Bampira
Pulang-pula na ang lipstik,
pero kulang pa.
Hayaan mo akong kagatin
ang iyong matambok na labi
hanggang sa ito’y dumugo
nang kaunti.
At kapag nasimulan kong sipsipin
ang munting patak,
tuluy-tuloy na hanggang ika’y
maubusan ng laway
at mamatay bilang mortal.
Kaluluwa’y magiging kampon
ng dilim na rin
katulad ng sa akin.
Magpapatuloy ka sa paglalakbay
sa iyong laman ngunit bilang
isa nang sinumpa,
at tuluyang magsasama tayo
nang walang-hanggan
dito sa lupa.
This article is published by Pluma Manila, a Creative Platform for Everything Filipino. If you’re Filipino or Pinoy at heart, Be part of our team and share your craft with us. Maraming Salamat!
Write for us! Send us an Email: plumamanila@gmail.com