Numerong Hindi Mapakali
Nakakaba. Nakakabagabag. Nakakatakot.
Tuwing tutuntong sa parisukat na salamin
Tila mga numero’y hindi mapakali
Nobenta? Isang daan? Pataas nang pataas
Nangangambang makita ang numerong lalabas
Isang daan at limampu’t isa?
Saka’y sasabihin “baka bukas bumaba na”
Paulit-ulit na lamang, parang walang nagbabago
Kailan kaya matatapos ang pagdurusang itinatago.
“Uy alam mo parang tumataba ka,”
Kadalasang naririnig na mga salita
Mga salita na dapat wala namang halaga
Pero binubugbog ang damdamin, bakit sakit ang nadarama?
Isang daan at dalawampu’t isa
Bubulong sa sarili “kailangang bumaba pa”
Almusal, tanghalian, merienda at hapunan
Alin lamang sa apat ang aking dapat kainan?
Nagaalala sa kung ano ang baka sabihin
Sapat na ba ang numerong nakasaad sa salamin?
Di mapalagay ang mga naiisip,
Paghinga’y bigla-bigla na lamang sumisikip
Tumuntong muli at ibang numero ang nakita
Nakasulat dito’y walumpu’t lima
Pasok na ba ito sa sinasabi nilang pamantayan,
Tanging numero lang ba ang nagsisilbing batayan?
Pero bakit? Bakit tila may kulang?
Di man lang nakaramdam ng onting saya
Di man lang nagiba ang sakit na nadarama
Hindi pa ba sapat? Hindi pa ba ito sapat sakanila?
Nang humarap sa salamin, kalansay ang nakita
Ngumiti sandali’t biglang bumuhos ang luha
Kahit anong gawin, hindi magbabago
Kahit anong gawin, mga mata’y nakasarado.
Tama na.
Rianna Gallardo is a 17-year old Senior High School student from the Philippines and contributor to the Of The People publication. If you’d like to have your work featured in our platform (whether visual or text), you may send in a submission to our email here.
