出征激戰大獲全勝：FLIR Bring The Heat Hacker & Maker Challenge Hong Kong
大家今朝睇咗新聞未？區選戰情激烈，好可惜小編投票支持嘅參選人不幸落選，真係好唔開心！不過我就有另一件喜事要宣布：區選就無我地參選份啦，但係Sanuker於啱啱個禮拜六日就去咗參加另一個比賽：[FLIR Bring The Heat Hacker & Maker Challenge Hong Kong][2]，而且仲贏取咗好豐富嘅獎金，等我帶大家重溫返當日嘅情況啦！
今次嘅Bring The Heat比賽係由FLIR Systems, Inc.同埋AngelHack舉辦，活動地點係HKCocoon浩觀嘅辦公室，日期係11月21至22日。今次比賽嘅主題圍繞FLIR ONE呢個熱能顯像攝影鏡頭，參賽者需要針對呢個鏡頭構思一個軟件或硬件App發明。 我地梗係做返自己最擅長嘅事啦：寫App！
我地Sanuker就趁今次機會分開咗做兩隊人，分別整咗兩個可以應用到熱能顯像攝影鏡頭嘅App，一個就係Booster，另一個叫做Hot Spot。
對於運動愛好者黎講，有時你點先知道自己去做Gym做得啱唔啱？點知呢舊肌肉係咪練習得係咪啱？Booster就係一個影低肌肉熱像、探測肌肉運動後的溫度嘅App，你只需要用FLIR個鏡頭影低你運動後嘅肌肉，佢就會探測熱能溫度，溫度愈高就代表你舊肌肉運動得愈多。每次影完個App都會有溫馨提示比你，話比你知你嘅運動夠唔夠，洗唔洗再努力啲操練呢一部份嘅肌肉！
Hot Spot則係透過熱能顯像同埋雲端運算，去計算一個空間內嘅人流，從而去幫助一啲商戶進行人流監控同分析，等佢地可以進行更有效嘅市場策略。例如，如果你見到店舖一入門口轉左嗰個位係最多人去睇，你就可以將一啲想重點推廣嘅產品放係個到，等更多人可以接觸到你件產品。
今次比賽嘅評分準則總共有4個項目：創意、UI及UX（介面及用戶體驗）、運作效能同市場潛力。每一隊都必須係24小時內上載自己嘅計劃同產品上DevPost，並且有3分鐘嘅演講時間，去說服評判你個產品係一個出色嘅發明！ 今次比賽嘅獎品非常豐富，所有獎金總額高達1萬美元，同埋勝出隊伍仲可以獲得5隻FLIR ONE！而我地Sanuker亦都不負眾望，Hot Spot成功贏得全場第二名，Booster亦贏得Crowd Favorite，而且Booster仲係成個比賽中第一個係Playstore上架嘅App，獲得額外獎金！總共夾埋贏咗4500蚊美金！
Sanuker今次出征大獲全勝！我地下次一定會再努力贏更多獎！
This is a repost of our participation in a hackathon back in 2015.
