加密貨幣騙案分享(一) — 極具升值潛力新幣

我地經常，係，係經常，收到客人遇到有關加密貨幣騙案。

我地好唔想有人再因為「投資加密貨幣」而被呃錢，更加唔希望「加密貨幣」變左騙徒嘅工具，而其實呢啲騙案係絕對可以避免；所以黎緊想同大家分享下3款我地最常見嘅騙案，等大家遇到類似情況時可以停一停諗一諗，同埋教大家可以點樣避免！

騙案1 — 極具升值潛力新幣
騙案2 — P2P交易三角騙案
騙案3 — 駭客入侵電腦勒索

騙案1 — 極具升值潛力新幣

騙徒會透過不同途徑去接觸受害人，（我地最常聽到嘅係「朋友介紹我玩」，而呢個朋友係喺微信度識返黎嘅，買完之後就想搵都搵唔返呢個「朋友」）然後話你知黎緊有隻新嘅加密貨幣有幾勁，可以升10倍100倍，因為的確有加密貨幣試過有咁嘅升幅，所以你不虞有詐，就買左呢隻「新嘅加密貨幣」。

買完初期你會好開心，因為真係升左少少，當你期待佢升到10倍嘅時候你發覺個幣價不升反跌，到最後呢隻新幣變到唔值錢，而且你想賣走佢嘅時候發現你唔知可以去邊度賣左佢套現。

分析

呢種騙案非常常見，其實算唔算騙案我都唔敢講，因為的確有人會喺呢個情況下賺錢離場。一開頭個價點解會升？因為騙徒同時呃緊好多人一齊買果隻新幣，好自然個價會被推上去。

如果你呢個時候放左佢，就可以賺到錢；可惜，都未到你個「朋友」講嘅十倍，你又點會放呢？

當個價去到某個位，騙徒就開始放佢手上大量嘅幣去套現，由於大幅度被拋售，幣價會急速滑落；到你發現嘅時候恐怕個幣已經一文不值了。

去到呢度，仲有一個壞消息要講你知，呢類型嘅騙案好多時騙徒都會一手包辦做埋專賣呢個幣嘅「交易所」；為左令你連果少少錢都拎唔到出黎，佢地會將呢個幣「落架」，即係你唔會喺呢間「交易所」再買賣到呢一個幣，當然你更加唔會喺任何一間加密貨幣交易所買賣到呢個幣，呢個時候就宣佈Certified了。

避免方法

1. 呢類騙案係利用人嘅貪念，記住，世界真係無咁大隻蛤蚧隨街跳，唔會真係有人賺唔哂啲錢益你，係益都益真朋友，唔會益你呢個微信朋友；聽到有人話有十倍一百倍嘅升幅，記得響起個警號先。
2. 除左你「朋友」介紹嘅交易所，Google下有冇第二間交易所有得買賣呢隻新幣。
3. 其實ICO嘅熱潮一早過左，而家新幣神話已經不再；如果你對加密貨幣巿場唔熟悉，我建議呢啲coinmarketcap.com 都搵唔到嘅不知名幣，千祈唔好掂！如果你要試玩加密貨幣，就由最大果幾隻開始（即BTC/ ETH等等）。

希望大家再遇到類似情況，會有所警惕，以免一接觸加密貨幣就被騙財！下次再為大家分享「P2P交易三角騙案」以及「駭客入侵電腦勒索」。

— — — — — -
www.myethshop.com
港幣買賣加密貨幣平台

— — — —
facebook: myethshop
instagram: myethshop
WeChat: myethshop

Originally published at http://myethlabs.wordpress.com on August 22, 2019.