Usóg
A Bikol poetry
Nagpoon ng higopon kan bulan
An sulo kan saldang
Asin nagsiluwasan na man
An mga aninipot
para paluwason
An kagayonan
Asin kamurawayan
Kan Kabanggihan
Nagpoon naman an pagkalúlà ko
Biyong nag-iirikot an payo
Maayos pa man ako kan subago
Tàno bigla nalang naglain an pagmati ko
Sarong lugar man lang an dinumanan ko
Sarong tawo man lang an nakaulay ko
Tàno ngunyan pang banggi
Kun noarin ako mauli
An bangging dayupot
Sa saiyang palibot
Tinawan akong giya
An mga aninipot
Dai gayong madiklom
An sakuyang paglakaw
Maski na nililipot
An hawak kong putpot
Maray nalang talaga
Yaon an mga aninipot
Sakong giya sa paglakaw
Sa bangging malipot
Dai ko maintindihan
Kun tano birigla nalang
Garo ako natalang
Ano daw an nangyari sako?
An pagmati kong pusog
Ngunyan kaipuhan nin kasurog
Ano daw kun ako na-usóg?
·Usóg; a culture-bound syndrome where a visit by a stranger afflicts a child with sudden illness and convulsions. from: https://en.wiktionary.org/wiki/usog
𝘩𝘦𝘭𝘭𝘰𝘱𝘰𝘦𝘵𝘳𝘺:
https://hellopoetry.com/poem/3988278/usog/
𝘐𝘯𝘴𝘵𝘢𝘨𝘳𝘢𝘮:
https://www.instagram.com/p/CD4EMXThARH/
This article is published by Pluma Manila, a Creative Platform for Everything Filipino. If you’re Filipino or Pinoy at heart, Be part of our team and share your craft with us. Maraming Salamat!
Write for us! Send us an Email: plumamanila@gmail.com
