3 malam 2 hari di oto.
Carito ambuih-ambuih mah. Mancubo pulang dari tanah Jawa ka ranah Minang jo oto, baduo jo kanti esede.
Tanggal 21 September 2020 patang dapek kaba lah dari kanti lamo, maajak pulang ka Padang naiak oto. Ondeh, tabik panasaran, tabik pulo gaca sakali. Antah ka baa jadinyo. Sudah bamufakaik jo kaluarga, bapikia sagalo, kito putuihan GAS! Ko dek pitih sayuik mah, arok ka pulang, eh ado sakali urang nan manumpangan, bao ikua se cek nyo. hahahaha.
Mulai bakameh, baco-baco, caliak pidio, ndak lupo batanyo, manelpon kanti-kanti nan lah punyo pangalaman pulang baliak malalui jalan Lintas Sumatera nan legendaris ko. Dima daerah rawan, dima ka lalu, baranti istirahat, dima ka makan, sumbayang sagalo. Samantaro itu, bajago-jago kok ado razia sadang di jalan, bae pulo lah sato tes serologi (Rapid test). Walaupun tantu iko ndak ka absah hasianyo, tapi surek dari klinik jo rumah sakik bisa mamuluihan pajalanan, “pado disuruah baliak”. Mode itu pasan kanti ko. Pai lah ka klinik, tabaia 275rb baka pitih. Bakacamuak isi kapalo, kanai kicuah di nantarang, ndak lo bisa manulak. Antah baa lo “sero” cek ee.
Ado raso syukur pas kalua hasia tes iko, batambah raso aman kapulang. Rencana ka barangkek hari Sabtu malam, pagi lah salasai bakameh rumah, bakameh barang sampai mugarik salasai lo masak aia angek ka babao jo termos. Eh, dek pangana antah kama, kironyo mundur barangkek ka hari Akaik, hehe. Subaha ndak takana kok hari Jumaik sabalumtu alah supakaik kalau wakatu barangkek bamunduran. Bakacamuak raso ati, kanai kicuah dek utak surang. Hari Akaik pagi ka siang, sadang lamak brunch, dapek telepon lah ka karajo. “Hari Sinayan, mulai rapek dih” Alamak jang, beko malam ka barangkek, bisuak ado lo karajo. Kerambil cukil kan? Papendek carito kito, mundur lah barangkek manjadi Salasa malam.
Tibo lah kanti ko manjampuik pukua satangah sapuluah malam, isi paruik jo nasi goreang padeh sabaum manuju check point partamo, palabuhan merak. Sabalum tibo di palabuhan, baranti lah dulu di Rest Area KM. 43 bali ransum, kok bangkik lapa paruik di ateh kapa Ferry. Angek bana ati rasonyo pas nampa garabang tol Merak ko eh.
Ndak lamo sudah tu sampai lah oto di palabuhan, tibo-tibo ado urang nan mandakek. Nyo manawaran tiket kapa, tanyato tiket kapa lah ndak pakai karatu nan barisi pitih tu lai Nti, tabolok coy. Pitih lah tamasuaan ka dalam karatu tu. Sajak 1 Mei 2020 lah barubah sistem, naiak kapa manyubarang dari Merak (pulau Jawa) ka Bakauheni lah harus bali tiket daring malalui website https://www.ferizy.com. Bakalebuik pulo disiko Nti.
Niek ka mamakai jaso calo ndak ado, si uda calo ko gigiah pulo manawaran jaso. Lah panek nyo manggaleh, hasia tak ado, nyo suruah lah oto kito maju kamuko gerbang mambali tiket. Bacubo bali tiket sorang, lamo bagutiak-gutiak hape, pas ka mambaia, tablokir internet banking akun bank Rakyat. Si Ferry ko ndak pulo bisa babaia jo rekening bank Asia. Ba cubo cari patolongan ka karean jauah, hari parak siang, sia nan ka jago? hahaha. Ujuang-ujuangnyo, tapakai lah jaso calo nan basaba manjawek tanyo. hahahhah. Barulah dapek naiak kapa manyubarang.
Lah hampia sapanjang tali baruak pulo carito ambuih-ambuih ko yo?
Pas turun dari kapa, langsuang di gas kancang, jalan tol manyambuik Nti!
Baharok lakep tibo di Padang tapi ndak lupo Sumbayang.
Diagiah pituah dek karean-karean kalau beko kalua di pintu tol Terbangi Besar, kironyo tajolong bana kalua. Palajaran di kito patang tu mah. Sarancaknyo, pupuah se dulu di Tol tu sampai hampia ujuang, sampai hampia tibo di Palembang, baru kalua. Kana-kana ko dih.
Alah tinggi pulo hari, lapa paruik, mancari tampek makan nan sasuai ko lain-lain pulo sariknyo, Alhamdulillah ndak lamo baranti lah oto kito di muko RM. Simpang Setia, Baturaja.
Paruik kanyang, mulai lah kito maukua langkah. Pukua bara ka malalui daerah rawan. Mandaruang oto ka arah Lahat.
Nas ciek dulu, lanjuik hari Sinayan muko dih. ehhehehe
Basambuang cito kito Nti.
Barangkek dari RM Simpang Setia di Baturaja tu, mulai lah kito mainggo-inggo, pukua bara lah kudu ka tibo di nagari rawan tu. Kok kecek Google Map nan jadi pamandu jalan, kiro-kiro jam 7. Talulua lah aia salero, ondeh mak, iyo bana ko.
Dek patuah se jo arahan Google Map, nyo agiah jalan buruak Nti, bakelok kelok malalui jalan ndak ba aspal, ndak taraso tampak dari subalah kida lubang galian dalam, nyatonyo lah ka maarah tambang batu baro Ombilin lai. Haha, kama lah baarak bangkai kooo.
Baputa lah oto, batelpon karean, “Oi dima ko, lah sasek ha” sambia takaka galak, bacari kantua polisi tampek batanyo. Abih lo hari satangah jam basuo lah ciek. Manyilau kantua ciek lu.
Jan sato lo Kanti galak lai, ko iyo batea mah, hahahhaha tapi nan namonyo pajalanan tatap kito tampuah. Nyo agiah pituah dek Pak Pol, belok suok-kida, malalui jambatan tu luruih bakelok antah lah, sudah tu lalu di Lahat lah aman. Tabik sumangaik baliak, lah dapek patujuak ka الصراط المستقيم.
Ndak taraso lah kalam nagari, lah masuak jalan sarupo hutan, ndak ba urang lih dima-dima. Bacaliak peta, kironyo lah masuak daerah Lahat nan legendaris tu. Ondeh, pukua salapan malam, lah kalam kajik! Lawan jo kawan ciek duo nyo nan tampak.
Kok lai kareh angok, ndak ka pacah paruik bagai Kanti doh. Kondisi jalan ndak pulo rancak, nyo tambuah jo ujan labek. Tantu lah maagak-agak gas oto bapijak. Tabayang, kok sadang malintehi ganangan aia, tibo urang baladiang kamuko oto baa lah nasib.
Rasonyo ndak abih-abih jalan ko Nti, baulang kali dicaliak, dima lah ujuang nyo ko he.
