香港人出盡200％力先贏對家馬鼻
香港區選分析（一）
區議會舉已經過左幾日，大家要開心要慶祝的都差不多了，係時候睇一睇今次的區選的客觀數字。
小弟稍稍整理了2015年及2019年的區議會選舉的數據
睇完數據後，直接講總點
1. 非建制派的選票比上屆多了188％，是接近了2倍的數目。同時建制派也不弱，比上屆多了53％的選票。
2. 在香港這個政治環境，真的沒有中間派。看數字就知了，從上屆的5％下跌到今屆0.5%，下跌了90％。可以說近乎收皮，被消滅。
3. 再細心睇依4年間的選民人數登記，61–70歲年齡層的選民增長數目超級誇張，有近46%增長。而年輕選民，只係10％多點，相對年老的選民增長，車尾燈都見唔到。
（由於選委會未有按年齡的投票率，所以暫且根據現有資料去作分析。之後有按年齡的數據，才再作分析）
從數據中睇到的啟發
香港人要被殺到埋身先識珍惜選票
今年最誇張的是黃絲的那一方選票增加了100萬，足足比上一屆多了接近2倍（188％）的數字，是極其恐怖。那問題來了，多出的100萬選票從那裡來呢？雖然選民登記數目是多了100萬，但不可能全部都是黃絲。
細心睇一睇100萬選民，當中有25萬的增長都是來自61歲以上，17萬增長是來自18–40歲。我地假設17萬的新增選民都是黃絲，黃絲陣型仲有83萬新增選票係邊到來呢？
我想到的解釋有幾個
第一，有好多中間派，或者中間偏藍陣型的選民，轉變立場改投黃絲陣型。如果用劉細良的分析，依批中途轉陣的大約有10％，即是大約2萬9千人。
第二，剩番既83萬選票邊到來呢？剩番最大既可能性就係，過去很多黃絲都沒有重視自己的選票，直到今次香港運動要去到流血死人，他們才會發覺要好好珍惜自己選票，繼而今次走出來投票。粗俗點講，即係唔屌唔鬆化，係都要去到最惡劣既時候先出來投票。
建制派的配票能力極強
如果燈神蕭若元的消息是真的話（唔知佢邊到收到既風），建制派預計今次總得選票是120萬。大家睇一睇建制派的選票，真係剛剛好120萬票。真係CLS，究竟佢地點樣先可以做到甘精準，我真係唔知。可以想像到背後龐大的選舉機器的恐怖之處。
今次區選的制度係單議席單票制，只要嬴一票都係贏。但去到立法會的選舉，係玩比例代表制，簡單來講真係玩配票。配票配得好，就可以送幾個人立法會，配得唔好，仲會犧牲埋隊友。今屆同過去好多泛民政客為求延續自己政治生涯，出來爭選，鎅票鎅到令建制派當選。
麻煩今屆既黃絲政黨同議員，乖乖地聽聽話做好立法會選舉策略，唔好亂甘鎅自己友票。建制派的配票機器真係好恐怖
中間派同老人家足以左右大局
正如上文提到，粗略估計有10％的中間選民中途轉陣。這些選民可以關鍵時候足以影響大局。各位議員同政黨，記得用心了解中間選民既想法。依個的確係考驗政治智慧，唔容易但好重要。由於我明顯地唔係中間選民，唔完全理解佢地既想法，所以就不作評論。
反而大家記得關注下老人家就真。大家唔好唔記得，香港係人口老化，老人家既數目只會多不會少，依批選民長遠既影響力依然係到。
如果再細心睇番新增選民數字，61歲以上的新增選民係名年齡層最多，有近25萬新增選民，而佔整體選民數目係32％，又係一個左右大局的選民群體。試諗下，老人家行兩步路都話累，又老花唔識填表格，唔會無拉拉登記選民。最大可能性係建制派好落足心力去幫d老人家做選民登記，跟住打好關係，選舉時就動員佢地出來。
大家要了解到依批老人家既特性。
第一，佢地去到依個年紀，其實最需要係有人關心照顧佢地，得閒有禮物有活動玩就好滿足了。佢地唔係好消化到理解到政治立場既分別。只要佢覺得個議員係好人，就會聽佢講跟住投票。
第二，年輕人會周圍玩同出去工作，很少在自己區生活。但老人家唔會，佢地既生活圍子多數係自己區，自自然然就結識左一班老友記，如果班老友記動員起來，真係可以做到一拖十，一個拖住十個來投票支持你。
各位新上屆區議員，政治理念固然重要。長遠健康的做法始終是還原基本步，做番地區工作，關心當區市民的需要，先係長遠之計。
深入了解失蹤左的3成選民
現在有一個未知之數，就是有3成的選民沒有登記，我唔知道是什麼原因。
可能因為繼續政治冷感，可能因為唔認同個選舉制度，又可能覺得今屆冇一個候選人代表到我，所以就唔選啦。
我唔知道。我只知道佢地今次唔投票，下次立法會有可能會投票。究竟佢地諗緊咩，思考緊咩，真係冇人知。
如果大家搵到，記得多多了解，爭取佢地既支持。
香港人唔好偷懶，請珍惜你手中的選票
建制派的配票能力無容置疑，佢地隨時可以唔知邊到變出幾十萬選票，係完全唔出奇。
今次點解黃絲可以贏，係因為好多以前唔投票既走左出來投票，有好多政治冷感既人變得關心政治。
足足比上屆動員左超過100萬人出來投票，超過180％，即係接近2倍啊，係動員左超過2倍既人先至可以贏啊！
仲要係動員左2倍既人，先至多對家20％選票。簡單來講，我地出盡200％力，先跑贏人地個馬鼻。
再次強調，因為區議會係票多就贏。但下年立法會選舉就唔係，絕對會贏選票，輸議席
如果大家繼續相信選舉制度，覺得現時既制度可以解決到社會問題，請好好珍惜自己手中的選票。
立法會記得出來投票，keep住70％投票率，什甚超過70％就最佳。
麻煩政客議員，唔好周圍鎅票
上文都有提到，有幾個政客為左自己，早去參選，選唔到都輸，反而鎅左自己友既票，益左對家。
麻煩依班友仔，唔好再出來獻世。
總結：
其實我內心係好矛盾，
如果我地可以早點政治覺醒，香港人就唔會甘大犧牲，甘多流血死亡被失蹤被自殺。
但係如果冇左今次既運動，冇左今次既「極大痛楚」，大家係唔會覺醒，唔會知道要改變，並且發現自己有選票可以用。
之後既事冇人知，只可以講，如果大家繼續相信選舉制度，覺得現時既制度可以解決到社會問題，請好好珍惜自己手中的選票。
唔好等到自己身邊既人死既死，傷既傷，先再發覺自己有選票可以用。
PS1：唔好問我點解2015年既兩個選民人數會唔一樣，我都好想知，問番選委會。
PS2：其實我唔太贊成分黃藍兩邊，但方便講述，唯有用住先。
PS3：我對現時既選舉制度係有保留。但因為寫緊區選分析，唯有當住個制度仲OK先
喜歡就係下面拍幾下手掌或者share俾其他朋友以示支持。
