अलांलिंंस ‘श्रीश्री’ राजल्लदेवीया पालय् तःगु अभिलेख

नेपालया कुंकुलामय् चाःहिलाः अनया ऐतिहासिक ज्वलं अभिलेखादि पिकयादीम्ह चांगुनारायनया भाजु मोहनप्रसाद खनाल (ज.इं. १९४९, थौंकन्हय् वानेश्वर) छन्हु नेसं १०९३÷ई॰ १९७३या शुरुइ ख्वप जिल्ला, अनन्तलिङ्गेश्वर नगरपालिका दधिकोटया अनन्तलिङ्गेश्वर देवस्थलय् थ्यन । ख्वपयापिसं अनन्तलिङ्गेश्वरयात चीहाकलं अलांलिं (‘अलाँलि’) महाद्यो धाइ ।(श्रेष्ठ २००७ः१३५) खनालजुं अन देगःया दक्षिण–पश्चिम कुं सत्तिक भित्ताय् छगू जलहरी आखः च्वयातःगु खन ।

वय्कलं भचा सिले–सफा याय्ज्या यानाः अभिलेख ३३×६५ सेन्टिमिटर नापया उकिया पाठ ब्वनादिल –

१. ॐ नमः शिवाय ।। सम्वत (ख॰शिव)॰॰॰ माघ शुक्ल
२. त्रयोदशी प्र चतुर्दश्यां तिथौ श्रवननक्षत्र व्यातिपा
३. ल योगे बृहस्पतिवासरे श्री श्री राजल्लदेव्या विजयेश्री
४. ॰॰॰ शगन ॰॰॰ दद्यांपन शुभजगतां ॰॰॰ (खनाल १९७३ः१४)

थ्व अभिलेख पिदंगु मध्यकालीन अभिलेख (व्याख्या सहित) नांया वय्कःया सफू बांलाक प्रचार मजुयाः सीमित मनूतय्सं जक स्यूगु जुयाच्वन । खनालजुं “माघ शुक्ल त्रयोदशी प्र चतुर्दशीको राजल्लदेवीको पालाको अभिलेख” पिकाःगु ३१दँय् नेसं ११२४÷ई २००४ जून ९ स ख्वपया इतिहासकार डा॰ पुरूषोत्तमलोचन श्रेष्ठ (ज॰ई॰ १९५८) अलांलिंस झाःबले अन वय्कलं उमामहेश्वर मूर्ति जवय् ग्वाखलय् तयातःगु जलहरी आखः कियातःगु खन । अभिलेख तस्सकं महत्वपूर्ण व पिमदंनिगु ताय्काः कन्हय् व कंसखुन्हु नं भाजुपिं योगेशराज (ज॰ई॰ १९६८) व विनोदराज शर्मा (ज॰ई॰ १९५५) ब्वनायंकाः तस्सकं मेहनत यानाः ख्वपया तिभय अभिलेखविद् (पुयोवि)पिसं थःगु पाठ क्वःछित –

१. ॐ नमःशिवाय ।। दाम्ब भूय शिव शुसागरा माघकृष्ण
२. त्रयोदशी प्र चतुर्द्धस्यां तिथौ श्रवन णक्षेत्रे वरिया
३. न योगे वृहस्पतिवासरे श्रीश्रीराजलदेव्या विजयश्री
४. वि(ग्र?) नि श्रगन(पि?) चतुर्द्ध यज्ञ उद्यापन्य शुभजगतां (श्रेष्ठ २००७ः१७२)

पुयोविं न्हापा थ्व खनालं (१९७३) पिकयातःगु दु धकाः मसिल । लिपा व लिसा पिकयातःगु हरिराम जोशी (ज॰ई॰ १९३६)या “मध्यकालीन अभिलेख” श्रृंखला (ल्याः४१)पाखें सिल । (जोशी १९७९–८०ः३८–३९÷श्रेष्ठ २००७ः२८)

