點解英文練習悶之餘仲完全無用

睇睇官校嘅英文練習, 同我嘅解決辦法

是但 Facebook Marketplace cap 圖一幅, 如與文內任何嘢有關, 實屬巧合, 敬請留意。

本文分三部分, 第二同第三分別係八卦以及較有建設性部分, 歡迎即刻碌到底, 跳過淨係我覺得有趣嘅技術文。

上年做冬嘅時候，姨媽喊晒口話佢個女唔明 passive voice題目點做, 叫我睇睇。我話，吓，你個女係校園精英，得閒就攞下獎，仲要問我嘢?

第二日，我見識咗姨媽成個校本練習試題練習庫, 大部分題目如下:

黑色係問題答案，紅色係答案。 為免自爆，題目字眼已改頭換面，但意思相同

姨媽緊張地問:「間住嗰啲嘢需唔需要? 點解老師一時話要, 一時又話唔駛嘅?」
「by doer 個 phrase 係 optional 架。」
「吓，咁即係幾時要加 by doer, 幾時唔使呀? 我都係唔明🙈」

放心啦姨媽，填唔填 by doer，只要轉啱樣，都係會滿分架。你唔明係因為份練習出得差，搞到老師都改得奇怪。 試卷呢 part 你個女就算滿分，都只係代表佢 1) 識跟規矩轉樣同埋 2) 識得串字，唔代表你個女識個 passive voice 架。

吓，細個學校啲英文練習都係咁一句句架啦，有咩問題?

1) 淨係操到啱 (accuracy), 無教要幾時用。

英文係一套嘢嚟，教 passive voice 教得好嘅話，應該話埋俾你知佢係 active voice 嘅另一個 option 嚟，喺咩時候要用 passive voice, 咩時候要用 active voice。

個 by phrase 可以唔要嘅原因係，用得 passive voice 通常都係想收埋個 doer。點解?

-係人都知 doer 係邊個。例:
“The interview will be held in 3/2/2020. More details will be sent later on.”
如果呢句喺封大學收你嘅 email 出現，唔通仲要話埋你知係邊個 professor 同你面試，邊個 staff send 嘢俾你咩。