半桶水語言之旅
七種語言、三個係beginner level、仲有個bb班level
正值Language Megazine一年之際，我又講返自己嘅學語言之旅，配合返九月份嘅主題。（註：拖下拖下就十月…）
我實在係貪玩，鍾意短時間內了解事物原理、規則，所以好享受初學時容易上手嘅快感，上完堂唔溫書都可以繼續落去。不過照自己經驗黎講，學咗兩個course之後就到左瓶頸，淨係靠上堂聽書係唔夠用，要搵下其他資源接觸多啲。但自己又多興趣，無專心學好一樣，衰啲講就係咩都想學但又學得唔專嘅人。
- 廣東話
- 英文
- 普通話
- 日文
- 西班牙文
- 阿拉伯文
- 瑞典文
以下七個語言嘅簡述，先後順序將由接觸時序為準。
廣英普都係由細學起，都係咁啦。不過屋企對面就係公共圖書館，幼稚園同小學嘅family day就係落街睇書，坐完幾個鐘再將一家四個人嘅借書quota碌爆曬，一齊抬啲書同雜誌返屋企。再加上小學做Libarian係有優先借新書嘅特權，所以《老鼠記者》、《神奇樹屋》、《xxxx歷險記》（超大本漫畫）同《兒童的科學》我都差不多睇曬成個系列。
無獎問答：有無人知一個人同時最多可以借幾多書/雜誌/多媒體？
日文
CUSCS青年日語暑期班，第一日語課程（斷斷續續咁讀過一年幾）
大家都當日本係鄉下，就算我唔講，大家都大約知道日本有咩咁引人入勝。但除咗文具同鬆弛熊之外，我其實對日本文化無特別喜好。唔追日劇、唔聽Jpop、唔睇動漫、唔打機、唔追日星，係連上通識堂《日本流行文化》都搵唔到主題寫Paper嘅地步。（ 無神論者的巴別塔 唔好意思啦～）
er…其實我到而家都講唔出想學日文嘅原因。
阿拉伯文
暴大語言班，一個B+一個C+嗚嗚。。。為左興趣無曬gpa。。。
喺暴大入面，呢一科都算係好偏門，Arabic 1每班十五人都開唔到兩班，Arabic 2更加係隔兩年先儲夠人開班。拎日文嚟做對比，New Practical Japanese 1開十九班都幾乎全部爆滿。
雖然話阿拉伯文係世界上使用人數頭幾嘅語言，但你學完都無咩機會可以同阿拉伯國家嘅人溝通到。唔同國家方言太多，用詞同grammar都會好唔同，所以喺香港讀呢科，真係同興趣班無咩分別。
學呢個語言真係純粹貪得意，我覺得阿拉伯國家嗰邊完全無認識，好似好神秘咁。而且喺暴大，讀外語多數會被人屈grade（N1N2去讀日文一大有人在），但阿拉伯文就無咩人本身識講，一齊由零開始學。
阿拉伯文難度在於，正式文件係唔會標vowel，所以你要記得邊幾個consonants合埋一齊係一個字，再記埋個字應該點樣讀。日文就算唔知點解，至少都可以成句讀出嚟再估下佢講咩，但（對我嚟講）阿拉伯文生字就只有死背。
可能係物有類聚，我身邊竟然有兩個非暴大朋友比我學得更深入。一個喺香港讀書，自己搵出面嘅班讀；另一個喺內地讀歷史，喺校內讀咗幾年。呢啲先真正癲佬。
西班牙文
無上過堂，哥斯達黎加生活五星期
我接觸到嘅Spanish只限於日常生活用詞。Year 1嘅時候盲中中走去哥斯達黎加話要做義工，但自己連一句西班牙話都唔識，結果嗰一個月係我學嘢多啲。Canteen出現過嘅食物我都識、數一到十都可以。
相反，從歐洲黎嘅義工有唔少都識講西班牙文，我都幾羨慕佢哋由中學就開始讀英文外嘅第三語言（多數法、西文），就算大咗想去其他國家做嘢都容易啲。
但呢一個月，我嘅英文同普通話反而進步咗好多，對於Hong Kong and China are different嘅概念都明確咗好多，正正因為其他人不停懷疑呢樣嘢而我要澄清返。
如果他日真係要去參觀咖啡田，學西班牙文走唔甩呀🚬
瑞典文
瑞典生活五個月、學校免費語言班、Udemy免費video course、Duolingo
去exchange學習當地語言是常識吧。
其實我本來已經因為（聽講）瑞典人比較願意講英文而無去德國交流，不過我到埗先發現當地嘅路牌、超市價錢牌、電車等都只有瑞典文，無英文。的確，居民嘅英文語言能力係好好，但文字上就比較少「瑞英對照」嘅指示，令喺香港習慣中英對照嘅我有啲驚訝。
瑞典文係相對學得輕鬆嘅一個。文法上，佢同英文有啲相似，而且好多詞彙都有類似串法，記咗就可以砌黎用，又或者將每個字直譯返做英文就get到八成。
相比起以前學語言主要以課堂為主，我睇Udemy video course反而學得仲快。每段幾分鐘，可以下載之後帶出街睇，煮飯、搭電車、食早餐甚至去廁所（？）都可以睇下幫補下。
大部分名詞、動詞都有男女性之分，但如果只係為咗理解文章內容、唔會作文，咁就唔識都無咩大影響～
而且佢哋嘅詞彙同其他歐洲語言都有啲似，所以去附近旅行都有幫助～
例子：mead（蜜糖酒）、spela（玩）、ost（芝士）
雖然樣樣都知少少都會有滿足感，不過都唔可以停留喺呢一步，要繼續學落去，希望可以衝破「學到咁上下就想學其他嘢」嘅瓶頸。嚟緊我報左十二月嘅N4考試，希望俾啲deadline自己，逼下自己繼續學習。
唔知大家又有無咩學習目標呢？
