Tomaşa edeni sarsdyrýan film hem-de gülgün reňkli Barbi ýa-da “Barbenhaýmer”
Täze filmler hakyndaky makalamyz bu hepde ähli babatda biri-birine gabat gelmeýän 2 ekran eseri barada bolar. Zenanlara hormat hökmünde, täze filmleriň birinjisi dünýäde meşhur oýnawaç, Barbi atly hemişe “jedelli” gurjak baradaky “Barbi” (Barbie) filmi, beýlekisi-de ähli adamzat üçin uly howp bolan atom bombasyny oýlap tapan J. Robert Oppenhaýmer hakyndaky “Oppenhaýmer” (Oppenheimer) kinosydyr. Iki filme-de awtobiografiýa diýsek öte geçdigimiz bolmaz. Iki filmiň bir günde ekranlara ýaýradylmagy sosial mediada “Barbenhaýmer” (Barbenheimer) fenomeniniň emele gelmegine sebäp boldy. Bu söz iki filme-de tomaşa etmek isleýänleriň tapan sözi bolup, iki filmiň arasyndaky prokat bäsdeşliginde Barbi häzirlikçe öňde barýar. Açylyş hepdesinde “Barbi” 162, “Oppenhaýmer” bolsa onuň deň ýaryny, ýagny 81 million dollar gazandy. Nolan häzirki wagtda ozalky studiýasyndan yza galýar.
“Mattel” oýnawaç öndüriji kompaniýanyň şärikdeş ýolbaşçylaryndan Rut Handler tarapyndan esaslandyrylan Barbi gurjagynyň doly ady Barbara Millisent Roberts bolup, ol Handleriň gyzynyň adyny göterýär. Ilkinji nusgalary 65 santimetrlik boýy hem-de owadan figuraly kämil gurjak bolmagy öz döwründe uly gowur turuzýar (bu gowur häzirem dowam edýär) we şol ýyllar üçin batyrgaýlyk bilen hereket edilen ullakan täzelik bolýar. Bu özboluşly gurjak položitel hem-de otrisatel manyda köpleriň ünsüni çekýär. Gurjak soňky ýyllarda hem şol şekili bilen birjigem üns merkezden düşmän, onuň saryýagyzlygy/garaýagyzlygy, biliniň inçeligi, ýubkasynyň gysgalygy … ýaly zatlar hemişe gürrüňli bolup gelýär.
Barbi gurjagy barada filmiň surata düşüriljekdiginiň mälim edilmegi köpler üçin begençli habar bolupdy. Filmi surata düşürmeklik Greta Gerwige tabşyrylmagynyň habary ýüzlerdäki şatlygy hasam artdyrypdy. Zenanlara, gyzlara, gyzjagazlara degişli temadaky filme zenan biriniň režissýorlyk etmeginiň geň galdyryjy tarapy ýok bolsa gerek. “Leýdi Börd” (Lady Bird), “Kiçe zenanlar” (Little Women) ýaly zenanlaryň esasy planda bolan filmleriniň režissýory, meşhur aktrisa hem-de ssenariçi Greta Gerwig tarapyndan surata düşürilen kinonyň dowamlylygy 114 minutdyr. Umumy önümçiligi “Warner Bros.” kompaniýasyna degişli bolan filmiň býujeti 145 million dollara deňdir. Film kompaniýanyň Londondaky studiýasynda ekranlaşdyryldy. Käbir sahnalar bolsa Kaliforniýanyň kenarýakasynda surata düşürildi. Ilkinji 3 günde gazanylan 162 million dollar ýylyň iň şowly başlan filmi bolmagyna getirdi. Şeýle-de, zenan režissýorlaryň surata düşüren filmleriniň arasynda ilkinji 3 günde iň köp kassa ýygymyny toplan kino boldy. Film häzirki wagtda tutuş dünýäde 382 million dollar girdeji gazanyp, bu görkezijiniň 1 milliard dollardan geçmegine garaşýanlaryň sany az däl.
