Suw perisi ýene-de ekranlarda ýa-da “Kandagar” atly täze film

Hepdäniň täze filmleri makalamyzyň bu sanynda 4 ekran eseri barada gysgaça söhbet açarys. Ilkinji filmimiz telim gezek gaýnadylan çaý suwy ýaly, meşhur eser “Kiçi suw perisi” (Little Mermaid) bolup, Hans Kristian Andersonyň 1837-nji ýylda ýazan ertekisini bu gezek Rob Marşall ekranlaşdyrdy. Elbetde Robert Marşall diýmek mýuzikal kinolar diýmekdir. “Çikago” (Chicago), “Dokuz” (Nine), “Tokaýda” (Into the Woods), “Meri Poppinsiň gaýdyp gelmegi” (Mary Poppins Returns) ýaly ilhalar mýuzikal kinolary surata düşüren režissýoryň “Geişanyň ýatlamalary” (Memoirs of a Geisha) hem-de “Karib deňziniň garakçylary: ýabany kenarlarda” (Pirates of the Caribbean: On Stranger Tides) atly mýuzikal bolmadyk filmleri-de bar.

“Hollywood”-yň mýuzikal filmleriniň iň ökde režissýorlarynyň hatarynda görkezilýän Marşallyň bu täze blockbuster-i hem mýuzikal görnüşde bolup, kinonyň býujeti 250 million dollara deňdir. “Walt Disney”-iň önümi bolan kino studiýanyň ozalky animasiýalaryny “live action” filme öwürmek kampaniýasynyň çäginde ekranlaşdyryldy. Mälim bolşy ýaly, “Kiçi suw perisi” atly animasiýa 1989-njy ýylda halk köpçüligine ýetirilip, ululy-kiçi hemmäniň söýgüsini gazanypdy. Animasiýa türkmen telewideniýesinde-de gaýta-gaýta efire berildi.

Ssenarisi Dewid Magi tarapyndan ýazylan filmde baş keşbi — Arieliň keşbini, ýaş aýdymçy, ol sanda aktrisa Holli Beýli janlandyrýar. Şeýle-de, Jona Hauer-King, meşhur komediýaçy Melissa MakKarti, oskarly aktýor Hawier Bardem, Noma Dumezweni, Art Malik, Dawid Diggs, Awkwafina ýaly artistler surata düşdüler, hemem gahrymanlara ses berdiler.

“Awatar: suwuň ýoly” filminden soň ýene bir suw asty temasy bolan bu kino aslynda hemmäniň bilýän temasy. Ýagny Ariel öz arzuwyny amala aşyrmak üçin betpäl Ursula bilen ylalaşýar. Ýöne Ursula ondan mahmal sesini alyp, ýerine ýerde ýöräp biljek aýak berjekdigini aýdýar. Netijede, Ariel Ursula bilen ylalaşyp, ýalňyşandygyny öwrenýär, ýöne bu käbir zatlar üçin giç bolýar …

Aýdym-sazly filme berlen baha o diýen ýokary bolmasa-da, ýöne pes hem däl. Demirgazyk Amerikadaky 4300 kinoteatrda görkezilip başlan film “rottentomates” tarapyndanam, metacritic tarapyndanam ortaçadan ýokary baha aldy. Ýagny ekran eseri filme tomaşa edenleriň 60–65 göteriminiň göwnünden turdy.

135 minutlap dowam edýän filmde jemi 37 soundtrek bolup, onuň dowamlylygy 1 sagat 18 minuda deňdir. Filmde ýaňlanýan, has takygy, başdan-aýak bar bolan sazlary Alan Menken ýazdy. Filmdäki Arieliň ýerine ýetirýän aýdymlaryny-da Holli Beýliniň özi ýerine ýetiripdir. Umumylykda filmde 15 töweregi aýdym bolup, 40 minutlyk bu aýdymlar ýörite soundtrek hökmünde-de satuwa çykaryldy. Filmiň azyndan çykdajysyny ýapmagyna, hatda 400–500 aralygynda girdeji gazanmagyna garaşylýar. Filmiň girdejisi eýýäm ilkinji 3 günde 185 million dollardan geçdi.

