BTC vs. ETH | 比特幣 VS. 以太幣
好多人成日問究竟bitcoin同ether有咩分別？其實要明白兩者之間嘅分別，大家要先了解”加密貨幣“(cryptocurrency)同“代幣“(token).
Bitcoin係“加密貨幣”，目的只有一個，就如“貨幣”嘅字面意思 ，亦即係錢，就係直接支付買賣。所以，Bitcoin嘅程式設計上，只容許Bitcoin做金錢交易，做簡單嘅加減乘除計算，不能兼容其他用途。
而Ether就係”加密代幣“，作用就超越左“錢”。一隻“代幣”嘅用途及價值係完全基於佢嘅創造者嘅設計及開發而定；主要係作為執行任何形式嘅交易或指令(包括投票權、服務、積分等)嘅工具，當中，支付買賣或金錢交易只係其中一項功能。（可以幻想去歡樂天地/冒險樂園，你買代幣&入代幣係為左玩遊戲，代幣雖有金錢價值，但主要功能唔係買賣）
所以，Ether其實係Ethereum(以太坊)嘅副產品，主要用途就係為Ethereum平台上嘅 Decentralised Applications(dApps 分散應用程式)提供燃料 (所以，其實金錢交易只係Ether嘅額外功能)。而Ethereum最特別之處就係佢嘅dApps非常靈活，可以執行各種指令及P2P contract，呢項功能就係成日聽到嘅”Smart Contract”。”Smart Contract”嘅內容可以係交易任何有價值嘅嘢，又或者直接執行一個個動作，甚至單單儲存資料亦可以。因為Ethereum有好高嘅靈活&彈性，可以應用喺各個行業中，吸引大量開發者&用家，所以Ethereum嘅可塑性十分之高！
另外，最後一樣分別就係Bitcoin同Ether嘅供應機制：Bitcoin嘅供應係有總上限 — 2100萬, 而Ether就係每年1800萬(將來可能會收緊)。所以Ether嘅發展係可以擴張嚟支持未來dApps嘅開發。
總結
所以，簡單嚟講呢倆種加密貨幣嘅比喻就係比特幣係一部計數機，而以太幣就係一部智能電話/電腦；一個只可以做加減乘除，但另一個就可以有無盡可能！
Ether嘅價值係來自於市場對Ethereum未來廣泛應用嘅信心,而Bitcoin嘅價值就係市場對呢種貨幣流通量嘅預期。
