第一次見識姜濤 fans 派 souvenir

再加關於 Mirror 的二三事

星期五晚，約咗朋友去銅鑼灣兔仔 cafe，早咗 15 分鐘到。去到 cafe 樓下，見到成堆人，大部分係女性，目測年紀 20–50歲都有，喺度起哄。

我第一下係驚咗一驚嘅。要知道，我呢啲新界西深山大鄉里，夜晚出去銅鑼灣，喺一個比 SOGO 出面靜一半嘅街角，撞正六七十人聚埋一堆喺度起哄，喺呢啲年頭，會諗係咪 block 緊條街。喺呢一刻，我見到兩個人攞咗兩張卡仔，一路話：「攞到啦攞到啦！」

呢個時候，有兩個攞住四袋嘢嘅女仔，好𢛴憎噉大叫：「嗱排埋呢轉真係無啦吓！！」行埋咗一邊之後就又嗌：「要嘅就喺我前面排一直線！！」然後就全部人都立即港式排隊。

條隊隊頭喺一間寫住大減價嘅舖頭前面，我有一刻喺度諗會唔會關間舖頭事，不過咁大陣仗，應該都係 Mirror — 走去隊頭一望，果然，係派緊姜濤 poster。

於是 whatsapp 錄音同朋友講: 「話說 cafe 樓下有姜糖派緊姜濤 souven, 我貪得意想排埋一份, 所以等你哋嘅時候就順便排下, 排到你哋到, 睇你哋到先定我攞到先啦下。」