立法會議員職權

立會選舉臨近。有候選人話,入局後將會推動乜乜物物、又或指責現任議員毫無見樹云云。

其實,立法會議員可以做到D乜野呢?

// 先define variable。名黎啫,勿計較
var 反對派 = 全體議員 - 建制派

立法會既職權就係基本法第73條寫左。立法會網頁有本寫得好清楚、好詳細既參考手冊,我借左佢個分類。

一. 制定法律

首先,立法會就梗係用黎立法架啦。

無論係 insert, update, delete 法律,個程序都係要通過一條法案。例如︰insert 法律既法案 (啟德郵輪碼頭條例草案),update 法律既法案 (2014年版權(修訂)條例草案)。

行完條 SQL (法案),個 database (法律) 就會唔同左。

a. 政府法案

絕大大多數既法案都係由政府提出。政府法案只需過半議員就可以通過。建制議員佔多數既情況下,只要佢地肯返工、肯保皇,咁就一定可以通過。

def 過半
pass = yes > (present / 2.0)
end

主導權在於政府,政府想做先會提出。而且絕大部份都會通過。上屆立法會 (2012–2016),有 92 條法案,只有一條遭否決

有時民意明顯反對,都可以照樣通過。反對派唔過半,係完全冇影響力。好諷刺地,因為政府倚靠建制派既支持,建制派議員先至最能夠畀壓力政府。

留意返,建制派唔一定保皇。例如好多功能組別議員都係大老闆,其實真身都係商界。建制係指成個官商建制 (亦有人話係官商鄉黑紅..)。所以,侍產假加一兩日咁艱辛,最低工資加一兩蚊咁艱辛。立法會準確反映社會情況 (苦笑),既得利益者,各有盤算啦..

b. 議員法案

議員都可以提出法案,上屆會期 (2012–2016),政府提出左89條法案,議員提出左3條,分別係︰

  1. 《2013年專業會計師(修訂)條例草案》
  2. 《2014年香港九龍塘基督教中華宣道會法團(修訂)條例草案》
  3. 《交通銀行(香港)有限公司(合併)條例草案》

咩黎架?點解議員只係提出D咁既野!?生果金呢?退保呢?樹木法、檔案法、反歧視法呢?做咩唔提案立法呀?

原來呢,議員既立法權力係細得好可憐…

限制一︰提出唔到

香港特別行政區立法會議員根據本法規定並依照法定程序提出法律草案,凡不涉及公共開支政治體制政府運作者,可由立法會議員個別或聯名提出… [基本法 第七十四條]

唔準提政改,唔準用錢,唔準改變政府運作。咁仲有咩可以做…

例如改變工廈消防要求,因為要巡查,會增加公共開支,所以唔准提出。又例如新增假期,雖然唔用錢,但會改變政府運作,所以又唔准提出。求其有DD重要性既法案,都唔可以提出。結果,咪剩返D牽涉個別團體既條例草案囉…

回顧前塵往事,97前既限制只有一項︰不能增加公共開支。睇下97前既議員條例草案幾開心︰
  • 《不公平解僱條例草案》
  • 《保護海港條例草案》
  • 《僱員代表權、諮詢權及集體談判權條例草案》
  • 《平等機會(家庭責任、性傾向及年齡)條例草案》
  • 《平等機會(種族)條例草案》
  • 《截取通訊條例草案》

限制二︰提出左都通過唔到
議員條例草案係要分組點票。即係地區直選議員要過半贊成,功能組別都要過半贊成。

def 分組點票過半
geographical_pass = geographical.yes > (geographical.present / 2.0)
functional_pass = functional.yes > (functional.present / 2.0)
pass = geographical_pass and functional_pass
end

功能組別,建制派一直超過八成。今年既功能組別已經有12人自動當選,多過三成。個 geographical_pass 一直由建制派掌控,非常 secure。你點通過啫?

c. 修正案

好啦,唔提出新既法案,提出修正案 (Amendments) 修改下政府法案啦。但係修正案同法案一樣︰政府提出既就要全體過半,議員提出既就分組點票。咁點修啫?

例如侍產假既法案係由政府提出。反對派議員提出修正案,將侍產假由「不多於3日」變成「7日」,由支薪4/5變成支全薪。結果修正案被功能組別大比數否決,原本個孤寒法案就通過左。

二. 批准財政預算、稅收和公共開支

我覺得基本法有兩個重點,一個係司法獨立、另一個係審慎理財,呢兩樣野都寫得幾多、幾唚氣。審慎理財源自殖民地傳統,因為宗主國希望殖民地自給自足,唔駛佢出手打救。

財政預算、稅收、公共開支,都要由立法會通過批准。(基本法 第73條 (二), (三)) 批准左既項目如果超支,要增加撥款,就要再去多一次立法會。基本上,政府每次用錢都要去立法會。

立法會有好大權力把關,但實情係通行無阻。因為建制派過半,如果佢地願意,撥款申請就通行無阻,好似高鐵、東北發展既撥款咁。

2015–2016 年財委會開會四十幾次,每次都通過近十個撥款。成年先否決左一次。「Reject」同「Withdrawn (政府撤回撥款申請)」,都係幾年先有一兩個。

