今勻實冇死錯人。
話說香港股壇史上超額認購倍數最高嘅「毛記葵涌」 (1716) 上市，三位創辦人 (腦細) 喺上市儀式之後並未親自回應記者提問，而係由其中一位幕前同事「專家 Dickson 」代勞。
「專家 Dickson 」亦不負所託，喺答問環節答非所問，全程帶財經記者遊花園，例如記者問毛記會否同中資公司合作， Dickson 就反問係咪「中立資金」，搞到財記姐姐頂唔順要補充「內地企業」。經過幾分鐘之後，有行家按捺不住問 Dickson 「你公司有冇其他人可以答到啲實際啲嘅嘢」，對住 Dickson 扯晒火，認真無奈。
或者你會話，扯，無厘頭啫，啅頭嚟啫。但其實，財記們喺答問環節嘅問題，本身已經係得啖笑。與其怪責 Dickson ，不如反省下自己做乜唔熟書。唔使多，兩本就夠：首先係「毛記葵涌」嘅招股書，另外就係香港交易所嘅《上市規則》。
係呀，專家 Dickson 玩轉交易大堂，並唔係咩營銷或公關問題，而係合規問題。乜又係你呀 Compliance ？
留意返 402 頁嘅招股書，裡面除咗林日曦佢哋幾位住邊，以及一大堆風險披露條文，呢兩種有娛樂性同極為悶蛋嘅資料之外，仲有一啲實用資料，例如話毛記葵涌委任咗長雄證券擔任上市保薦人及合規顧問。係呀，毛記都要請 Compliance Advisor ，確保公司上市過程同上市後都遵守相關法規。
喺香港交易所集資上市，涉及嘅係第 6 類受規管活動 (就企業融資提供意見，英文係 Advising on Corporate Finance ，Type 6 Regulated Activity) 。唔係咩第五類危險品，只係其中一種受證券及期貨條例 (SFO) 規管嘅活動。
咁當然，腦細們係唔會知道搞新股上市有啲咩係要留意返嘅，叫佢度條廣告推銷下保育粉嶺高爾夫球場可能都仲容易少少。正因為咁，公司上上下下對外公開發言講乜做乜，都要有個專家幫手指點迷津。唔係陣間一個唔覺意，上市前漏口風講咗啲招股書冇嘅嘢或者同招股書唔相符嘅東西出嚟，影響咗個上市審批過程就弊傢伙。
所以呢，就合規事宜為毛記把關嘅責任，就落咗喺保薦人身上。上市之後嘅合規事宜，就交畀合規顧問。
咁你話，新股分配結果派晒彩、上咗市咯，招股書都成為過去啦，仲有咩好驚？大把嘢要驚。毛記作為網媒，幫邊個拍廣告做宣傳，每一單生意都可大可小。難為有個財記走去問 Dickson 嚟緊會唔會同邊間信用卡公司合作，你叫人點答你？當自己娛樂記者呀家下？ Dickson 唔知猶自可，知道爆響口就隨時係將上市公司內幕消息公諸於世，視乎重要性，有可能觸及上市公司披露消息嘅要求。最極端嘅情況下， Dickson 喺上市儀式後講錯嘢嘅後果可以係導致股價大幅波動 (雖然冇講錯嘢都係好大波幅) ，公司或者需要出公告澄清，甚或要暫時停止買賣。上市首天就柒姑碌要停牌，呢舖真係 1716 。大吉利是咩。
問心嗰句，有邊一次上市儀式之後啲上市公司高層出嚟講嘅嘢係有新意、有創意架？唔係人哋唔想呀，係人哋個崗位唔 supposed 喺呢啲場合爆料丫嘛。你唔見李嘉誠宣布退任長和主席都要等到收市之後嘅業績發布會先講？唔係要擇時辰呀，係要避免影響上市公司股價呀。呢啲可能影響到市場秩序嘅行為，基本上係每間上市公司嘅要員同每個持牌人士都要小心謹慎。咁我都知財經記者唔使考 HKSI Paper 1 都做得嘅，但係埋怨 Dickson 講嘅嘢唔實際，就真係未免強人所難咯。
如果我係毛記嘅保薦人或合規顧問，無論係林日曦、盤菜瑩子定係 Dickson 行出嚟講嘢，我都係要教佢依書直說。一句到尾：「無聊嘢唔怕講，重要嘢千祈唔好講。」
利申：我冇 6 號牌，純粹係用常識加少少 research 去解釋返當財記遇上 Dickson 嘅窘境同背後嘅原因。
