“किलं मनःगु पौ” ब्वनाः
कमलरत्न तुलाधरजु,
गोरखापत्र समावेशी स्तम्भ “नयाँ नेपाल”या नेपालभाषा पृष्ठय् नेसं ११४० दिल्लाथ्व पारु तिथी, दिल्ला (असार) ८ गते सोमवार, ई. २०२० जून २२ तारीखय् पिकयादीगु “किलं मनःगु पौ” (पौ ६) ब्वनाः लय्ता वल।
ल्हासाय् बनय्ज्याय् वंम्ह थःभाःतयात नेपालय् च्वंम्ह छम्ह तिरिमय्जुं नेसं १०७५ (ई. १९५५)स च्वःगु निपु पौ छिं पिकयादिल, गुकी थःभाःतयात सम्झे याय्गु भाखां थःगु नुगः खँ प्वंकातःगु दु। भाःतया पौ वयाच्वनधाःसा छेँ च्वंपिंत गुलि सान्त्वना दइ धैगु खँ नं क्यनातःगु दु।
थुपिं पौया थिथि विशेषता दु-
१. न्यादँ खुदँ न्ह्यो ल्हासाय् वंम्ह भाःतया मनस्थिति थुकी चित्रण दु। व नेसं १०६९-७०/ई. १९४९-५० चीनं सँदेय् काःगु ई खः। ई. १९५० अक्टोबर६-१०५१ मे २३स चीनं सँदेय् कब्जा याःगु खः। व अनया धार्मिक शासक दलाइ लामा १९५९ मार्चय् भारत बिसुं वने न्ह्योया अवस्था खः। अझ थ्व चीनय् जूगु विनाशकारी सांस्कृतिक क्रान्ति (१९६६-७६)या पृष्ठभूमि काल खः। तिरिमय्जुं हःपा बिल-
मेगु ल्हासे गोल माल याना बीइ धैगु साप धन्दा कयादीगुयात अपायेसकं छाय धन्दा कयादियगु गथे याय माल अथे यायज्यु।
२. नेपालय् राणाशासन वांछ्वया: प्रजातन्त्र (नेसं १०५१/ई. १९५१) वय्धुंका: नेवा: मिस्तय्सं च्वये-ब्वने सय्का: थ:भा:तयात पौ च्वःगु प्रजातन्त्रया लिच्व: ख:।
३. अबले ल्हासाय् वंपिं साहुतय् मस्तय् मनोविज्ञान नं थुकी दु- मचानं न्हीन्ही नुग मछिंका हालाचोनी- बा आतक मव धाई।
कमलरत्नजु,
छिं थपाय्सकं महत्त्वपूर्ण ज्वलंयात हलुका रूपं कयादिल। सुनां सुयात छ्वःगु तथ्य आःया जमानाय् नं सुचुके माःला? थथे नां गां मदुगु न्ह्यथनां इतिहासयात कल्पनां च्वइगु बाखनय् हिलाबिल। अझ किपा बियाः पिकाय्माःगु खः। छिं देगःचायात अःगःचा रूपं न्ह्यथन, हीरायात ल्वहंचा रूपं क्यन। थथे नेवाःतय्के दय्माःगु इतिहास-चेतना मदयाः जुयाच्वंगु खः। तस्सकं पुलांगु मखय्कं महत्त्व मबीगु नेवाःतय् स्वभावं नेवाःतय इतिहास सुलाच्वन। जिं स्यु, चित्तधर हृदयजुं ल्हासां छ्वयाहःगु वय्कःपिनि पारिवारिक पौ नेपालभाषा परिषद्-यात बियामदी, आः छु जुल मस्यु। (न्यनाकथं. व फणीन्द्ररत्न गुरुजुयाके दु। जिं छुं ल्ह्ययाः पत्रिकाय् पिकयातयागु दु।)
कमलरत्नजु,
छिं चाहे जूसा आशा सफूकुथी थज्यागु पौ, ज्वलं जुगौंजुगतक ल्यंकातय्त, जनसाधारणं स्वय्खंक, अझ ल्याःकिपा (डिजिटल) कयाः संरक्षण यानाच्वंगु दु, अन बियादीफु, छिगु सङ्कलनया ब्यागलं दराज वा छगू खण्ड कयाः मुंका तय्फु। थ्व जिं थः आशा सफूकुथि गुथिया संस्थापक दुजः व कार्यकारी गुथ्याः हैसियतं धयाच्वना। अपाय्सकं महत्त्वं जाःगु पौ व्यक्तिगत ताय्काः सुचुका तयादीमते। व नेपाः- सँदेय् स्वापुया नेसं १०७०/ईसं १९५०दशकया इतिहासया दसिपौ खः। सुभाय्!
काशीनाथ तमोट
वन्थली (वानेश्वर), यँमपा ३१