可以 google 下其他年份 (自己改左個 "15-16" 啦)︰
Rejected site:www.legco.gov.hk/yr15-16/english/fc/fc/results/

a. 拉布

反對派近年開始用既招數,都有幾大影響力架。因為政府每次用錢都要去立法會,提供左好多關卡,如果每度關卡都塞車,就算最後通過,都會打亂政府既工作時間表。

拉布算係 gaming the rules 既無賴行為,但至少仲係合乎規則。即係類似「搵食啫犯法呀」既程度。

b. 剪布

剪布,議事規則係冇寫明,主席利用左一D包底既權力,夾硬講到可以剪布。

對於本議事規則內未有作出規定的事宜,立法會所須遵循的方式及程序由立法會主席決定;如立法會主席認為適合,可參照其他立法機關的慣例及程序處理。 [議事規則 第 92 條]

第 92 條畀我既感覺係咁樣︰


try {
開會;
} catch (法定人數Exception) { //第17條
} catch (規程問題Exception) { //第39條
} catch (議員行為不檢點Exception) { //第45條

} catch (Exception) { //第92條
// 跟本就唔應該跌入黎
}

剪布既權力係好危險,今次唔准你講咁耐,下次再畀少D時間得唔得呢?恐怕一發不可收拾。剪布愈來愈常見,可預見將來議會雙方愈來愈戾鬥戾。

三. 監察政府的工作

立法會有以下職權,用以制衡行政長官及政府。

基本法 第73條
( 四 ) 聽取行政長官的施政報告並進行辯論;
( 五 ) 對政府的工作提出質詢;
( 六 ) 就任何有關公共利益問題進行辯論;
( 八 ) 接受香港居民申訴並作出處理;
( 九 ) 彈劾行政長官;

好似好多野可以做,但係以上(四)(五)(六)(八)講既辯論、質詢、提出議案,其實都係冇實際法律效力既… 只係畀到政治壓力。如果係一個正常運作既民主社會,人民可以透過投票選擇邊個入主政府,政治壓力係可以規範到政府。但係,係香港,政治壓力冇乜影響力…

a. 議員議案

議員議案 (Motions) 不具立法效力,只係用黎「對公眾關注的事項表達意見,或籲請政府採取某些措施」。即係六四議案果D呢。議案不具立法效力,但都要分組點票。即使過半議員同意,功能組別否決,議案就會被否決 (見 last page 「立法規管工時」議案)。表達意見都咁艱辛…

b. 彈劾特首

立法會係有實際法律權力去彈劾特首,但難度極高,要2/3立法會議員同意,再由中央人民政府決定,真係算吧啦。(基本法 第73條(九))

四. 同意高級法官的任免

三權分立,高級法官由行政長官提名,再經立法會通過 (基本法 第73條(七))。暫時冇乜爭議。唔講啦。

五. 命令證人列席的權力 (aka 尚方寶劍)

基本法 第73條 ( 十 ) 在行使上述各項職權時,如有需要,可傳召有關人士出席作證和提供證據。

所謂既尚方寶劍《立法會(權力及特權)條例》,令立法會可以傳召證人作證同提供證據。尚方寶劍既權力真係好大。寶劍出鞘時,議員做既野法庭理唔到,仲享有警察的所有特權。而且立法會解散左都仲有權力

可惜,如果要用特權法,議員要提出議案,之後分組點票… 之後… 就沒有之後了…

今屆會期,動議左特權法18次,否決左16次,剩返2次因為會期完左所以都用唔到。否決左既調查包括有︰旺角騷亂、行李門、鉛水、高鐵延誤、HKTV、商交所、銅鑼灣書店….

總結

係咪覺得條條路都塞死晒呢?

</立法會職權>

<感想>

立法會設計

功能組別

基本法個design就係咁。只要建制派掌控功能組別,就可以否決由議員提出既所有野。功能組別係畀到為政者好多安全感。廢除功能組別喎,佢真係睬你都傻。

衍生既問題

基於立法會本身既限制,議員冇乜辦法去推動新政策。尤其係唔過半既反對派︰特權法用唔到,法案提出唔到,議案通過唔到,就算過到政府都唔多理。主動既野基本上冇可能做。

被動既野,就係審批法案同批錢。反對派唔過半,佢地支持定反對其實都唔重要。

立法會既設計令議員無法影響施政。物極必反,咩都做唔到,咪玩野囉。

立法會選舉投票

[頭盔] 以下乃個人投票取向,唔係叫你跟。

求學不是求分數

如果你屬意投反對派,都唔駛睇佢既理想願景架啦,佢做唔到架啦算吧啦,要睇佢反對D咩。更加重要既係,佢願唔願意放下身段做D有作用既野。

目前,反對派唯一有既影響力,就係拉布拖延立法同財政審批。始終拉布係無賴行為,唔少議員好錫身,唔願做。即係咁,如果你自認非建制,主動野你做唔到,被動野你唔願做,咁你不如返屋企瞓覺啦。所以我覺得,肯拉布係 basic requirement,合符規則都唔願做的話,仲可以期望你做乜野?

當然,最好就係有人諗到新做法,但而家冇呀嘛…

正如求學不是求分數,議會唔係泥漿摔角。香港學生,老早已經明白而家係要求分數。而家立法會都唔係正常議會,我已經唔知道議員口才好、論述能力高到底有咩作用。我想要願意 get their hands dirty 既議員。

守住關鍵少數

目前反對派有既關鍵少數係「多於全體的 1/3」及「直選過半」。1/3關鍵在於政改要2/3通過

因為分組點票,直選過半就可以否決由議員提出既野。政府只會提出新法案、新政策,唔會搞到立法會內部程序。但係,立法會議員本身,就可以提出修改立法會內部程序,例如議事規則。咁就可以改變發言次數、發言時限、會議法定人數、利益申報規則… etc。

其實,真係幾大劑架…

所以投票策略仍然重要,不過好難執行。

愈諗就愈唔開心… 就咁啦。

9月4日齊投票。