Hard Fork 有新幣派，要放係邊先有得分？
Blockchain 世界入面，其中一個初學投資者問得最多既問題，就一定係：「我放左啲幣係 Exchange (或者MyEtherWallet／硬件錢包 etc)，係 Hard Fork 之後，我會唔會收到新派既幣？」。
簡短答案係： 放係自己有私有匙 private key 既錢包 (好似 MyEtherWallet/ Blockchain/ Exodus/ 硬件錢包），肯定會有。放係交易所 Exchange 入面，就好視乎 Exchange 既政策。亦即係如果交易所最終決定唔支援新既幣，你就唔會接收到Hard Fork 之後出黎既新幣。
詳細答案係：大家可以幻想 blockchain 既世界係一個好大既 Excel spreadsheet，入面有大家既戶口號碼，同戶口入面有幾多錢。咁而家有個Excel file 叫 Jitcoin.xls ，入面儲存左唔同人既戶口資料同結餘。
當Hard Fork 黎既時候，其實就係將呢個 Excel file Copy & Paste，然後將呢個新 file 改名做 JitcoinCash.xls。所以本身係 Jitcoin.xls 入面既資料，會原封不動咁跟隨住 Copy & Paste，去到新既 JitcoinCash.xls 入面。
所以如果你既Jitcoin 係放係自己錢包，咁係新既 Jitcoin Cash 入面都會記載住你既戶口結餘，亦都係點解往往係 Hard Fork 後，原有幣持有者會 1:1 咁獲分派新幣。要提錢？無問題，只要用返你條私有匙就可以係新既 JitcoinCash.xls 更改紀錄，而對你原有既 Jitcoin.xls 不作任何影響。
另一方面，如果你啲幣係放左係 Exchange 入面，咁 Jitcoin.xls 入面就唔會有你既戶口紀錄。取而代之，會係 Exchange 既戶口同Exchange 既結餘。當Hard Fork 來臨，當然係新既 JitcoinCash.xls入面， Exchange 既戶口會一樣有新幣既結餘。但係作為用家既你，就要視乎 Exchange 會唔會分派俾你，定係中飽私囊，自己 fat fat 算了。
綜合上述所講，如果將來因為 Hard Fork 而會有新幣派的話，記得係 Hard Fork 之前將原有幣轉到自己既私人錢包，咁就萬無一失可以獲派新幣了﹗
常見 Q&A:
Q: Hard Fork 後係咪一定有新幣？
A: 唔一定。用返上面個例子，如果舊個個 excel file 無人用，大家都轉左過去用新個個 excel file，咁大家就會用新既 excel 去繼續，而舊既 excel 就會扔落垃圾桶。Ethereum 既版本升級，好似由 Homestead 升級去 Metropolis，就係呢一類 Hard Fork。
相反，如果係Hard Fork 之後，新舊版本既 Excel File 都繼續有人用，咁就會有兩隻幣存在於市面。Bitcoin/BitcoinCash, Ethereum/EthereumClassic 就係屬於呢一類。
Q: Hard Fork 之後，我係我私人錢包仲未見到新幣既？
A: 要等你個錢包升級左，先會見到。情形就係個 excel file copy & paste 左，所以你既戶口資料已經係新既 file 存在。但係你要睇呢個新 file ，必需要等 windows 升級先可以睇到。所以新幣既紀錄已經係度，但係你要等週邊軟件升級先睇到。
— — — — — — — —
www.myethshop.com
MyEthShop — 香港以太幣找換店，能夠用港幣入數，買賣以太幣 ETH 既加密貨幣找換店
