pong ê聖母光，有時陣喝伊聖母瑪莉楊．觀世音菩薩．資pong．young。

我一直lóng想欲飼兔仔，但是驚顧bē好。蹛ê公寓室友lóng有飼貓仔，in無閒ê時我lóng會鬥顧，甚至看病有幾改mā我chhōa去，有一个前室友傷無閒，飼伊ê貓仔飼kah袂輸我ê貓仔。算算leh我有照顧貓仔3年ê經驗，連受傷換藥，戴頭套lóng會曉。前室友搬厝了後我非常痛苦，我認為伊顧kah無kài好，但是貓仔毋是我ê，bē-tàng插手，予我下決心定tio̍h愛有家己ê動物伴。

拄好阮兜附近就有兔兔窩，hia有花園予兔仔耍，mā有做餐廳予人chia̍h-si̍t，koh有買兔仔ê用品，中途兔仔kap做兔仔旅館。頭一擺去hia 就看tio̍h Pong ê籠仔貼領養。Pong是蹛蹛leh變棄養kài可憐。本底想講koh準備一下，但是想tio̍h可憐古錐ê Pong，離開兔兔窩了後koh轉去一擺留資料欲領養。

Pong ê前主人chín無責任，直直無願意出面簽棄養同意書，加拖一個月才chhōa Pong轉來。等待一個月，失落kap希望交錯，Pong ê前主人總是口頭答應然後放粉鳥失聯。

講tio̍h兔仔ê時兔兔窩主人定定講愛，有愛就會顧。Pong ê前主人頭拄仔有愛伊，有予伊去侏儸紀兔仔專科病院閹掉。伊有留存病歷，予我chhōa去檢查ê時有通知伊身體狀況，koh再感謝侏儸紀院長朱哲助獸醫師細膩看顧阮兜 Pong — ê。Pong ê病歷最後一擺予醫生看是3年前，代表了後Pong就沓沓á無予人疼。

有真濟人飼兔仔會感覺無聊就kā伊送走ia̍h-sī擲掉。兔仔mā有愛mā會sai-nai，需要幼路觀察，kap沓沓仔培養感情，無成貓仔hia緊人lóng好。聽講畢業季熱天愛兔協會會收tio̍h兔仔ê大月。兔仔無成貓仔情緒看明明，koh愛洗籠仔確實較費氣。毋過有幾仔个大優點。

第一，伊食素環保，我足驚臭臊味。伊放屎無啥味，貓仔我鼻tio̍h會吐愛禁氣處理。對鼻覺敏感ê人來講兔仔kài讚。民間傳飼兔仔臭，以早飼兔仔是做經濟動物，幾千幾百隻屎尿無清當然臭。主人有骨力摒掃就兔仔清氣芳芳。第二兔仔恬無聲袂叫。我耳仔敏感袂堪吵。雖罔兔仔會拍、咬物件kho͘我來。已經較貓仔niau袂soah好真濟。第三阮兜兔仔袂亂咬人，貓仔傷爽會亂咬，進前手定有空喙。阮兜Pong ê爽快會磨喙齒。

最後講一个，Pong chín佮意翕相，伊誠愛看鏡頭，若聽tio̍h兔友呵咾伊古錐伊爽kah。伊koh有翕相ê美人角度，七歲ê Pong心內是妖嬌少女。
自病歷知Pong 5月底生是雙子座，祝伊健康平安快樂媠teng-tang ❤️❤️❤️❤️❤️❤️❤️