ເວລາເປັນສິ່ງມີຄ່າ ຢາກມີຕ້ອງຕັ້ງໃຈສ້າງມັນຂຶ້ນມາ
ເຄີຍເປັນບໍວ່າ ເມື່ອຖືກຖາມວ່າ ເປັນແນວໃດຊ່ວງນີ້ ຫຼາຍຄົນມັກຕອບວ່າ “ຫຍຸ້ງຫຼາຍ ວຽກຫຼາຍ ບໍ່ມີເວລາເລີຍ“ ຫຼື ຖືກໂາມວ່າ ໃນຊ່ວງໜຶ່ງອາທິດຜ່ານມານີ້ ຈື່ບໍວ່າ ຊ່ວງເວລາດີດີທີ່ມີຄຸນຄ່າແມ່ນຫຍັງ ຫຼື ເອົາໃກ້ໆເລີຍ ຊ່ວງເວລາດີດີຂອງມື້ວານນີ້ແມ່ນຫຍັງ ຫຼາຍຄົນຄົງຈະກຳລັງເອົາມືຄຳ້ຄາງ ແລະ ເຫຼືອກຕາເບິ່ງເພດານ ໃຊ້ຄວາມຄິດໄລຍະໜຶ່ງ ຄິດຫາເວລານັ້ນວ່າແມ່ນຫຍັງ ນີ້ອາດຈະເປັນເພາະວ່າ ທີ່ຜ່ານມາເຮົາໄດ້ໃຊ້ເວລາໄປກັບເລື່ອງຫຍຸ້ງໆຂອງເຮົາແບບຜິດໆ. ເຫດການດັ່ງກ່າວນີ້ໄດ້ເກີດຂຶ້ນແບບດຽວກັບ Jake Knapp ແລະ John Zeratsky.
Jake Knapp (JK) ເປັນອະດີດນັກອອກແບບຜະລິດຕະພັນໃຫ້ກັບ Google ແລະ John Zeratsky (JZ) ກໍເປັນອະດີດນັກອອກແບບໃຫ້ກັບ Youtube ພວກເຂົາທັງສອງເປັນໄວໜຸ່ມໄຟແຮງທີ່ແຕ່ລະມື້ເຕັມໄປດ້ວຍວຽກງານການໃຊ້ຄວາມຄິດ ແລະ ການປະຊຸມ ແຕ່ພວກເຂົາມີເປົ້າໝາຍອັນດຽວກັນຢ່າງໜຶ່ງ ຄື “ການຈັດການເວລາ” ຈະເຮັດແນວໃດ ໃຫ້ແຕ່ລະມື້ໃຊ້ເວລາກັບເລື່ອງຫຍຸ້ງໆໃຫ້ສ້າງສັນ ແລະ ມີຄຸນຄ່າທີ່ສຸດ. ພວກເຂົາໄດ້ໃຊ້ເວລາຢູ່ຫຼາຍປີ ທົດລອງແນວຄິດ ວິທີຕ່າງໆກ່ຽວກັບການຈັດການເວລາ ຈົນໃນທີ່ສຸດກໍໄດ້ລວບລວມເອົາເທັກນິກຕ່າງໆທີ່ເປັນປະໂຫຍດ ສະຫລຼຸບໄວ້ໃນໜັງສືທີ່ມີຊື່ວ່າ “Make time — How to focus on what matters everyday” ແລະມັນກໍໄດ້ກາຍເປັນໜັງສືດ້ານການຈັດການເວລາຂາຍດີອັນດັບຕົ້ນໆ ທີ່ໃຜໆກໍເວົ້າເຖິງໃນຊ່ວງ 2–3 ປີທີ່ຜ່ານມານີ້.
ເວລາຂອງພວກເຮົາໃນແຕ່ລະມື້ ສ່ວນໃຫຍ່ແລ້ວຈະຖືກຂັບເຄື່ອນດ້ວຍແຮງກະຕຸ້ນ 2 ຢ່າງຫຼັກໆ ຄື Busy Bandwagon ແລະ Infinity Pools.
