Baraja Perai, Ilimu Dapek!
Apo nan ka dikabaan kini ko la-i? Sadonyo lah ditulih urang. Sambuah carito nan sambuang manyambuang dari tangan ka tangan. Ndak tau wak la-i, ma nan carito sabananyo, nan ma pulo carito ambuih-ambuih. Lah samo data se kantuik jo liua.
Tapi samantang kok baitu, kok la-i namuah dunsanak mandanga, eh… mambaco kaba nan sabinjek ko, alhamdulillah. Ko kaba nan sabana kaba. Indak carito ambuih-ambuih doh, indak pulo carito nan indak bakarunciangan. Iko sabana kaba, lah dibantang sajak taun duo ribu sabaleh, katiko ari lindok-lindok tangguang. Samo jo katiko Den mangaba-an ka dunsanak kini ko.
Di taun tu, ado koran harian nan tabik di Bukiktinggi. La-i tabayang dek dunsanak tu, koran harian tapi kantua gadangnyo di Bukiktinggi. Rasonyo sajak salasai zaman bagolak, ko baru koran harian nan tabik di daerah. Kok sangkek saisuak, jan disabuik lai. Rohana Kudus la-i mambueknyo mah.
Koran harian nan tabik ko, katiko lahia, banamo Harian Umum Rakyat Sumbar Utara. Partamo tabik, taun duo ribu sapuluah. Tabiknyo duo baleh halaman. Nan dikaba-an, apo nan tajadi di Bukiktinggi, Padangpanjang, Tanahdata, Pasaman, Pasaman Barat, Payokumbuah, jo Limopuluah Kota sarato Agam. Tu, sakali-sakali apo nan tajadi di Sumbar lainnyo.
Singkek carito, di taun duo ribu sabaleh, ada kiro-kiro sapuluah urang anak-anak Es Em A ampek Bukiktinggi, MAN Kotobaru jo anak sakola Es Em A tigo Padangpanjang. Anak murik tu tibo jo gurunyo. Di kantua koran tu, ado kalaih baraja manulih.
Anak-anak sakola tu diaja manulih. Apo nan ditulih? Apo sajo nan kabisa ditulih. Manulih jurnalistik, manulih carito jo puisi, ciek la-i nan paliang paralu bana, ba-a caronyo supayo nan ditulih tu dimuek di surek kaba. Kok disimpan di buku surang, tu ma lo ka tau urang apo nan ditulih dek nan manulihnyo.
Sajak itu pulo, di surek kaba Harian Umum Rakyat Sumbar tu ado halaman koran nan disadioan untuak manampuang apo nan ditulih dek anak-anak mudo dari sakola tu. Namo halaman nan dipagunoan, Koran Sekolah.
Sasudah tu, ado bagai anak sakola di Payokumbuah, Limopuluah Kota, Agam jo Pasaman nan manulih, ditambah lo jo nan dari Tanahdata. Langkok lah.
Wakatu bajalan juo. Anak sakola nan tibo baraja baganti sairiang bajalan wakatu. Tapi, kok baitu bana, indak mambuek suruik urang-urang di surek kaba tu ma-aja anak-anak nan tibo. Kudian sasudah tu, nan tibo lah baragam, lah bacampuan sasuai umua. Nan mulo baraja tu, lah kuliah pulo. Patah tumbuah hilang baganti, kecek rang gaek saisuak. Salain anak-anak nan lah kuliah tu, ado lo anak Es Em A baliak, tu ado bagai anak Es Em Pe.
“Aja-an anak-anak kami ba-a caro manulih nan bana,” pintak banyak guru jo kapalo sakola. Jadilah. Baoklah kaniak. Apo nan ado diagian sabara nan paralu. Diansua lambek-lambek. Lambek lego kok lai ka manang.
Ondeh Mande Kanduang. Indak taraso se, antah alah bara urang nan kalua masuak, indak ka disabuik bana, tapi kok diukua jo tingkek dan datang siliah baganti, kironyo alah ado anam angkatan. Sajak taun duo ribu tujuah baleh, namonyo indak Koran Sekolah lai, tapi diganti jo Bengkel Literasi Rakyat Sumbar. Itu tampak partamo anak sakola tu baraja manulih. Sasudah tu, kok lai campinnyo, anak-anak tu “Naiak Kalaih” manjadi Jurnalis Pelajar Rakyat Sumbar.
Manga se anak-anak sakola tu di duo tampek ko? Nan jaleh, nyo diaja ba-a caro manulih nan batua. Ba-a caro wawancara nan bana. Kok nan duo tu se diituang, kok lai dipagunoan wakatu tu untuak baraja, rasonyo lah padek mah. Anak-anak tu “dipaso” ba-a bapikia untuak dapek manulihnyo, ba-a supayo barani lo basobok jo urang untuak wawancara. Kok wawancara tu, jikok manggigia lutuik atau indak segeh nan dibaok basobok jo nan ka diwawancarai, ampuak wak dek nyo mah. Indak awak nan mawawancarai lai, tapi urang tu nan ka sambuah batanyo ka awak.
Kini ko, anak-anak nan sangkek sari baraja di Bengkel Literasi Rakyat Sumbar tu, alah lapeh dari Es Em A. Ado nan kuliah, ado nan lah bakarajo. Eh, indak saketek nan bakarajo bahubungan jo tulih manulih tu. Ado nan manulih buku, manulih Cerpen, novel, ado lo nan manjadi wartawan, manjadi dosen, manjadi guru sambia ma-ajaan pulo ba-a caro manulih ka urang banyak. Ado juo nan punyo media online sambia mambukak tampek urang sakolah khusus manulih. Alhamdulillah…
Tu ba-a kini la-i? Nan jaleh, di Bengkel Literasi Rakyat Sumbar jo Jurnalis Rakyat Sumbar ko taruih juo baproses. Nan sadang baraja di Jurnalis Pelajar Rakyat Sumbar, ado Angkatan III, IV, V jo VI. Angkatan paliang tuo, Angkatan III karano anak tu katiko masuak inyo Es DE. Tu dek masih sakola, taruih se inyo di situ. Nan kawan angkatannyo, iyo lah ado lo nan salasai kuliah jo ambiak S2 sambia manjadi wartawan.
Sasudah angkatan nan paliang ketek, Angkatan VI, kini ko sadang dibukak lo pintu untuak nan baru. Angkatan VII untuak Es Em A, Angkatan VIII untuak Es Em Pe. Kok ado anak, kamanakan, dunsanak wak nan kabaraja, cubolah. Ado duo pintu untuak baraja di siko. Apo pintu nan duo tu? Pintu partamo, bisa untuak surang-surang se dari sakolanyo. Pintu kaduo, bisa lo untuak ciek sakola se sakalaih.
Kok ituang-ituangannyo, wak atur se kudian beko. Nan jaleh, salamo nan lah jalan ko, indak mambayia bagai anak-anak tu doh. Baraja perai!
Ba-a dunsanak? Itu se-lah kaba dulu dih. Ko indak hoaks bagai doh. Kok indak picayo, buliah ditanyoan langsuang ka wa-den.
Alah tu. Panjang bana nan den tulih ko. Bosan lo kanti beko.*
Tulisan kiriman dari Firdaus Abie
Pak Paradise ko kini Pimpinan Redaksi Harian Umum Rakyat Sumbar.
