Kabhi kabhi mere dil mein khayal ata hai

Ki is duniya mein football fans na hote to kya hota

Gend ko isharon pe nachane wale ajoobe to bahut hote

Par un ajoobon ko bhagwan banane wale, kadrdaan na hote to kya hota

Kabhi kabhi mere dil mein khayal ata hai

Ki is duniya mein football fans na hote to kya hota

Yeh duniya bhale hi gol hoti tab bhi

Magar ismein koi goal chillane wala nahin hota

10 number ka ishq, nakli 9 ke jalwe aur,

Gehrayee mein baithe midfielder ka jadu batlane wala nahin hota

Mahaan na ban pate Puskas, Pele, Zizou,

Cruyff, Clough, Maldini aur Maradona,

Jab khelte yeh log apas mein

Lekin khali hota Old Trafford, Bernabeu, San siro aur Maracana.

Turkey mein to pathake walon ka diwala pit jata

Dohre muffler ka to awishkar hi na hua hota

Anginat ghatiya manager abhi bhi clubs ko chalate

Agar football fans “Wenger Bahar” jaise naare na lagate

Kaun apne kamre ki deewaron par

Messi aur Ronaldo ke chehre chipkata

Kaun khel khatam ho jane ke baad bhi

Stadium mein 2 ghante tak ansu bahata

Jab koi club ya country ka khel dekhne hi na jata

Danga rokne ke liye police ki zaroorat bhi na hoti

Na koi bhavnaon mein behkar khiladi ko boo karta,

Aur na kisiko faltu mein Cantona jaisi kick padti

Balon d’or, FIFA player of the year

Jaise awards ka matlab bhi ghat jata

Jab award milne walon ko

Na to koi tareef na koi ma behen ki galiyan sunata

Jab jab bhi mere dil mein khayal ata hai

Ki is duniya mein football fans na hote to kya hota

Tab tab dil aur dimag donon yehi kehte hain

Ki fans na hote to yeh khel bhi na hota

Yeh khel hai khiladiyon se par utna hi darshak se bhi

Yeh khel hai khiladiyon ka par utna hi darshak ka bhi