小六常識學啲乜

記得中學有個廢嘅老師, 我曾經喺教師問卷俾佢噉嘅評語: 「請至少也備課吧。」結果依家做老師, 搞行政工作同班務, 真係會搞到無心力時間, 講緊有時連身心靈需要都無時間 fulfil。今年第一次教六年級常識, 然後一入班房, 開第一頁電子書教, 就即刻教錯。

難得有個 long weekend, 就即刻備下課補鑊。

(其實我想暑假就研究㗎, 但本死人電子書兩個禮拜前先開到, 人都癲…)

第一冊: 處變不驚

單元一: 平安是福

1.1 簡單急救

• 急救箱入面, 消毒藥水係用嚟清洗傷口, 酒精係用嚟消毒用具; 因為酒精大強會傷害傷口裏面嘅正常組織細胞, 碘酒都係, 會破壞傷口組織，有礙傷口癒合。打針之前用酒精, 手術之前用碘酒, 係因為搽嗰陣無傷口。消毒藥水通常係粉紅色消毒藥水, 含低濃度氯己定, 亦都有黃藥水。清洗傷口仲可以用流動清水、生理鹽水, 正所謂 the key to pollution is dilution。
• 鑷子個「鑷」字, 有邊讀邊, 讀音: nip6。測驗考試寫個鉗字, 敷料鉗應該都有分。

• 急救係為咗要保存傷病者生命, 防止傷勢或病況惡化, 以及促進傷病者復原。簡單嚟講即係唔好死。
• 流鼻血係因為鼻黏膜破損出血。 塊黏膜喺分開左同右鼻窿中間嗰塊嘢。乾燥, 成日撩, 撞到有傷口, 都有機會搞到流鼻血。流鼻血有分向前同向後流。流極唔停係因為嗰啲微絲血管連住條俾 blood supply 眼嘅動脈。微絲血管爆嗰個位叫 Little’s area。
• 止鼻血原理係為咗㩒實爆咗嘅微絲血管等佢埋口, 同埋唔好令啲血倒轉流噎死自己。
• 成個鼻窿㩒實先止到血, 所以用口呼吸; 個頭要向前傾係因為唔想啲血流落喉嚨, 入肺就大鑊。

右邊: 鼻血向後流會成喉嚨成口都係。

• 撞傷, 扭傷都要冷敷。
• 紅十字會話:

冷敷的效果主要是降低患處的溫度，減慢患處的局部血液循環，減慢充血的情況，減輕可能出現的腫脹，達至消除急性炎症，止痛，去腫。適合急性炎症及痛症(患處有紅、腫、痛、熱的徵狀)例如：拉傷或扭傷肌肉、筋腱或韌帶，急性退化性關節炎和痛風症等。

熱敷的效果主要是升患處的溫度，增加患處的局部血液循環，使皮下血管擴張，舒緩已經出現的腫脹，達至消除慢性炎症，止痛，去腫。…