Bukiktinggi Salalu Di Hati
Alah lamo rasonyo indak pulang kampuang ka Bukiktinggi. Takana maso ketek dulu bamain di Janjang Ampek Puluah, mandaki turun naiak sambia mancigok cincin ameh di toko ameh nan baderet dari bawah ka ateh. Ditambah pulo sambuah lukisan karya seni dari seniman palukis ranah minang sapanjang jalan tu. Mulai dari lukisan rumah gadang, gunuang marapi, gunuang singgalang, sampai ka pamandangan Jam Gadang jo Panorama Ngarai Sianok.
Kini Bukiktinggi alah banyak barubah, basolek manuruik pakambangan jaman. Baitu juo jo kawasan Pasa Ateh nan lah co Mall di kota-kota gadang. Tasusun rancak babagai kadai dari lantai 1 sampai ka lantai ampek Pasa Ateh. Mulai dari kadai sulaman jo border sampai ka kadai oleh-oleh khas Bukiktinggi. Nan dak kalah santiangnyo, pasa Ateh ko punyo konsep pasa hemaik energi, ndak banyak paralu listrik karano banyak dibuek ruangan tabukak nan cahayo bisa masuak. Takaik sirkulasi udaro santiang pulo, mamakai teknologi solar panel kakinian sahinggo labiah ramah lingkuangan.
Jikok salamo ko macet di sakaliliang Bukiktinggi kawasan Jam Gadang panuah dek kandaraan roda duo jo roda ampek nan parkir sambarangan, kini alah barubah 180%. Lahan parkir oto jo onda alah disadiokan di lantai dasar Pasa Ateh. Lahan parkir nyo lueh jan takuik panuah jo ndak kabagian. Yo subana alah baraso parkir di Mall-Mall kito, ditambah pulo mambayia parkir alah Cashless mamakai E-Money. Sabagai informasi parkir di siko sajam partamo 5.000 piah, ditambah 2.000 piah tiok sajam salanjuiknyo.
Bukiktinggi labiah ta tata rancak, kawasan Jam Gadang alah kamek, banyak tampek pajalan kaki, tampek duduak-duduak malapeh panek atau sakadar ba-selfie di muko Jam Gadang. Sarupo nan taralah, suguahan kuliner khas Bukiktinggi siap mamanjoan lidah pangunjuang. Sabuik se lah kuliner Nasi Kapau di Los Lambuang nan tasohor jo gulai tambunsu nyo. Gulai Itiak lado ijau di Ngarai Sianok bawah nan padeh-padeh lasuah, sampai ka kuliner kakinian sarupo kadai kopi nan alah manjamua di sakitaran Jam Gadang.
Itu saketek carito paubek hati rang Minang nan di Rantau nan alun sampat pulang kampuang. Jikok ado wakatu luang cigok-cigok juo lah kampuang kito ko, sarupo biaso, Bukiktinggi salalu di hati.
