[京都] 重口味．呢碗係撈麵定拉麵？麵屋 極雞

京都拉麵競爭區域「一乘寺」名店，重口味雞湯拉麵

你以為我會全日都食咁淡口味？我會嘅話就唔姓潮！

遊歷完清水寺-祗園一帶，唔知痴起邊條筋，轉戰京都拉麵競爭區域 — 一乘寺。一乘寺係咩地方？就咁係Tabelog到掃一掃，呢個區域嘅拉麵店隨隨便便都係3.5分或以上，比如話：極雞、池田屋、亞喜英、高安等等。

而今次揀嘅極雞，現為3.67分，以重口味雞湯拉麵聞名。望著一堆睇唔明嘅日文字，亂估無痛苦咁揀鶏だく + 玉子かけご飯（我真係睇唔明係咩），盛惠1,000yen。

首先上枱嘅唔係拉麵，而係生蛋飯，即係我睇唔明果舊野 Lol 好啦，襯碗飯仲係熱，拿拿聲打隻蛋再倒埋配料舊去撈一撈。正想食一啖之際，碗麵就嚟啦。

等等先，我嚟唔係食拉麵嫁咩，因咩事個湯濃稠到拌麵咁樣？無錯啦，呢碗就係招牌菜 — 原味濃厚雞白湯底拉麵，完全用雞骨熬製，湯底「杰」到好似芝麻糊咁，不過飲落意外地唔油唔膩，配合粗身麵條，每夾一著入口，都感受到濃厚雞味，非常好食。

夾夾下，無麵條嘅？原來已經食哂，好失落。好彩，我仲有碗生蛋飯，倒埋落剩返嘅湯到再砌過，好滿足。

麺屋 極鶏
地址：京都府京都市左京区一乗寺西閉川原町29–7

麺屋 極鶏 (修学院/ラーメン)

如果你覺得好睇嘅，請給我1個掌聲作為鼓勵；
如果你想我再寫嘅，請給我2–5個掌聲作為鼓勵；