ख्वपया पुयोवि थ्यंगु १२ दँय् छन्हु शनिवार भाजु काशीनाथ तमोट अलांलिं ई॰ २०१६ मे १४ स वन । अन भाजु तमोटं उगु जलहरी देगःया उत्तरपाखे लिउने लुखा न्ह्योने फलय् थपक्क तयातःगु खन । ख्वपया अभिलेखविद् तिभय भाजुपिंत आपालं सुभाय् ! वय्कःपिसं ई॰ २००४ जून ११ स न्हिछि बिकाः सफा यानातःगु अभिलेख आःतकं सफा हे दनि । भाजु तमोटं भाजु श्रेष्ठया सफू “अनन्तलिङ्गेश्वर”स पिदंगु पाठ रुजु यात, डिजिटल फोटो प्यपा–खुपा काल व छेँय् वयाः अस्पष्ट पाठ ब्वनेत कुतः यात — थिथि संभावना परिकल्पना यात क्वःछी मफु ।

अभिलेखय् संवत् दय्क दय्कं, दाताया नां नं दुथें च्वंसां, आखः नं बां हे लाः, भचा कुतः मगानाः ध्वाथुइके मफयाच्वंगु अवस्थाय् तमोटं तस्सकं दुःख ताय्कल । नेपालया मध्यकालीन इतिहासया थपाय्सकं महत्वं जाःगु अभिलेख ब्वनाः पार मयाय्कं गथे सुम्क च्वनेगु ? वं लुमंकल — नेपाल–जर्मनी हस्तलिखितग्रन्थ सूचीकरण परियोजना (ई॰२००२–१५)स सूचीनिर्माता जुयाः ज्या याःबले थज्यागु गुलिखे लिपि समस्या पार याःगु खः । अन यँया काशीनाथ तमोट (ज॰ई॰ १९४५), यलया राजितबहादुर श्रेष्ठ (ज॰ई॰ १९७५) व किपूया जीवनकुमार महर्जन (ज॰ई॰ १९७०) (काराजी)पिसं अन ज्या याःगु खः । भाजु तमोटं काराजी जानाः अलांलिंया अभिलेख थुइकां त्वःतेगु मनं तुन, अले मे २० शुक्रवार थःगु छेँ वन्थली (वानेश्वरय्) मुन । कम्प्युटरय् डिजिटल फोटो क्वथिक स्वस्वं, छलफल यायां, खः–मखु तर्क–वितर्क यायां ब्वंबले न्हापा खनाल (१९७३) व पुयोवि (२००४)पिसं ब्वंगु स्वयां पाःगु पाठ खनेदत ।

१. ? ॐ नमः शिवाय ।। सम्बत्सर (४)९६ स्रावणमास कृष्ण
२. त्रयोदशी–प्र–चतुदस्यां तिथ्व श्रवनणक्षत्र वरिया
३. नयोग वृहस्पतिवासर श्रीश्री राजलदेव्या विजय श्री
४. विशुनि श्रमनस्य चतुर्द्ध यज्ञ उद्यापन शुभ जगतां

(सिद्धि । ॐ शिवयात जोजलपा । नेपालसंवत् ४९६ गुंलागा त्रयोदशी–पर–चतुर्दशी तिथी श्रवननक्षेत्र, वरियानयोग विहीवार “जुजु” राजल्लदेवीं शासन यानाच्वंबले श्री विष्णु शर्माया चतुर्थी यज्ञ क्वचाय्कुगु जुल । जगत्या भिं जुइमा !)

लिधँसा
खनाल, मोहनप्रसाद, १९७३॰ मध्यकालीन अभिलेख व्याख्यासहित । काठमाडौं ः स्वयं, विसं २०३० असार ।
जोशी, हरिराम, १९७९–८० “मध्यकालीन अभिलेख” । प्राचीन नेपाल, संख्या ५३–५६ (विसं २०३६ भदौ–चैत्र), पृ॰ ४– ४६, संख्या ४१, पृ॰ ९८–९९ ।
श्रेष्ठ, पुरूषोत्तमलोचन, २००७॰ अनन्तलिङ्गेश्व्र । भक्तपुर ः अमनलोचन श्रेष्ठ, विसं २०६४ वैशाख ।

साभार ः पलिस्था ल्याः २५, (नेसं ११३६ यंला, २०१६ सेप्टेम्वर), पौ ७०–७१