我點解會學法文
其實好奇怪,喺香港生存,基本上識粵語英文同國語都已經搞掂。但係我就零零舍舍喺22歲嗰陣走咗去學法文。
至於點解學法文喎,咁其實都有幾個原因嘅。
第一個原因,係咁啱。
嗰陣我asso畢業冇書讀,然後咁啱我有一日行沙田,就喺火車站扶手電梯嗰度見到廣告,係講法國文化協會嘅沙田中心新開張,歡迎大家過去上堂咁話。
咁講到咁開心,我又想學下嘢。同屋企人傾好之後就係攞住$2500港紙去報名兼買法文堂本書。(當年22歲冇乜點見過世面,攞住五張大牛都已經覺得揸住好大筆錢,好鬼驚)
就係咁啱得咁橋,我就開始咗學法文,間中有事停咗幾期,原來我都學咗五年喇。然後每期報名,我都係去沙田搞。因為一嚟我同沙田班職員熟D,二嚟我始終都係鐘意沙田嗰度,感覺俾我係舒服D。
第二個原因,係我想振作自己。
呢個時候正正就係我冇書讀嘅時期。
嗰陣,好多同學都覺得我讀書好叻(CGPA 3.2,喺associate of arts嚟講講真唔係高),冇U收返係好神奇。然後,我就覺得冇U入,咁不如去進修下,學多D其他嘢,等我報大學嗰陣可以俾人睇到我都有努力學多D嘢等我真係夠quali讀大學㗎。(當然呢一年報咗都冇人收,嗰陣先決定搵工做嘢)
雖然喺班asso同學入面已經有少少樣衰,但係都唔好樣衰到咩都唔做呀。姑且咪當呢個係學新嘢嘅機會囉,反正咁得閒。
呢件事,最緊要係振作自己,人哋讀緊U,我自己都進修緊。