Ikinji filmimiz hem edil “Kiçijek suw perisi” ýaly, iň bolmanda şeýle at bilen surata düşürilen birnäçe filmiň biri bolup, ol “Kandagar” (Kandahar) diýlip atlandyrylýar. Adyndanam belli bolşy ýaly film Owganystan urşy bilen baglanyşykly. Filme “Felon”, “Snitch”, “Angel Has Fallen”, “Greenland” ýaly filmleri surata düşüren Rik Roman Wau režissýorlyk edýär. Filmde baş keşbi režissýor bilen Angel Has Fallen, Greenland kinolarynda bile işleşen belli aktýor, uruşly filmleriň ýyldyzy, Hollywood-yň şotlandiýaly artisti Jerard Batler ýerine ýetirýär. Gaý Riçiniň “The Covenant” filminden soň Owgan urşy bilen baglanyşykly ýylyň 2-nji kinosy bolan bu ekran eserinde CIA jansyzy Tom Harrisiň hakykatda kimdigi we gizlin operasiýasy äşgär bolýar. Ondan soň ol terjimeçisiniň kömegi bilen özüni halas etmegiň külküline çykýar. Ol gyssagly ýagdaýda öz topardaşlarynyň ýanyna, Kandagara (ýa-da Kandagara) gaçmaly bolýar. 2 sagatlyk dowam edýän kinoda Nawid Negahban, Ali Fazil, Nina Tussan-Waýt ýaly artistler Jerard Batlere ýoldaşlyk edýärler. Ssenarisi Mitçell LaFortun tarapyndan ýazga alnan film kinokritiklerden ortaça baha aldy. Ýöne adaty kino muşdaklary üçin hem-de Jerard Batleriň janköýerleri üçin gyzykly filmleriň biri bolup biler.

Jonni Deppiň täze filmi

Üçünji kinomyz geçen hepdäniň şenbe güni tamamlanan, dünýäniň iň öňdebaryjy film festiwallarynyň biri hasaplanýan Kann film festiwalynyň açylyş kinosy bolan “Žanna Dýu Barri” (Jeanne du Barry) filmidir. Fransiýaly meşhur režissýor hem-de aktrisa Maiwenniň surata düşüren bu filminde baş keşbi ussat aktýor Jonni Depp janlandyrýar. Hollywood tarapyndan çetleşdirilen meşhur aktýoryň şol wakalardan soňky ilkinji filmi bolup, onuň täzeden Hollywood-a haçan dolanjakdygy ýa-da çagyryljakdygy häzirlikçe belli däl. Filmiň gala görkezilişinden öň gyzyl halydan geçişlikde Jonni Deppi dabara ýygnananlar 10 minuda golaý el çarpyşmalar bilen garşy aldy. Şol pursatda azda-kände tolgunan Depp fransuz filminde Lui XV keşbini ýerine ýetirýär. Filmde XXVIII asyrda Žanna Dýu Barri atly zenanyň aklyny hem-de gözelligini ulanyp, ýokarlaryk gelşi barada, şol sanda onuň korol Lui XV iň esasy faworitlerleriniň birine öwrülişi barada söhbet açylýar. 22,4 million dollar çykdajy edilen filmiň dowamlylygy 116 minuta deňdir. Bilermenlerden o diýen ýokary baha almasa-da, filme Jonni Deppiň hatyrasy üçin tomaşa etmek bolar.

Ma Don Sok ýene-de bikanunlaryň gözleginde

Bu gezekki makalamyzyň soňky kinosy Koreýa Respublikasyndan bolup, “action” görnüşli bu ekran eserinde koreýleriň meşhur aktýory, Hollywood-daky ýyldyzy, “Marvel”-iň “Ölümsizler” (Eternals) filmidäki Gilgameşiň keşbini janlandyryjy Ma Don Sok çykyş edýär. “Kriminal şäher — 3” (Beomjoedosi 3) diýlip atlandyrylýan filmde ol detektiwiň keşbini ýerine ýetirýär. Filmiň ilkinjisi 2017-nji ýylda ekranlara çykypdy. Prokatdan gazanylan 52 million dollardan soň filmiň 2-njisi geçen ýyl peýda boldy. Onsuzam ýurtda juda halanýan aktýoryň bu kinosynyň gazanjy 100 million dollardan geçdi. Netijede, filmiň prodýuserleri iňlis dilinde “The Roundup” diýlip alnan filmiň 3-njisini hem taýýarladylar. “Kriminal şäher — 3” ýa-da “Kriminal şäher: çykalga ýok” diýlip atlandyrylan bu 2-nji kinonyň režissýory Li San-ýon režissýorlyk etdi. 31-nji maýdan başlap, Günorta Koreýadaky kinoteatrlarda görkezilip başlan film ýene-de hereketli, uruşly sahnalara baý bolup, detektiw Ma Seok-do bu gezek “Metropolitan Investigation” atly topar bilen ýapon gangsterleriniň garşysyna bilelikde iş alyp barýarlar. Ýeri gelende aýtsak, filmiň 4-njisiniň 2024-nji ýylda ekranlara çykaryljakdygy mälim edildi. Hatda filmiň 5-njisini hem ekranlaşdyrylmak göz öňünde tutulýar…