- Busy Bandgawon (ຂະບວນລົດແຮ່ທີ່ວຸ້ນວາຍ) ສື່ຄວາມໝາຍເຖິງ ວັດທະນະທຳແຫ່ງການມີວຽກເຕັມມື ຕາຕະລາງເຕັມໄປດ້ວຍການເຮັດວຽກ ການປະຊຸມ ການຕອບຂໍ້ຄວາມ. ພວກເຮົາມັກຈະຖືກກະແສສັງຄົມບອກໃຫ້ເຊື່ອວ່າ ຖ້າຢາກປະສົບຜົນສຳເລັດ ຕ້ອງເຮັດວຽກຫຼາຍໆ ບໍ່ເລືອກວຽກ ຖ້າເຈົ້າເລີ່ມຊ້າເມື່ອໃດ ເມື່ອນັ້ນເຈົ້າຈະແລ່ນບໍ່ທັນໝູ່ (ເພິ່ນກໍບໍ່ໄດ້ບອກວ່າການເຮັດວຽກຫຼາຍບໍ່ດີ ແຕ່ມັນມີວິທີທີ່ສະຫຼາດກວ່າໃນການຈັດການກັບວຽກເຫຼົ່ານັ້ນ)
- ສ່ວນ Infinity Pools (ສະນຳ້ອັນໄຫຼວຽນທີ່ບໍ່ມີວັນຈົບສິ້ນ) ໝາຍເຖິງ ບັນດາ Applications ຫຼື Streaming ຕ່າງໆ ທີ່ປ້ອນຂໍ້ມູນໃຫ້ເຮົາແບບບໍ່ຈົບສິ້ນ ຖ້າ application ໃດເຈົ້າສາມາດເອົາມືດຶງລົງເພື່ອ refresh ສິ່ງນັ້ນເອີ້ນວ່າ Infinity Pools ເຊັ່ນ Facebook Instagram Youtube web ຂ່າວ ຕ່າງໆ.
ຊີວິດຂອງເຮົາໃນແຕ່ລະມື້ ສ່ວນໃຫຍ່ຖືກຕັ້ງໃວ້ໃນແບບ Default ຄື ເມື່ອອິດເມື່ອຍຈາກ Busy Bandwagon ກໍມັກຈະຄິດວ່າ Infinity Pools ນັ້ນເປັນລາງວັນ ເຮັດໃຫ້ຫາຍເມື່ອຍ (ເຊັ່ນ ເຮັດວຽກມາເມື່ອຍ ຂໍເບິ່ງ Series ແນ່ຈັກເລື່ອງ) ຈົນໃນທີ່ສຸດ Infinity Pools ກໍກືນກິນເວລາທັງໝົດໄປ ເກືອບບໍ່ເຫຼືອເວລາໄວ້ເຮັດຫຍັງ. ໜັງສື Make Time ຈະພາເຮົາທຳລາຍ Defaut ເກົ່າໆ ແລະ ສ້າງ Default ໄໝ່ຂຶ້ນມາ.
ການສ້າງເວລາທີ່ JK ແລະ JZ ໄດ້ສະຫຼຸບໃຫ້ ມີຢູ່ 4 ຂັ້ນຕອນນຳກັນ ຄື 1. Highlight 2. Laser 3. Energize ແລະ 4. Reflect
ເລືອກ Highlight ຂອງແຕ່ລະມື້ ແລະ ໃຫ້ຄວາມສຳຄັນກັບມັນ.
