法文數字數到喊
我最多識數到999 999 999 999㗎咋
Published in
12 min readMar 24, 2019
每一種語言都係一種文化嘅象徵，而每一個文化對數字都有唔同嘅理解。然後，呢種理解就會反映喺佢哋嘅語言上面。
所以，如果你想知道你嘅母語同你想學嘅語言文化上有幾大差別呢，你可以睇下大家D數字點叫嘅。
係㗎，睇完上面呢幅圖，我相信都可以反映到我哋漢語人學呢D外語可以有幾頭痛。
既然呢篇講數字嘅，我呢次決定完全唔標數字嘅讀音，敬請留意。嗱，我哋而家都好清楚現今社會主要都係用十進制嘅。不過大家都要知道，越常用嘅字越少改變。咁講嘅話，每種語言頭幾多個數字係一個名，後面嘅所有數字都係跟規律嘅，會唔會表示到嗰種語言以前（或者係而家都好常用）嘅進位制就係幾多呢？
不過唔理咁多住，我哋睇咗1–10先。
呢個表入面，中文同英文都係做reference嘅啫。
你都應該會見到6英法文係一樣㗎喇；4、7同10就係D英文prefix見到嘅差唔多樣；老實講，2係差唔多讀音嘅。
1係比較麻煩嗰個，佢要跟住後面嘅嘢嚟分陰陽性。例如一張櫈une chaise（陰性）、一張梳化un sofa/un canapé（陽性）。
不過講真嗰句，記多幾個數字使死咩？記咗佢吧喇。
跟住就會講到，再大D嘅數字係點嚟嘅。
其實數字一路大上去呢，都只會係一堆加減乘除嚟嘅。好好彩，中英法文都只係會用加數同埋乘數。
跟住個問題係英文嘅問題：其實十幾都係用-teen收尾，即係teen有+10嘅意思喇，咁點解11同12唔係oneteen同twoteen呢？
