一個個人經歷：奉太座之命買日用品，諸如廁紙、牛奶、 BB 游水尿片等。喺香港，如果唔想落超市排隊等畀錢、唔想自己拎，其中一個常見方法係用 HKTV Mall 網購。喂，呢啲貼身甚或擺落口嘅嘢，我真係唔會淘寶。
其實自從 HKTV 嘅王維基因為「一籃子因素」 (a.k.a. 一男子因素) 而做唔成電視大亨，折衷繞道搞網購以戰養戰，好多香港人出於同情心或者同理心而對 HKTV Mall 愛護有加，程度比起十幾廿年前嘅蘋果速銷有過之而無不及。
問心，香港人口八百萬，人煙稠密而需求有限，情況同 Amazon 或淘寶/順豐郁啲就穿州過省搭飛機係完全唔同。 HKTV Mall 一直都喺送貨派遞方面為人垢病，送唔齊、送遲咗、送錯嘢、送啲即日到期嘅嘢⋯⋯作為佢嘅客人唔㷫過火屎就假嘅。
而當置記加入「苦主」行列之後，我喺施展「投訴」呢項香港人「國技」 (另一項係喺機場候機室影航班登機告示板) 之前，係用盡方法去查詢同跟進嘅。不幸地， HKTV Mall 真係融入網上世界，只有 Live Chat 同電郵提供客戶服務，冇電話號碼可以打去跟進。
而 HKTV Mall 嘅 Live Chat 不幸地只限朝十晚九提供服務，我試過夜晚八點開始等，排第廿幾，一路滿懷希望排到第四⋯⋯然後忽然跳上第一，滿心歡喜之際系統彈出錯誤訊息，原來夜晚九點服務時間已過明天請早！
一次嘅挫折令人氣餒，再次嘅氣餒就難免令人憤怒。結果置記都係喺 Facebook Page 度發爛渣：
然後，喺一個星期日嘅下午，置記收到奇洛李維斯回信⋯⋯唔係，係王維基本人喺呢個 post 下低留言：
經過婉言拒絕 (置記又唔係要王生本人跟單 )，王生好快又回覆：
嚟到呢度，以一個顧客嘅角度嚟講，係唔可能再挑剔王生嘅誠意同鞠躬盡粹。但係置記份人都係挑剔，挑剔嘅係王維基先生喺一個唔恰當嘅時候、由一個唔恰當嘅人、做唔恰當嘅嘢。
時光倒流至 2015 年 8 月，其時王生親自為 HKTV Mall 送貨。大家都明白，王生係公司嘅 icon ，有咩 Marketing 好得過由佢本人捋起衫袖、落手落腳為客戶服務？但係所有行銷活動都總有個限期，麥當勞十蚊包都會加價加到十一蚊啦。王維基送貨送得一時，送唔到一世。
何況王生作為公司嘅主席及執行董事，崗位同職責理應係為公司業務發展提供方向、訂立財務目標、制訂政策、推動公司員工依樣畫葫蘆。如今 HKTV Mall 解決唔到送貨問題，原因之一係訂單多咗呢個 Happy Problem ，單計…