ກ່ອນຈະເລີ່ມຕົ້ນວັນໜຶ່ງຂອງເຈົ້າ ໃຫ້ເລືອກເປົ້າໝາຍຂຶ໊ນມາຢ່າງໜື່ງ ຢຳ້ວ່າ ພຽງແຕ່ “ຢ່າງດຽວ”. ອາດຈະເປັນເປົ້າໝາຍກ່ຽວກັບວຽກຢູ່ຫ້ອງການ ຫຼື ນັ່ງອ່ານໜັງສືໃຫ້ຈົບ 1 ບົດ ຫຼື ຂຽນບົດຄວາມສົ່ງ Page Info. 1 ບົດຄວາມ ຫຼື ອາດຈະເປັນເປົ້າໝາຍງ່າຍໆ ເຊັ່ນ ມື້ນີ້ຈະລອງອົບເຄັກກ້ວຍເບິ່ງຈັກບາດ. ຫູັງຈາກເລືອກ Highlight ແລ້ວກໍໃຫ້ຈັດຕາຕະລາງເວລາຂອງເຈົ້າ ເພື່ອໃຫ້ມີເວລາກັບສິ່ງນັ້ນ.
- ການຫາ Highlight ຂອງແຕ່ລະວັນ ອາດຈະເລີ່ມຈາກຫານຂຽນເປັນລາຍການອອກມາ ແລ້ວລອງຖາມຕົວເອງວ່າຂໍ້ໃດມີຄວາມຮີບດ່ວນ ຂໍ້ໃດຈະເຮັດໃຫ້ມີຄວາມສຸກ ແລະ ມີຄວາມໝາຍ ແລະ ກໍເລືອກສິ່ງນັ້ນເປັນ highlight ຂອງວັນ
- ການວາງແຜນຕາຕະລາງໃນແຕ່ລະວັນ JK ແນະນຳໃຫ້ຈັດແບບຊົ່ວໂມງຕໍ່ຊົ່ວໂມງໂດຍລະອຽດ ອາດຈະຂຽນອອກມາ ຫຼຶ ຈັດລົງໃນ Calendar app ໃນມືຖືຂອງເຈົ້າເອງ ບໍ່ຄວນຈະຈັດແບບລອຍໆ ແລະ ກວມລວມເກີນໄປ ຕົວຢ່າງ ຈະຕື່ນນອນ 6 ໂມງ, 6.10–6.30 ຈະອອກກຳລັງກາຍ, 7.30–8.00 ເດີນທາງໄປເຮັດວຽກ ແລະ ເປີດຟັງ Podcast ຮຽນພາສາອັງກິດໄປນຳ.
ເມື່ອວາງແຜນ Highlight ຂອງວັນໄດ້ແລ້ວ ຕ້ອງພາຕົວເອງເຂົ້າສູ່ Laser-focus mode ກັບ Highlight ນັ້ນໃຫ້ໄດ້.
ລອງຈິນຕະນາການເຖິງແສງໄຟໃນດິສໂກເທັກທີ່ເຈົ້າເຄີຍໄປ ເວລາເຈົ້າເຮັດວຽກແບບຂາດການ focus ສະມາທິຂອງເຈົ້າກໍບໍ່ຕ່າງຫຍັງກັບໄຟໃນດິສໂກເທັກ ທີ່ແລ່ນໄປມາ ແບບບໍ່ມີທິດທາງ ຈັບຕົ້ນປາຍບໍ່ໄດ້ ເມື່ອເວລາຜ່ານໄປ ຮູ້ຕົວອີກເທື່ອວຽກກໍເດີນບໍ່ຮອດໃສ. ບາດນີ້ໃຫ້ລອງຈິນຕະນາການເຖິງແສງ Laser ມັນຈະມີຈຸດ focus ທີ່ເຊັດເຈນ ຢູ່ຈຸດດຽວ ຖ້າເຈົ້າຢາກເຮັດກິດຈະກຳຫຍັງໃຫ້ມີປະສິດທິພາບ ແລະ ມີຄວາມໝາຍ ເຈົ້າຕ້ອງພາຕົວເອງຢູ່ໃນ Laser Focus mode ເທົ່ານັ້ນ.
