#MY觀點 — 挖礦合約投資大法？
我怕文章太長會有人睇唔到最尾，TLDR，所以將我結論講左先 — 我自己一定唔會投資挖礦合約！
背景
不時會有客人問我地點睇挖礦合約(Minging Contract)，係咪一個好嘅投資？事關當個幣巿稍為好些少嘅時候，總會有啲所謂KOL走出黎Sell挖礦合約。
老實講，有人話「有錢我賺唔哂，不如分啲比你賺」我真係打死都唔信。
不過實在有唔少人問過，呢個一定都係好多人有嘅問題，我地就一次過為大家講吓我地嘅睇法。
咩係挖礦合約
要知道挖礦合約值唔值得投資，就要先知道佢嘅原理同埋回報。
我唔深入講共識機制了，如果想了解多啲的話可以上網搵到好多文章。簡單啲講，加密貨幣底層技術係區塊鏈，挖礦係區塊鏈運作入面一個好重要嘅動作 — 礦工用電腦運算後將資料打包放上區塊鏈，然後得到一啲加密貨幣作為獎勵，呢個就為之「挖礦」。
因為唔係所有人都識得砌部礦機，而且香港寸金尺土，就算你識砌礦機，都未必會放好多礦機喺屋企挖礦；因此，挖礦合約就應運而生。
有公司聲稱喺一啲地方（一般喺內地）有一個好大嘅場入面放左好多部礦機喺度，幫你挖礦，你只需要預付一筆錢，就可以購買「算力」（即係礦機挖礦嘅能力）製造每個月嘅被動收入。令到你唔駛自己砌機挖礦，都可以遠距離「投資」礦機挖礦收錢。
回報
以H@$挖礦合約為例，根據佢地官網，如果我今日買1TH/s算力，24個月嘅合約係US$68.4; 1TH/s嘅算力每個月扣除左合約嘅費用可以得到0.000275BTC（請看後記）。
9月3日零晨00:00嘅BTC嘅價錢係US$9,900)；我當佢係US$10,000，即係每個月回報大概係US$2.75,假設BTC價錢不變的話，24個月之後你得到嘅回報係US$66! （都已經未計算BTC產出會因為難度一直提升而越來越少）
嘩我真係多謝哂你，搞咁耐放左24個月，得到嘅回報係仲少過我當初比嘅錢！
而其實挖礦係有好多因素影響你嘅收入，比如 -
- 挖礦嘅難度 — 難度越高，挖礦嘅產出量就越少，過去30日難度就已經提升左接近20%；
2. 加密貨幣價格升跌 — 加密貨幣個價升當然係好，但有升就有跌；舊年就係好多苦主買完合約之後幣價大跌，最終得到嘅回報係原本承諾嘅回報1/10都冇。（而留意返啲KOL總係喺幣巿稍為好嘅時候先走出黎叫你買，幣巿低迷果陣佢地係消失哂架）
啲挖礦合約公司會喺啲細字到講你知有呢啲風險，但係sell你果陣會唔會將重點放喺呢度呢？我就唔肯定喇。
結論
退一步黎睇，呢啲所謂嘅挖礦合約，只係你預付左一筆錢，然後間公司攤分24個月比啲加密貨幣比你；實際回報一定少過你喺買合約果日見到嘅回報，因為挖礦難度一直只會有增無減。
買合約嘅心態可能係一種對賭，覺得日後加密貨幣嘅價格會高過你而家簽約果陣個價，簽挖礦合約就好似幫你Lock起個價咁。
但係，如果你真係咁睇好呢種加密貨幣，何不由Day 1 就直接用呢筆錢買入加密貨幣揸喺自己手？點解要經由一間公司分24個月逐啲逐啲嘔啲幣比你？買完揸喺手仲可以隨時放出去realise profit。
更加好嘅方法可能係用月供嘅形式，利用平均成本法買入加密貨幣避免短期價格波動令自己做錯決定。
後記
寫呢寫文果陣筆者有兩個小發現：
- 筆者嘗試喺H@$個網頁試下計算1000GH/s算力得到嘅回報，網頁得出嘅結果係每月0.000275BTC，但係其他掘礦計算網頁都得出結果應該係0.0007BTC；當中嘅差別相信係H@$收取嘅手續費。
2. 筆者喺H@$ 網頁計算時，嘗試改變 BTC 現有價格，但保持其他所有因素不變（包括算力），得出嘅 BTC 產出竟然會有分別；相信算式有機會出錯。
— — — — — -
www.myethshop.com
港幣買賣加密貨幣平台
— — — —
instagram: myethshop
facebook: myethshop
WeChat: myethshop
— — — —
免責聲明本網頁內容並非投資意見，亦不構成任何投資產品之要約、要約招攬或建議。所載內容只作為一般用途，它並沒有考慮您的個人需要、投資目標及特定財政狀況。投資附帶風險，在作出任何投資決策前，您應考慮自己的財務狀況、投資目標及經驗、風險承受能力及理解相關產品的性質與風險的能力；如有需要，您亦可尋求獨立專業顧問意見，然而所有投資決定都取決於您個人的判斷。
Originally published at http://myethlabs.wordpress.com on September 3, 2019.
