Apple 想將你部 iPhone 變做信用卡機?
Apple 收購 Mobeewave
八月份 Apple 估計用超過一億美金收購加拿大初創公司 Mobeewave，究竟 Mobeewave 造啲乜同點解 Appple 對佢咁有興趣 ？
Mobeewave 造啲乜
Mobeewave 自家開發嘅軟件可以將你嘅 Android 手機 (你無聽錯，唔係iPhone) 變成信用卡機 (Payment Terminal)，或者香港叫做嘅 POS 機 (POS Terminal)，咁樣對小商戶就好方便啦，因為佢地唔使同銀行租機或者買機都可以收到信用卡，又唔洗放部大大嘅POS 機喺細細嘅收銀櫃枱，用自己部手機就得。當然呢個技術暫時只係支持拍卡支付 (Contactless Payment) 同埋佢地都要同銀行開個商戶戶口。
點解 Appple 對佢咁有興趣
從2014年嘅Apple Pay 到2019年嘅Apple Card，Apple 似乎對支付行業都有好大嘅興趣，Apple Pay 同Apple Card 嘅對象都係消費者，但係我覺得今次Apple 收購 Mobeewave 係為商户，銀行甚至整個支付生態圈 (Paymnet Eco-System) 而做 ，Apple 當然唔會同你講佢想做乜，咁我就同大家估下Apple有咗 Mobeewave 嘅技術之後可以做乜。
將你部手機或者平板變成信用卡機 (Payment Terminal), 無縫連接 Point-of-Sales 軟件 (POS Software)
除咗令你可以將部手機或者平板可以收到信用卡之外，其實係外國已經有好多 POS 嘅軟件 (Point of Sales Software) 都係運行係手機或者平板上面，但係嗰啲 POS 軟件如果要收信用卡係要另外加裝硬件，好似 Square 要加個 Dongle，iPhone 要加個蘋果皮先收到信用卡，如果你喺 Apple Store 用信用卡買過野應該都會見過佢，好大舊，好吾 Sexy。
如果用 Mobeewave 嘅技術，唔使另外加裝硬件就收到信用卡，對 POS 軟件開發商同商户都非常方便。雖然依家 Mobeewave 只係支持 Android ，但係Apple買左佢之後，佢地支持iOS 應該都冇乜問題。
私人信用卡機
因為疫情影響好多人都會用手機或者平板係網上買嘢或者叫外賣，依家大部份都係無卡支付交易 (Card Not Present Transaction) 嘅結帳方法，即係話你要輸入信用卡號碼，到期日同驗證碼 (信用卡背面嗰3個 Number)進行交易，或者你比支付服務商預先記低你嘅信用卡資料，無卡支付有一定既風險，例如支付服務商個Server俾人Hack咗令到你嘅信用卡號碼外洩，或者你部手機俾人 Hack 咗，所以支付服務商同銀行會收比較高嘅手續費 (一般 3% 到 5%)。但係如果你部手機同時係部信用卡機，你只要拍一拍你是旦一張支持 Contactless 嘅信用卡就搞掂，同時呢個交易就由無卡支付交易(Card Not Present)變成實體卡支付交易 (Card Present Transaction)，因為係實體卡，張卡又喺你手，風險比較低，支付服務商同銀行嘅手續費都會比無卡支付交易低。商户可以俾小啲手續費，消費者又方便啲同安全啲。如果除咗網上買嘢同叫外賣之外，連交水電煤都可以咁樣就好啦。
除咗 Mobeewave 仲有冇其他公司有同樣嘅技術
其實而家有好多類似Mobeewave 嘅公司都可以用軟件將你嘅手機或者平板變做部信用卡機，例如華為、PayCore、MYPINPAD 同 MagicCube。佢哋一般都叫呢種產品或者技術做 Soft POS、Software POS 或者 Tap On Phone，而大陸就叫做手機POS。香港嘅移動支付雖然走得比較慢，但係亦都有香港公司參與開發或者準備推出呢個產品比小商戶，到時收信用卡就再唔係大公司嘅專利啦。
下次同大家講一講呢個技術究竟安唔安全。