ໃນໜັງສືໄດ້ຍົກຫຼາຍວິທີ ເພື່ອຈະຊ່ວຍໃຫ້ຢູ່ໃນ Laser Focus mode ເຊັ່ນ ການລຶບ Social media ອອກຈາກໂທລະສັບ ເພື່ອຕັດຕົວລົບກວນສະມາທິອອກໄປ (Distraction-free Phone), ເຮັດວຽກແບບເອົາໂມງນັບເວລາຖອຍຫຼັງມາຕັ້ງຕໍ່ໜ້າ (Set a time timer) ຈະເຮັດໃຫ້ຮູ້ສຶກວ່າ ເວລາເຫຼືອໜ້ອຍເຕັມທີ ເຊິ່ງຈະຊ່ວຍໃຫ້ Focus ກັບສິ່ງທີ່ຢູ່ຕໍ່ໜ້າໄດ້ດີຂຶ້ນ, ຫຼິ້ນ playlist ສຳລັບ Laser mode, ລອງປ່ຽນຈາກການຈ່າຍເງິນແບບ unlimited ໃຫ້ streaming ເຊັ່ນ Netflix ມາເປັນ ການເລືອກຈ່າຍພຽງຄັ້ງດຽວເພື່ອ ໜັງ ຫຼື Series ທີ່ຢາກເບິ່ງແທ້ໆ, ມີເຈ້ຍຂາວໄວ້ທາງຂ້າງສະເໝີ ການຈົດໄອເດຍໄໝ່ໆໃສ່ເຈ້ຍຂາວຈະໃຫ້ຄວາມເປັນອິດສະຫຼະໃນການຄິດ ກວ່າການບັນທຶກລົງໃນຄອມ, ນອກຈາກນີ້ ຍັງມີອີກຫຼາຍໆວິທີຄັກໆທີ່ເຮົາບໍ່ໄດ້ກ່າວເຖິງ.
ຕອນທີ 3 ຄື Energize — ເຄື່ອງຈັກຈະເດີນໄດ້ກໍຕ້ອງມີນຳ້ມັນຫຼໍ່ລ້ຽງ ມະນຸດກໍຕ້ອງມີພະລັງງານອັນເຕັມປ່ຽມ ຈຶ່ງຈະສາມາດເຮັດວຽກໄດ້ຢ່າງມີປະສິດທິພາບໄດ້.
ຖ້າສະໝອງເຈົ້າຄິດຢາກເຮັດນັ້ນເຮັດນີ້ ແຕ່ຮ່າງກາຍພັດບໍ່ພ້ອມທີ່ຈະລຸຍ ສຸດທ້າຍສິ່ງທີ່ຢາກເຮັດກໍຢູ່ໄດ້ແຕ່ໃນຫົວ ໃນທາງກັບກັນ ຮ່າງກາຍພ້ອມທີ່ຈະລຸຍ ແຕ່ສະໝອງພັດເມື່ອຍລ້າມີແຕ່ຄວາມຄຽດ ແບບນີ້ວຽກກໍບໍ່ເດີນເຊັ່ນກັນ. ສະນັ້ນ ການຮັກສາສຸຂະພາບໃຫ້ແຂງແຮງ ບໍ່ວ່າຈະເປັນຮ່າງກາຍ ແລະ ສະໝອງ ຖືວ່າເປັນຫົວໃຈສຳຄັນໃນການສ້າງເວລາ.
ມີຫຼາຍວິທີທີ່ໜັງສືໄດ້ແນະນຳ ເຊິ່ງຫຼາຍຄົນກໍຄົງຈະຮູ້ດີຢູ່ແລ້ວ ເຊັ່ນ #ການອອກກຳລັງກາຍຢ່າງສະໝຳ່າສະເໝີ ເຊິ່ງເຈົ້າບໍ່ຈຳເປັນຕ້ອງຫາເວລາຫຼາຍຊົ່ວໂມງໃນການອອກກຳລັງກາຍ ຮ່າງກາຍຕ້ອງການພຽງແຕ່ວັນລະ 20 ນາທີ ກໍຖືວ່າເປັນຜົນດີຫຼາຍຢ່າງແລ້ວ ອາດຈະເປັນການໂດດເຊືອກທຸກເຊົ້າກໍໄດ້, JK ແລະ JZ ໄດ້ແນະນຳການອອກກຳລັງແບບ High Intensity Training ເຊິ່ງເປັນການ workout ທີ່ໃຊ້ເວລາບໍ່ພໍເທົ່າໃດນາທີ ແຕ່ຊ່ວຍການເຜົາຜານໄດ້ດີຫຼາຍ.