Barbi filminde baş keşbi awstraliýaly owadan aktrisa Margo Robbi janlandyrdy. Şol sanda Raýan Gosling hem beýleki baş keşpde çykyş etdi. Bulardan başga-da Keýt MakKinon, Issa Rae, Aleksandra Şipp, Emma Makki, Hari Nef, meşhur aýdymçy Dua Lipa dagy dürli kärdäki Barbileriň keşplerinde, edil şonuň ýaly Simu Liu, Kingsli Ben-Adir, Skot Ewans dagy hem dürli kärdäki Kenleriň keşbinde çykyş etdiler. Helen Mirreniň gürrüň beriji bolan filminde Amerika Ferrera, Maýkl Sera, Will Ferrel dagy hem surata düşdi.
Bar gülgün reňk ulanylýar
Islendik zenany biparh goýmaýan bu ekran eserinde režissýoryň islegi boýunça gülgün reňk höküm sürýär. Režissýor filmdäki ähli bezegleriň, ähli ýerleriň gülgün reňkde bolmagyny isläpdir. Şol sebäpli reňk satyn alnan firmanyň gülgün reňkleriniň belli bir döwür üçin gutarandygy hem bellenilýär.
Filmde Barbileriň dünýäsinde ýaşap ýören Barbiniň ýeterlik derejede ajaýyp däldigi üçin ol kowulýar. Şondan soň Barbi hakyky durmuşa aralaşyp, bu ýerde dürli wakalary başdan geçirýär.
Bilermenleriň pikirine seretsek, olaryň köpüsi filmiň ssenarisiniň az-owlak pesräkdigini belleýärler. Ýöne çeperçilik bezeginiň, aktýorçylygyň ýokarydygyny aýdýarlar. Esasan hem filmiň griminiň juda şowly çykandygyny aýratyn nygtaýarlar. Keniň keşbini ýerine ýetiren Raýan Goslingiň edil Oskar bolmasa-da, beýleki käbir baýraklarda ikinji plandaky aktýor ugry boýunça dalaşgär görkezilip biljekdigini hem belläp geçýänleriň sany az däl. Kritiklerdenem, tomaşaçylardan ýokary baha alan filme-de tomaşa etmän oturmak bolmaz…
Ussat režissýoryň täze filmi
Filmiň ilkinji görkezilişi 11-nji iýulda amala oaşyryldy. Şonda bu film oňa tomaşa edenleriň köpüsinde azda-kände sarsgyn döredýär. Esasan hem käbir sahnalary tomaşa edeni dartgynly ýagdaýa eltýär diýip, bilermenler belleýärler. Film 3 sagatlap dowam edýär. Sahnalarynyň köpüsi Nýu Mehiko ştatynda ekranlaşdyrylan film üçin 100 million dollarlyk çykdajy edilýär. Filmiň şu wagta çenli prokatlardan ýygnany 210 million dollardan geçýär. Edil ýarym milliard bolmasa-da, 400 million dollardan gowrak girdeji gazanmagyna garaşylýar.
Ilkinji 3 filmi bilen “auter”-leriň hataryna adyny ýazdyran Kristofer Nolanyň täze filminde baş keşbi, Oppenhaýmeriň keşbini režissýoryň mundan öňki filmleriniň 5-sinde çykyş eden Killian Mörfi janlandyrýar. Emili Blant, Mett Deýmon, Robert Dawni Junior, Florens Pýu, Joş Hartnett, Keýsi Afflek, Rami Malek, Kennet Brana dagy beýleki esasy keşpleri ýerine ýetirdi. Başga-da onlarça meşhur artist filmdäki gysgajykbolan, ýöne meşhur şahsyýetleriň keşplerinde surata düşdi.
IMAX 65 mm we 65 mm uly formatdaky lentalara düşürilen kinonyň käbir otrisatel sahnalary ak-gara reňkdedir. Käbir partlaýyş sahnalarynda CGI tehnologiýasyna derek şol sýužetler hakykatda ýerine ýetirilýär. Režissýor hemişe-de ady agzalan tehnologiýa ulgamyndan minimal derejede peýdalanýar.
Filmde Oppenhaýmeriň şahsy durmuşy, oýlap tapan ýaragyny synag edişi barada söhbet açylýar. Bilermenlerden ýokary baha alan film tomaşaçylardan hem öwgüli sözlere mynasyp boldy. Köpleriň sabyrsyzlyk bilen garaşan kinosyna diňe Nolanyň filmi bolany üçine tomaşa etmek ýeterlikdir…
Originally published at http://renkliplus.com on July 26, 2023.
