Tina Törneriň gijä galan nekrology
Rok ‘n roll we R&B sazynyň söýüjileri maý aýynyň 24-ne gynançly habar bilen garşylaşdylar. Ýaş nesliň kän bir habary bolmasa-da olaryň ene-atalarynyň 80–90-njy ýyllarda söýüp diňlän rok n roll korolewalarynyň biri hasaplanýan Tina Törner, 83 ýaşynda aradan çykdy.
Kim bu Tina Törner? Anne Mae Bullok ýa-da sahna ady bilen tanalýan Tina Törner 1950-nji ýyllarda ABŞ-nyň St. Louis şäheriniň R&B sahnasynda tanalyp başlanýar. Şol wagtlar geljekgi ýoldaşy, ýerli rok n roll ýyldyzy bolan Aýk Törner bilen tanyşýar. Bu gatnaşygyň bir soňky ädiminde Tina Törner, Aýk Törneriň “Little Ann” atly toparynyň bir agzasy bolup çykyş edip başlaýar we toparyň aýrylmaz bir agzasyna öwrülýär.
Tina Törner nädip meşhur bolýar? 1960-njy ýyllarda toparyň esasy solisti toparyň täze aýdymyny ýazga geçirmäge gelmegi ýatdan çykarýar we “A Fool in love” aýdymynyň esasy bölegini Tina Törner seslendirmeli bolýar. Şeýlelik bilen albomyň iň esasy aýdymy bolan “A Fool in love” pop we R&B radiolarynda ýaňlanyp başlaýar. Emma, bu gezek toparyň ady bilen däl-de eýsem “Ike and Tina Turner” (Aýk we Tina Törner) ady bilen tanalyp başlanýar. “A Fool in love” aýdymynyň yzy bilen “It’s Gonna Work Out Fine,” “Poor Fool,” we “Tra La La La La” ýaly singlleri bilen dünýä sahnasynda ornuny alyp başlaýar. 1969-njy ýylda “Rolling Stones” bilen çykan dünýä turlarynda başga ýurtlardan hem fanatlary döräp başlaýar. 1971-nji ýylda çykaran “Workin’ Together” atly albomlary bilen ýewropanyň aýdym-saz çartlarynda hem uzak wagtlap orun alýarlar.
Ýola ýeke dowam. Aýk we Tina-nyň karýeralary şowly gidýän ýaly görünse hem maşgala gatnaşyklary dartgynlaşyp başlapdy. Şol dartgynlygyň netijesinde 1978-nji ýylda Aýk we Tina şahsy hem-de professional tarapdan ýollaryny aýyrdylar. Bu aýralygyň soňunda bulary baglaýan diňe dört sany ogullary galýar. Şol wagta çenli sahnada Tina Törner ady bilen tanalýanlygy üçin aýralykdan soňra hem şol at bilen dowam etmek netijesine gelýär. 1983-nji ýylda Albert Griniň “Let’s Stay Together” atly aýdymyny täzeden seslendirmesi bilen Tina Törneriň solo karýerasy täzeden reňklenip başlaýar. Ondan soňky ýyl bolsa “Private Dancer” albomy bilen dört “Grammy” baýragyny alýar we albomynyň 20 million nusgasy satylýar. Diňe bular bilen çäklenmän, 1985-nji ýylda çykan “Mad Max Beyond Thunderdome” atly filmde “We Don’t Need Another Hero” aýdymy bilen aýdym-saz sanawlaryna täzeden girýär.
Ýoluň soňy. 2013-nji ýylda ikinji ýoldaşy bolan Erwin Bah bilen toý tutýarlar. Toýundan üç aý soňra ýüregindäki näsaglyk bilen hassahana düşýär. 2016-njy ýylda bolsa rak keseli diagnozy goýulýar. Ondan soňraky ýyl bolsa böwrek transplatyny geçirýär we böwrek donory ýoldaşy Erwin bolýar.
Tina Törner 2023-nji ýylyň maý aýynyň 24-ne Şwessariýanyň Kýusnaht şäherinde, 83 ýaşynda, öz öýünde aradan çykýar.