ພຶດຕິກຳການກິນກໍເປັນອີກໜຶ່ງປັດໃຈສຳຄັນໃນການສ້າງພະລັງງານ. ມີຫຼາຍວິທີທີ່ຜູ້ຂຽນທັງສອງແນະນຳ ເຊັ່ນ ການບໍ່ກິນຫວານຫຼາຍ (Disconnect Sugar) ເພາະຫລັງຈາກກິນຂອງຫວານ ໜັງຕາມັກຈະຍານໂລດ ເຮັດໃຫ້ການເຮັດວຽກອາດຈະບໍ່ມີປະສິດທິພາບ, ການເລືອກກິນອາຫານທີ່ສົດ ບໍ່ຜ່ານການແປຮູບ (Eat real food), ກິນຜັກເປັນຫຼັກ ຊີ້ນແລະແປ້ງເປັນຮອງ (Eat mostly plant), ປະໃຫ້ຮ່າງກາຍຫິວບາງຍາມ (Stay Hungry) ແລະວິທີການກິນກາເຟໃຫ້ໄດ້ປະໂຫຍດທີ່ສຸດ.
ຂັ້ນຕອນສຸດທ້າຍແມ່ນ Reflect — ທົບທວນຄືນເຖິງສິ່ງທີ່ເກີດຂຶ້ນໃນມື້ນັ້ນໆ
ຖ້າຢາກໃຫ້ 3 ຂັ້ນຕອນທີ່ກ່າວມາຂ້າງເທິງໃຊ້ໄດ້ຜົນ ແລະ ກາຍເປັນນິໃສໄໝ່ຂອງເຈົ້າ ເມື່ອໃກ້ຈະສິ້ນສຸດວັນ ເຈົ້າຕ້ອງກັບມາທົບທວນຄືນວ່າມື້ນີ້ຜ່ານຫຍັງມາແນ່ ວີທີທີ່ໄດ້ຜົນດີໃນການເຮັດໃຫ້ເຈົ້າຢູ່ໃນ Laser-focus mode, ຖ້າວິທີໃດໄດ້ຜົນກໍຈົດບັນທຶກໄວ້ ແລະ ເຮັດວິທີນັ້ນຊຳ້ໄປຊຳ້ມາຈົນໃຫ້ມັນກາຍເປັນນິໃສຕິດຕົວ.
ຜູ້ຂຽນທັງສອງຍັງໄດ້ບອກວ່າ ມັນອາດຈະຍາກໃນຊ່ວງທຳອິດທີ່ຈະປ່ຽນແປງ Default ເກົ່າ ບໍ່ຄວນຈະບັງຄັບຕົວເອງຈົນເກີນໄປ ຄ່ອຍໆປັບປ່ຽນວີທີໄປໃນແຕ່ລະມື້ ແລະ ຢ່າລືມທີ່ຈະທົບທວນວ່າວິທີໃດທີ່ໄດ້ຜົນກັບຕົວເຮົາ ເພາະບາງວິທີອາດຈະໄດ້ຜົນແຕ່ກັບບາງຄົນເທົ່ານັ້ນ.
ສຳລັບຂໍ້ມູນລະອຽດ ຫຼື ໃຜສົນໃຈຢາກຮູ້ອີກຫຼາຍໆວິທີທີ່ເຮົາບໍ່ໄດ້ກ່າວມາຂ້າງເທິງນີ້ ແນະນຳໃຫ້ອ່ານເພີ່ມໃນໜັງສື Make time — How to focus on what matters everyday ຂຽນໂດຍ Jake Knapp ແລະ John Zeratsky.
