短講
Emil Adolf von Behring喺十九世紀尾發明咗醫治白喉嘅抗毒素(Antitoxin)，建立被動免疫(passive immunity)理論。喺十九世紀，白喉(Diphtheria)係殺人無數嘅疾病。單計德國，每年就有數以萬計嘅兒童因患上白喉而喪命。1880年代，科學家發現引致白喉嘅細菌，亦發覺白喉嘅病徵係由細菌製造出嚟嘅一隻毒素所引發。Behring將白喉毒素加熱然後打入天竺鼠，發現呢啲天竺鼠嘅血清可以醫到另一啲被白喉感染嘅天竺鼠。呢種血清療法後來使用喺人類身上，拯救無數人脫離白喉之苦。Behring嘅研究對免疫學嘅發展影響深遠，抗體(Antibody)同體液免疫(Humoral immunity)等等概念亦係由此引伸出嚟。但頒佈1901年諾獎嗰陣，重點係放咗喺血清療法嘅醫療效用之上；當時似乎未有發現呢份研究對免疫學有重大影響。
極簡明理論
當免疫系統探測到外來物，身體就會製造相對應嘅抗體。抗體有無數咁多種，每一種都可以認得獨特嘅目標，然後就會痴落去佢度。你可以幻想抗體係一個好痴身嘅女朋友，當佢認得獨特嘅目標（i.e. 男朋友），佢就會痴過去。如果唔係個目標（i.e. 唔係男朋友），佢就會視而不見。當目標（如毒素）畀抗體痴實，佢就做唔到本來做到嘅嘢（正如畀女朋友痴實咗…）。而世上有咁多個女仔，總有一個會認得你嘅，毒男。
當某隻生物因為有外來物入侵而產生抗體，佢嘅血清入面就會有嗰隻獨特嘅抗體；如果我哋將佢嘅血清打入另一個人度，另一個人就直接得到嗰種抗體，從而得到保護。呢種保護唔係由自身免疫引起，所以稱為「被動免疫」。同佢相對嘅就係疫苗接種。疫苗接種係直接將外來物打入身體，令免疫系統主動產生抗體，所以稱為「主動免疫」。
雖然疫苗療法早喺十八世紀已經被人發現，但抗體呢個概念要到發明血清療法先至誕生。喺Behring嘅諾獎演講入面，佢提及到接種疫苗係 “iso-therapy through iso-bodies”。Iso- 係指「等同」，意思係話接種疫苗係將「等同於致病源」嘅物質打入體內，從而達到等同嘅醫療效果 (iso-therapy），可以話係以毒攻毒。就好似接種流感疫苗其實就係打啲（整死咗嘅）流感病毒入身體度，令免疫系統可以抵抗流感。
相反，Behring喺下一句稱血清療法為 “serum therapy works through anti-bodies”。Anti- 係指「相對/對抗」，同Iso- 相反，意思係指血清療法將「相反於致病源」嘅物質打入體內。咁「相反於致病源」嘅物質係咩呢？我哋而家當然知道個答案係乜 — 冇錯，就係抗體。
血清：血液減走「血球」再減走「凝血因子」就係血清。先畀血液凝固形成血栓，再放入離心機移除血栓、血球就可以得到血清。血清入面含有好多唔同種類嘅蛋白質。
相關理論：Medicine, Immunology, Microbiology, Bacteriology, Pathology
我希望以上所有文字係就算冇讀過科學嘅讀者都可以完全睇得明。假如你有任何唔明白嘅地方，請話我知，因為咁係代表我寫得唔夠簡單。
