La vendeta del governo che paghen i barber

Gh’havevi una quaj speranza (con la minuscola) in del governo Draghi, ma ‘l so prim DPCM el m’ha confermad che, voramai, in quell Pajes chi, se vun el voeur lavorà, a gh’è domà Speranza (con la maiuscola) a fermàll.

De fat, in del noeuv DPCM, a gh’è la sarradura di perucher e di barber in zona rossa, che podeven però restà vert fina a prima.

Ciarament, desgià che in Italia i dacc in sul Covid a inn tratad cont un secret compagn de quell di archivi de la Stasi, l’è impossibel savè se ‘l gh’è stad un boom di cas de Coronavirus in di barbierie.

Ma a l’è improbabel e l’è pussee probabel che la sibia… tuta politega.

De fat, in di zone rosse a l’era vietad per i estetista de tegnì vert, ma el Tribunal Ministrativ Regional l’ha did che l’è no legal e che, se inn vert i perucher e i barber, gh’hann de stà vert anca i estetista.

I reson del governo per tegnìj sarrad, in pratega, a seren una version in carta bollada de “a gh’è una pandemia e violter pensee a fàv la scireta”: pussee etega che scienza.

E donca, desgià ch’hann perdud in Tribunal, adess castighen perucher e barber che gh’havarann de restà senza daner perchè, per el governa, i so considerazzion etegh vegnen prima del pan de quej che lavoren e per fà no lavorà i estetista fànn no lavorà nanca di alter

Voramai, l’è ciar, l’è nanca pu scienza ma striament e rapresaja, che pagarann no lor, cont el so salari, ma quej che despess inn i men garantid de tucc: quej a “partita IVA”.

Se gh’hii la rabia e ‘l schivi, sii no domà vialter.