إطار داخل إطار : من ماقريت الى The Shinning

a frame within a frame طريقة تصوير تستخدم لجذب انتباه الي يشوف لجزء معين من الصورة.

الفكرة انك تشوف المشهد او جزء الي تبي حد يركز عليه و تشوفله اطار في الخلفية متاعه, بحيث تركز انتباه المشاهد و تزيد تأثير الصورة متاعك.

طبعا فكرة إطار داخل إطار موجودة حتى في التصوير السينمائي. أول مشهد يخطر في بالي بعد نفكر في مبدأ الإطارات, هو المشهد من فيلم The Shinning, الموجود في الصورة تحت.

The Shinning, 1980

المشهد يخليك غصبا عنك تركز على التوأم, المحطوطات في إطار اولا من الممر, ثانيا من الروشن الي وراهن, هذي تعطي في المشهد قوته. الإبداع كله في كيف يتم توظيفها

فكرة الإطارات المتداخلة مش مقتصرة على التصوير او السينما, تستخدم حتى الرسم و استخدمت على مدى العصور, في بورتريهات مختلفة.

بعد نفكر في المبدأ هذا, اول لوحة نفكر فيها- الاحرى سلسلة لوحات- لرينيه ماقرييت.

رينيه ماقريت فنان بلجيكي, سيريالي, مشهور جدا, انا متأكدة الاغلبية شايفينله اقل حاجة لوحة

The Treachery of Images ( This is not a pipe).

لوحات ماقريت امتازت بقدرته على انه يستخدم حاجة عادية جدا و يحطها في مشهد غريب عشان يعرض افكار مختلفة, نفس مثلا مع الغليون و فكرة انه الحاجة مش نفسها اسمها.

The Empire of Light, 1955

إبداع رينيه عندي شخصيا نشوف فيه في مجموعة إمبراطورية الأضواء. مجموعة من ثلاث لوحات, لما تشوف وحدة منهن ,تبان صورة حوش و شجر و سماء, مش حاجة مميزة يعني, لعند تفطن ان المشهد ليل و نهار في نفس الوقت.

The Human Condition,1933

الصورة على اليسار, مثال على -إطار داخل إطار- اول ماتشوفها تبان لوحة لاندسكايب عادية, بعدها يبان إطار اللوحة داخل اللوحة.

انت قاعد تشوف في الشجرة, بس مش الشجرة “الحقيقية” الشجرة الي باينة عليك من اللوحة -الثانية- لو فرضنا المشهد برا هو الحقيقة .

هذا انا كيف نفسر في اللوحة و اسمها “ الحالة البشرية “.

نحنا عمرنا مانشوفوا في “الحقيقة” كلها. كل الي نشوفوا فيه و نعرفوه عبارة عن تدرجات لشجرة الحقيقية. كل حد يشوفها او حيفسرها على حسب فهمه, بيئته و ما الى ذلك من اختلافات بينا.

النزاعات و المشاكل ديما ناتجة عن الاختلاف هذا وكيف كل حد يشوف في المشهد من جيهته. هذا الي نحس في رينيه كان يقول فيه من اللوحة هكي, او حتى لو مش هذي فكرته, انا هكي فسرتها.

بس هل معنى الكلام هذا انه مستحيل نشوفوا “الصورة الاكبر” يعني ممكن نقعدوا طول عمرنا عايشين في إطار الضيق هذا ؟ مافيش كيف يتوسع؟

الإجابة في القراءة, اهم فوائد القراءة مش بس القراءة, مشاركة القصص الشخصية بصفة عامة, كيف ما في مشروع سيلفيوم مثلا, تخلينا نحطوا روحنا مكان الاخر. بعد تقرا قصص ناس سوا حقيقين او من محض الخيال, حاجة توسع تفكيرك و تزيد تعاطفك معاهم و تفهمك لظروفهم, حاجة تخليك مش محصور في إطار داخل إطار .

One clap, two clap, three clap, forty?

By clapping more or less, you can signal to us which stories really stand out.