總覺得今年過得好快，可能因為開返關有得去旅行，行開行埋啲時間過得快好多，又或者係我真係做左好多野，太充實而自己唔知，哈哈！
1. 冇諗過會飛8轉
特登忍到3月先去第一次旅行，個時仲好糾結要唔要買全年旅遊保險，因為冇假應該唔會點飛，結果好後悔冇買。解鎖新國家：泰國，然後見左啲幾年冇見既外地朋友。
2. 冇諗過飛去韓國追星見本命
8轉入面，有4轉係飛去追SJ，但問題係我本命希澈因為傷患係參加唔到演唱會，今年終於等到有線下fan meeting而佢有參加仲好努力跳跳紮，上次見佢係5年幾前，個陣仲要有成員當緊兵唔齊人，所以今次見到佢地整整齊齊我真係哭咗。
3. 自學韓文有進步
多得追星buddies慫恿用duolingo 學韓文，至今堅持咗近半年日日用，本來我啲韓文只係由綜藝同被SJ迫出嚟，所以只係得聽力同冇文法可言嘅會話，兼極抗拒睇文字，最近我發現睇幾行字的話係大概理解到，有啲感動。
4.開始做運動
年頭冇防疫限制之後走返去上yoga，本身想學pilates，希望練下線條，不過諗諗吓自己又冇基礎又冇力量，咁貴都係盞嘥錢，所以都係報返價錢相宜嘅mat yoga。好好彩上頭幾堂就遇到好老師，好有心機教又唔push，每個動作都講解好詳細，要郁邊啲肌肉部位，初學者通常點樣做錯等等，我突然間好似開左竅咁，發現自己之前根本一塌糊塗，好多動作只為自己做左，其實都唔啱，所以先會又辛苦又痛(不正常嘅痛)。依家需要都係好初階，仲係好冇力量，但係啲筋鬆左好多，體態已經大大改善，冇左圓肩同寒背，高咗2cm！最緊要係少咗胃痛，黎緊希望可以將我啲內臟拉返啱位，等個腩可以縮返啲入去，唔使怕有人讓座比我！仲有2個月前開始埋打羽毛球，我超weak但會盡量堅持每星期打一次，當練下體能少啲頭暈。
5. 開始養生
平日太匆匆忙忙，留比自己嘅時間都好少，今年隔咗幾年先去洗牙，先發現我從來冇愛惜佢，有啲問題依家先處理已經太遲，唯一好彩冇爛牙。仲有頭皮情況唔好，又甩得多頭髮，依家希望慢慢可以改善返。而養生最大成果除左胃痛少咗，就係頭痛都少咗，因為我發現原來頭痛原因係太濕！太濕原因係身陳代謝唔好同埋食得太多濕野，濕野入面最被忽視嘅係小麥！！我勁中意食包呀麵呀個啲！懷疑自己係麩質敏感！！（我之前仲笑啲西人跟風要gluten-free，依家可能中回力鏢）總之食少左濕野同keep住食去濕supplement係好左，人都精神左。雖然同健康仲有好大距離，不過有進步有改變先係最重要，所以下一步就係安排去做body check。
6. 活在當下
真係有意識地實踐呢個觀念，想食嘅嘢就食，想見嘅人就見，想去嘅地方就去（泛指出埠，與前句相關），提醒自己每日都可能係最後一日，唔好留（更多）遺憾，同時每晚望到枕邊人都好感恩有佢存在，令我安定好多。無條件嘅理解、支持同愛護真係唔係老馮，我認為我哋互相都值得呢份愛嘅，會繼續一齊努力面對更多挑戰。
7. 自我關顧
照顧自己心靈真係好老土，但係只有自己幫到自己，為左解結睇左好多書，練習緊放下，練習減少焦慮，雖然思想唔係一時三刻改變到，但係我感覺到自己有越來越活得自在，多左欣賞自己，少咗覺得自己唔夠好，會認同自己一啲能力，接受自己係同「主流」有別，唔再因為呢樣野而自卑。
8. 拓展收入來源
好好彩今年有新freelance，唔係one-off嘅工作，大大增強咗我嘅信心，同時都有嘗試增加自己工作效率（雖然時得時唔得，但接受自己有pattern），有機會就嘗試新嘢，唔係樣樣野都有成果，不過踏出第一步去嘗試建立新嘢係非常重要。需知道INFP人成日有好多天馬行空嘅幻想，但甚少有方法將想法變成現實，我覺得呢樣嘢對我嚟講係好大嘅進步。
9. 認清自己目標
承上題，努力搵錢其實都係想令自己有多啲選擇，其實我越嚟越清楚自己唔想打死一份工，唔鐘意返full time，以前冇其他收入就唔夠膽咁諗，直到依家慢慢build up，慢慢explore，加埋身邊嘅人輔助，雖然只靠freelance都未夠開飯，但係會努力explore唔同機會，得閒又學下新skills咁！
