《以太逆襲》：V神上位傳奇

嚴格黎講《以太逆襲》嘅主角唔係V神Vitalik Buterin咁簡單，而係佢同一班Cyberpunk，點樣為住理想組成團隊，由一無所有去到成功建立加密貨幣烏托邦嘅故事。

一本人物傳記好睇嘅要基於兩大元素，一係擁有大量訪談紀錄做Backup，從唔同角度描寫主角嘅心路歷程、光明同陰暗面，而唔會流於片面嘅歌功頌德；二係敘述過程入面作者有好好舖排複雜嘅人際關係，主角同身邊戰友嘅成長歷程同遇到嘅挑戰，而《以太逆襲》兩樣都寫得非常好。

書入面由比特幣開啟區塊鏈世界發展大門，去到V神撰寫以太坊白皮書塑造佢心目中理想嘅Crypto形式：一種功能有限、開發潛力卻無限嘅「燃料式Token」，再去到各方有志之士組合成以太坊基金會，再去到因為各種人事鬥爭同利益衝突導致幾近分崩離析；再去到招攬新成員重新上路迎接以太坊誕生同成功，然後又面對The Stake DAO帶黎嘅第一波幾乎沒頂嘅駭客事件……

《以太逆襲》好聰明咁避開咗艱澀無趣嘅區塊鏈技術內容，而係集中講Vitalik Buterin本身作為一個低調、甚至不擅交際嘅Tech Geek，點樣響艱難嘅時刻作出決擇，淘汰一啲親密但已唔能夠如時並進嘅戰友，甚至違背自己過去堅持嘅去中心化原則發動更分叉，只為保住有待發展嘅萌芽──假若你亦曾經有同過一啲志同道合嘅同志組隊，為某種理想而努力過（包括由Online Game組隊去到工作上完成大Project），都一定會深同感受。

當然假如你對以太坊同加密貨幣都無乜認識的話，《以太逆襲》其實亦會用一個體貼外行人嘅角度解釋佢同比特幣嘅分別，為何會響一眾競爭Crypto之中脫穎而出，以及佢同美國金融監管機構嘅最大爭議：究竟以太坊算係一種證券、定係一種「燃料」。讀完呢本書後雖然你未必會成為一個以太坊專家，但至少比起仲以為比特幣同以太幣係差唔多嘢嘅人，會多一重認識。

《以太逆襲》本身情節寫得非常流暢，亦不避諱提出多個批評以太坊基金會過於獨裁、欠透明嘅質疑，呢位年輕美女作者用筆之精彩，令我諗起另一個非常欣賞、著有《Flash Boys》、《The Big Short》、《The Undoing Project》嘅作家Michael Lewis。作者Camila Russo本身就係一名美女，唔知對佢周旋響一眾IT狗之間會唔會有種取材優勢……BTW聽聞《以太逆襲》已宣佈開拍電影版，同時亦將推出同概念NFT，非常期待佢響大銀幕、Opensea出現時會係一個咩樣子。